542-ə hissə-Taha surə-24-36 şərifə ayəon

542-ə hissə

اذْهَبْ إِلَى فِرْعَوْنَ إِنَّهُ طَغَى (24) 

(Ha Mosə ha!) Bə Fironi tərəf hərəkətkə ki, əv tuğyonış kardə.

Bə həzrəte Mosə(ə)-i nıbuvvət elan kardey bədiqə, çəy iminə məsuliyyət bə fironi soyəx şıey be ki, i tərəfiku əv ıştəni çı milləti xıdo zıneydəbe və co tərəfiku həm qırd məxloğış ıştə nokə kardəşbe və əvoni ıştə mılk zıneydəbe.

Peyğombəron məxloği bə ibıə Xıdo tərəf iyən əy pərəstış kardey dəvət kardey iyən irşod iyən hidoyət kardey be.əve Xıdovənde-Aləm sıftədə bəbe həzrəte Mosə(ə)-i bə Misri vığandə faxti,çə həzrəti iminə məsuliyyətbə Fironi tərəf hərəkət be ki,əv çı qırd fəsod iyən tuğyoni mənşə be.

Çı məxloği camiydə hiç qıləy ixtiyorış nıbə iyən çı sıtəmkorə hukuməton sultə bıə faxti, ilahiyə merdon iminə məsuliyyət de sıtəmkorə hakimiyyəti mıborizə bardeye ta çı Xıdo bandəçəti zəminə hozzı bıbu.

Bo fosidə muhit iyən camiyə islohiro bəbe çı kufr iyən fəsodi yolonku binokəy, nəinki, qıləy no solimə soxtemoni sultə jiyədə jiyə vıjor iyən kuçədə bıə məxloğiku.

Qıləy nizom ki,çı ilahi iyən insoni həddonku xaric bıə və de tuğyonkorəti və təcavuzi məşğul bıə.qıləy soxtemon ki,çəy sədə tağutə rejimonin və əvon çı həx iyən həyğəti mığobilədən.

“Ayətul-Kursi”-yədə həm “bə tağuti kufr” çı “bə Xıdo imoni” vəsə və mığəddimə hisob bıə və tarıxi dırozi Xıdo ovliyaon çı tağuton mığobilədə mandən və deəvon mıborizə kardey,ıştə əzizə conışon bın royədə fido kardəşone.

Çın ayəku umutedəmon ki,din çı siyosətiku co ni və peyğombəron həm bo məxloği hidoyətiro de zolımə hukuməton mıborizə bardəşone.de sıtəmkorə hukuməton mıborizədə bəbe ilahi ovliyaon bəvə dəşin və millət həm bəvon tabe bıbon.zira ım mıborizə qıləy umumiyə təklif və vəzifəy.

قَالَ رَبِّ اشْرَحْ لِي صَدْرِي (25) 

(Mosə)Voteşe: Xıdolim ha!(ısət ki,ım yolə ko bəçımı qi noə əve) çımı sinə hevujkə!(çımı səbro-hovsələ ziyodkə).

وَيَسِّرْ لِي أَمْرِي (26) 

Çımı ko bomı hostonkə!

وَاحْلُلْ عُقْدَةً مِّن لِّسَانِي (27) 

Çımı zıvoni anqıli ojkə.

يَفْقَهُوا قَوْلِي (28) 

Ta(əvon) çımı sıxanon(çok) dərəson.

Dəvardə bərnomədə ğeydımon karde ki,Xıdovənd bə həzrəte Mosə(ə)-i duş risolət iyən peyğombərəti məğami məsuliyyəti noey bədiqə,ıştə mecuzə dıqlə nımunəonku deçəy dasti nışonış doe ta çı nıbuvvəti elan kardey bənav,de əvon oşno bıbu.

Bın ayəonədə çın ilahi peyğombəri iminə məmuriyyət və məsuliyyət,bə Fironi saray tərəf hərəkət kardey iyən çəy tuğyongərəti və yoləşəxəti vədə mandey bəyon bıə. deməkə ki,qırd peyğombəron bo milləti hidoyətəro məmur bıən,əmmo camiyə bənə fironi bıə tuğyongərə hukuməton sultə jiyədə bıbu iyən əv qırd məxloği ıştə nokə bıko, məxloği hidoyəti ro,əvoni çı sıtəmkorə hukuməton sultə jiku ozod kardeye.

Təbiiye jıqo bo qıləy muhimmə məmuriyyətiro bəbe çı sıftəku hozzı bıbu.liza həzrəte Mosə(ə) sıftədə çı Xıdoku tələb kardedə ki,bo ın dıjdə ko əncom doeyro bəy zu iyən ğudrət inoyətkəy iyən xariciyə şərayiti boəy hozzıkəy.min cumlə ıme ki, Xıdovənde-Aləmi dılış heste çəy zıvoni noğisəti və mubhəməti çı miyoniku bobəy ta çəy sıxan rəvon iyən dərəsey bıbu iyən çəy nitğ ğabiliyyət zumand bıbu. həzrəte Mosə(ə)-i səbarzəti rəmz əv be ki,çın yolə məsuliyyətiku fərol kardey əvəzi, Xıdovənde-Aləmiku tələbış karde ki,bın koyədə bıə maneəon iyən muşkilaton bərtərəf kardey xoto bəy koməq bıbu ta əv ın koon əncom doeyədə mıvəffəğ bıbu. i tərəfiyo həm çəy zıvoni anqıl oj bıbu və ıştə məsuliyyəti əncom doə faxti çəy sinə tanq nıbu və co tərəfiku həm çəy hərəkəti vədə bıə xariciyə maneəon peqətey bıbu.

Çın ayəonku umutedəmon:

1-camiyə islohi royədə iminə ğədəm,çə həmonə camiyə rəhbəron islohe iyən çə sıtəmkorə hakimon inodkorəti iyən mığovimət kardə faxti de əvon mıborizə bardeye.

2-səbr, istiğomət iyən poydorəti,yolə məsuliyyəon əncom doey koyədə çı səbarzəti iminə şərte.

3-dıjdə koon ğəbul kardeyku fərol kardey əvəzi,Xıdovəndiku tələbkəmon ki, həmonə koon bəvırə rosney ğıvvə iyən imkonaton bəmə ətokəy.

وَاجْعَل لِّي وَزِيراً مِّنْ أَهْلِي (29) 

Çımı xıyzoniku bomı qıləy vəzir(koməq) ğərol bıdə.

هَارُونَ أَخِي (30) 

Çımı bo Haruni.

اشْدُدْ بِهِ أَزْرِي (31) 

(Və jıləvoni) Çımı peşti de əy ğoymkə.

وَأَشْرِكْهُ فِي أَمْرِي (32) 

Və əy çımı koyədə bomı şərik ğərol bıdə.

Həzrəte Mosə(ə)-i Xıdovənde-Aləmiku tələb kardə çiyonku qıləyni ım be ki,bın qonə məsuliyyəti,yəni risolət və məxloği dəvəti əncom doey koyədə çəy bo Haruni(ə) de əy bə ico bıey be ta əv həm ım qonə bo i baxşi bəştə duş peqəti və çı Fironi mığobilədə çəy dastiku bıqəto və bəy koməqkəy.

Çoko ki, təfsironədə omə:Harun(ə) çı Mosə(ə)-sə se sor yol be və qıləy fəsih iyən çokə nitğ ğabiliyyətış hestebe.əv çı həzrəte Mosə(ə)-i zəmoni dovranədə çı dınyoku şe. de həzrəte Mosə(ə)-i tələbi Harun(ə) bə peyğombərəti məğami vıjniye be iyən Fironi bə həxə roy dəvət kardey royədə həm ıştə  bo şərik iyən peşt be.

Çın ayəonku umutedəmon:

1-dıjdə koon bə vırə rosney koyədə Xıdoku və eyni holədə çı co kəson koməqiku həm istifodəkəmon.

2-nəinki, ixtisodi iyən ticoriyə koonədə,bəlkəm dini təbliği koonədə həm həmkorəti iyən şərik lozıme.

كَيْ نُسَبِّحَكَ كَثِيراً (33) 

Ta əmə tıni ziyod təğdıskəmon və bəştı şə`ni tərifon bıvotəmon.

وَنَذْكُرَكَ كَثِيراً (34) 

İyən tıni vey-vey zikrkəmon.

إِنَّكَ كُنتَ بِنَا بَصِيراً (35) 

(Xıdolim ha!) Tı hejo çəmə holiku aqahiş(əməni vindedəş).

قَالَ قَدْ أُوتِيتَ سُؤْلَكَ يَا مُوسَى (36) 

(Xıdovəndi) Hamyeşe: həyğətən, tı çiçı tələb karde, əv bətı doey be.

Bın ayəonədə həzrəte Mosə(ə)-i hədəf çəy çandə qılə tələbonədə bəyon bıə və çəy ,ğərəz məxloği bə ibıə Xıdo tərəf dəvət kardey iyən çı tağut vəşırkiku bə diyəro mandey co qıləy hədəfış nıbe.

Qırd mominon dastiku “Subhanəllah” iyən co zikron votey omeydə,əmmo əy camiyədə piyodə vəbərğərol kardey və de zılm iyən şırki pur bıə soxtemoni və sistemi isloh kardey çı peyğombəron koe.həlbəttə ımon de ilahi lutf və inoyəti bə əməl omeydə.

Çə şəxsi çı Fironi mığobilədə mandey ğudrətış heste ki,de Fironi mıborizə meydonədə Xıdovəndi hozzı,nazir iyən ğadir bızıno.Mosə(ə)iyən Harun(ə) jıqo qıləy imon iyən etoğodışon hestebe və Xıdovənde-Aləm həm çəvon tələbonış bə vırə rosneşe.

Çın ayəonku umutedəmon:

1-peyğombəron  nəzdədə  hukuməti fəlsəfə,de şırki pur bıə soxtemoni rişə bırniye iyən tohidiyə sistemi bərpo kardeye.

2- dıvo iyən tələb karde çəmə vəzifəy,harçənd Xıdovənde-Aləm qırd çiyon zıneydə iyən aqahe.