537-ə hissə-Məryəmi surə-93-98 şərifə ayəon

537-ə hissə

إِن كُلُّ مَن فِي السَّمَاوَاتِ وَالْأَرْضِ إِلَّا آتِي الرَّحْمَنِ عَبْداً (93) 

Osmonon iyən zəminədə jəqo qıləy movcud ni ki,bənə bandə Rəhmonə Xıdo palu nıvoy.

Vəynə proqramədə votemone ki,mışrikon məlayikonro və ıştə kali məbudon Xıdo fərzəndon zıneydəbin.əmmo Kərimə-Ğıron ım norəvoə əğedə iyən sıxani de şiddəti inkor kardedə. ın ayəon hamyedə:nəinki,fəğət çı zəminisə bıə insonon,bəlkəm qırd məxloğat çı Xıdo bandəonin ki,ğıyoməti ruji həm bın surətədə hozzı bəbeyn. Xıdovəndi de hestemoni aləmi bıə məxloği rabitə,çı əğə deştə nokə bıə rabitəy, nəinki, pı deştə zoə ya bıə və ya şımə təsəvvır kardə har qıləy co rabitə.

Çımisə əlovə çəy qırd osmonon iyən zəminədə bıə bandəon bəçəy əmron tabe iyən mutin, həni Xıdovəndi bəşmə ibodət iyən bandəçəti ehtiyocış ni və həyğətədə şımə bəştə movla və əğə bıə Xıdo mohtaciyon.

Çın ayəku umutedəmon:

1-hestemoni aləmi qırd məxloğat,min cumlə insonon iyən məlayiokn soyb Xıdoe və əvon ıştə jimon iyən mardey xıvand nin.

2-qırd hestemoni aləm çı Xıdo əmr iyən fərmoni jiyədən və bəçəy tərəf obəqardeyn, nəinki, çəvon oxo məlum ni.

لَقَدْ أَحْصَاهُمْ وَعَدَّهُمْ عَدّاً (94) 

Həyğətən, Xıdovənd qırd əvonış hisobış kardə və qılə-qılə(de dığğəti) aşmardəşe.

وَكُلُّهُمْ آتِيهِ يَوْمَ الْقِيَامَةِ فَرْداً (95)

Və ğıyoməti ruji qırd əvon coyli çəy palu bomeyn.

In ayəon çı Xıdovəndi bə qırd hestemoni aləmi məxloği bıə komilə əhotə iyən aqahəti iyən çəvon qırd movcudaton cuziyyati barədə xəbə doydə və hamyedə ki,hiççi çı Xıdo çəşiku məxfi ni.əv dəğiğə şikilədə qırd çiyon miğdori zıneydə və çı həmmə çiyon hisobiku xəbədoe.

Ğıyoməti ruji həm har qıləy şəxs coyli ilahi məhkəmə vədə hozzı bəbe və bəştə əməlon cəvob bədoe,nəinki,şımə qımon kardedon ğıyoməti ruji səhnədə çı qırd həmmə cəm bıəkəson miyono niyon bıey bəbe və çı ilahi hukuməti sultəku fərol kardey bəbe. çımisə əlovə hakəs ğıyoməti ruji təyliyə dast bome və hiçkəs hiççi vardey nibəzıne. nə fərzənd,nə jimoni həmro və nə mol və ğudrət.

Çın ayəonku umutedəmon:

1-Xıdovənd nəinki, kulliyatonku xəbədoe,bəlkəm qırd cuziyyat və detalonku həm aqahe.

2-ğıyoməti ruji insonon tənha bəmandeyn və hakəs bəştə fik bəbe,nəinki,bə cokəson fik.

إِنَّ الَّذِينَ آمَنُوا وَعَمِلُوا الصَّالِحَاتِ سَيَجْعَلُ لَهُمُ الرَّحْمَنُ وُدّاً (96) 

Həyğətən,imonış vardə iyən loyığinə ko əncom doə kəson,rəyrə(çı cokəson dılonədə) qıləy məhəbbət ğərol bədoe.

Çandə qılə dəvardə bərnomədə zikrımon karde ki,Xıdovəndi hamyeşe hətta mışrikon məbudon həm çəvonku bə diyəro bıey elan bəkay və ğıyoməti ruji bəvon koməq kardey əvəzi,çəvon mığobilədə bəmandeyn.ın ayə hamyedə:əmmo Xıdo bandə bıey iyən bəçəy əmri əsos çokə ko əncom doey,nəinki,insoni çı Xıdo məhbub kardedə və Xıdovənd bəy koməq kardedə,bəlkəm,Xıdovənde-Aləm qıləy ko kardedə ki, çı momin iyən salehə fərdon məhəbbət çı cokəson dılonədə həm ğərol qətedə. hətta deşmınon həm ıştə dılədə bə çokə insonon ələyh məhəbbətışon heste. harçənd əmələdə bəştə mənafeyon xoto de əvon deşmınəti həm kardedən.çın ko numunə tarıxədə ziyode.

Çoko ki, çandə qılə rəvoyətonədə omə ki,imom Əli(ə) ın ayə çəvon barədə nozil bıə kəsonkue və bə tarıxi şoydəti əsos çə həzrəti deşmınon həm bə ə həzrəti qıləy pokə inson bıey şəhodətışon doə və çə həzrəti mədhədə ziyodə sıxanışon kardə.

Çın ayəku umutedəmon:

1-imon iyən salehə əməli,cazibə və keşeşış heste.zira pokəti, dırıstəti, şucoət, isor(ıştə coniku dəvarde) və quzəşt kardey qırd kəson piyedəşone. nopokon həm ım sıfəti və çəy soybon sıtoyiş kardedən.

2-məhbub bıey çı Xıdo dastədəy.zira dılon həmmə çəy dastədəy.

فَإِنَّمَا يَسَّرْنَاهُ بِلِسَانِكَ لِتُبَشِّرَ بِهِ الْمُتَّقِينَ وَتُنذِرَ بِهِ قَوْماً لُّدّاً (97) 

Çən,həyğətən Ğıronro deştı zıvoni hoston kardemone ta deçəy vositə bə pərhizkoron bəşorət bıdə və bə canqtələbə məxloği xəbərdorəti bıdə.

وَكَمْ أَهْلَكْنَا قَبْلَهُم مِّن قَرْنٍ هَلْ تُحِسُّ مِنْهُم مِّنْ أَحَدٍ أَوْ تَسْمَعُ لَهُمْ رِكْزاً (98)

Və çanəndə çəvon bənav bıə ziyodə nəslon həlok kardemone.ayə çəvonku ikəsi pəydu kardedəş?(vindedəş) ya çəvon sədo məsedəş?

In ayəon bə Məryəmi surə oxonə baxşonin və bə Kərimə-Ğıroni çı bəşəri hidoyət iyən səodətədə bıə məğami işorə kardedə və hamyedə:həmonə ali və bılındə maarif iyən məfhumon de qıləy sodə zıvoni və hoston bəyon kardemone ta qırd məxloğ çəyku bəhrə bobən. pokə şəxson təşviğ bıbon və nopokon bızınon ki,ilahi ğəzəb iyən cəzo ciddiye və çı navkonə milləton taleku ibrət peqətənən.

Əvon qımon nıkəyn ki,kardey bəzıneyn Xıdovəndi ıştə mığobilədə ocizkəyn və deştə deşmonəti həxı nobud kardey bəzıneyn.ehanə bə dəvardə tarıxi nəzəkəmon, bəvindemon ki,dəvardə ğovmonku əsəron mandəni və çəvon sədoon bə quş omeydəni.

Çın ayəonku umutedəmon:

1-irşod iyən hidoyəti ro,dini maarifon de sodə və hostonə zıvoni bəyon kardeye.

2-de har qıləy dastə bəbe deçəvon zıvoni sıxankəmon.de mominon de təşviğ iyən bəşorəti zıvoni və de deşmınon de təhdid iyən tarsi zıvoni.