Xorasani dəvəşə həşi peme.

Xorasani dəvəşə həşi peme.

Imruj Zilğədə manqi yonzə,imomət iyən viloyəti vavriski doə həştminə astovə,həzrəte İmom Rıza(ə)-i təvəlludi sor qardemone.

İmom Rıza(ə)-i səhn iyən ziyorətqo ımruj qıləy məxsusə abo-həvoş heste.qırd səhn və ətrof de çoon dərostə bıə və iyo bıə həmmə insonon ısət çı cıvon bıbu ya piy,şoyvonəti kardedən.əvon çı Rəuf iyən mehribonə imomi təvəllludi ruji,çəy nuraniyə ziyorətqoyədə mehmonin.çəvon daston dıvo kardə holədə bə osmon rost bedə iyən hakəs Xıdovənde-Aləmiku ıştə hacəti de ım mehribonə imomi vositə tələb kardedə. iyo,Məşhəd çı vəhışti i poə iyən dıvoon ğəbul bıə vırəy.

İmom Rızə(ə) Hicri-Ğəməri 148 sori Mədinə şəhrədə bə dınyo omə.ə həzrət dıştə əzizə pı İmom Mosə Kazım(ə)-i tərbiyə iyən ro nışon doey vositə bo vey məsuliyyətinə vəzifə bıə imoməti məsələ hozzı bedəbe.çokə əxloğ,ziyodə elm,bə Xıdo nığılə imon iyən bə məxloği dığğət kardey,İmom Rıza(ə)-i xısusiyyətonku be və ım xıslət əy çı cokəsonku co kardedəbe.Ə həzrət hejo bə mısılmınon koon dığğət kardedəbe,çəvon problemon həll kardedəbe iyən çəvon ehtiyocon bərtərəf kardedəbe.İmom Rıza(ə) bə noxəşon osə ğandedəbe iyən de təvazukoronə formə ıştə mehmonon ğəbul kardedəbe.İmom Rıza(ə)-i veyə elm iyən mərıfət boyis bedəbe ki,islomi dınyo yolə alimon çəy palu boon.İmom(ə) ıştə imoməti devronədə ziyodə alimonış perosne iyən Kərimə-Ğıroni təfsiri sahədə,hədis,əxloğ,əhkam iyən islomiyə tibbi zəminədə muhimmə əsəronış bə yadiqar noəşe.

İmom Rıza(ə) 35 sinnədə,ıştə buzurquvarə dədə İmom Mosə Kazım(ə)-i şəhodəti bəpeştə,imomət iyən çı mısılmınon rəhbərəti məsuliyyətış vist sori ərzədə bəştə ohdə peqəteşe.çə buzurquvarə imomi imoməti devroni i mıddət Harun-Ərrəşidi xilofəti zəmonədə iyən i mıddət yəni təğribən ço sor Əmini və vist sor həm çı Məmuni xilofəti zəmonədə be.xəlifə Məmuni zəmonədə İmom(ə) de çəy tərəfiku bıə tojə fəndon dom bə dm bedəbe.Məmun  Əbbosiyon vey yolə xəlifəonku be iyən qıləy mırəkkəbə xıslətış hestebe.əv ıştəni jıqo nışon doydəbe ki,quya çı Pəyğombər(s) Əhli-Beyti(ə) iyən İmom Rıza(ə)-i piyə kəsonkuye.eyni holədə əv vey sıtəmkor be və bo milləti məxsusən bo Əhli-Beyt(ə)-i tərəfdoron qıləy şiddətin iyən etosniyə şərayitış icod kardəbe.xəlifə Məmun İmom(ə)-i de sıtəmi mıborizə bardə mərkəziku bə diyəro kardey xoto,bə ğərol ome ə həzrəti ıştə vəliəhd iyən canişinko.Məmun fik kardedəbe ki,ıştə xilofətədə de İmom Rıza(ə)-i həmkorəti vositə,kardey bəzıne ıştə hukuməti ğanuni elanko iyən çı İmom Rıza(ə)-i hərəkəton ıştə nəzorəti jiyədə obəqəte.çımisə əlovə çı İmom Rıza(ə)-i təğvanin bıey iyən bə dınyo həris nıbey bə sıvoli ji ebəqıne.Məmun de plan iyən məğsədi ıştə koş bino karde.əmmo İmom Rıza(ə)-i bəsirətinə şəxsiyyət,çəy ım məkrinə planış pevuşkıniyeşe.İmom(ə) çı Mədinəku bə Xorasani tərəf hərəkəti zəmonədə deştə sıxan iyən rəftoron,ıştə çı Məmuniku norozi bıey elon kardedəbe və millət həm sərəsin ki,Məmun zolimonə formədə iyən məcburən İmom(ə)-i çəvonku co kardedə.İmom Rıza(ə) de çandə qılə şərton ım məsuliyyətış ğəbul karde.çə şərtonku qıləyni ımbe ki,bə hukuməti hiç qıləy ko mıdoxilə nıko.çı İmom Rıza (ə)-i ım hərəkət çı Məmuni hiyləon betəsir kardey mənoədə be.i sor vəliəhdi elan kardey bədiqə,navko de İmom (ə)-i oşno bıə kəson iyən hətto Məmuni sarayədə ko kardə kəson.çəy çehrədə əvışon çı hukuməti bə təzim iyən sıtoyişi loyığ vində bıə şəxsiyyəti unvanədə zıneşone. həyğətədə,bə Məmuni təsəvvıri əks,İmom Rıza(ə) bə dini alimon xatırcəməti iyən bə mısılmınon ruhiyyə zumandəti boyis be.

Imom Rıza(ə) deştə aliyə əxloği qırd insonon bəştə tərəf cəlb kardedəbe.İbreym ibn Əbbos qıləy ironıjə ədib iyən ənıvışt bın barədə nıvıştedə:hiçvaxti nıvindeme de cokəson sıxan voteyədə hoziyətiko.hiçvaxti mışohidə nıkardeme ki,ikəsi sıxani bıbırno və əv ıştən sıxanko.ha kəsi ko ğadir bıə holətədə əncom doydəbe.çiki palu nışteydə ıştə lınqi dıroz kardedənıbe.məclisədə nıştıyedə ıştə peşti bə divo dəhaştənıbe. Hiç nıvindıme de nokə iyən kənizon yavə sıxanko.hakəs iddioko ki.fəzilətədə bənə əy qıləy odəmım vində,bovə məkənən.