546-ə hissə-Taha surə-55-60 şərifə ayəon

546-ə hissə

مِنْهَا خَلَقْنَاكُمْ وَفِيهَا نُعِيدُكُمْ وَمِنْهَا نُخْرِجُكُمْ تَارَةً أُخْرَى (55) 

Əmə şımənımon həmonə(zəminkiu) ofəyəmone iyən əyo obəqordınemon. və ijən sənibəton çəyku bə bi bebəkamon.

Dəvardə proqramədə votemone ki,Kərimə-Ğıron de həzrəte Mosə(ə)-i çı tohid iyən miadi barədə bıə sıxanon tənasub,çandə qılə ayə Xıdovəndi zəminisə bıə neməton bəyon kardedə ki,ım neməton i bıə Xıdo nışonəonkue.ım ayə ki,həm çı məadi barədəy, bə zəmini işorə kardedə vəhamyedə:həmonə zəmin ki,şımə həyati iyən perəsey mənşəy, çən, çı mardey bədiqə  həm şımə cismi bə əmonət peqəteydə ta ğıyoməti ruji ijən bəşmə bə dumo bıdəy.

Həzrəte Əli(ə) çı nımoji səjdəon bə ın ayə qıləy işorə zıneydə və hamyedə:çı iminə səjdə məno ıme ki,Xıdolimha!mı sıftədə tulədə bim.ıştə sə çı səjdəku peqətə faxti, bəy işorə kardedə ki,tı mını çı tuliku ofəyə.dıminə səjdə ıme ki,mıni ijən bə tul obəqordıneş və ıştə sə çı dıminə səjdəku peqətey,yəni ijən mıni sənibəton ğıyoməti ruji çı tuliku bə bi bebəkaş.

Çın ayəku umutedəmon:

1-insoni xılğət çı tulikue.çən,qırd ım məğrurəti iyən təkəbbırəti bə çiçi lozıme?.

2-mardey çı jimoni oxo ni.zəmin çəmə cismi tosə ğıyoməti əmonət oqətə vırəy.

وَلَقَدْ أَرَيْنَاهُ آيَاتِنَا كُلَّهَا فَكَذَّبَ وَأَبَى (56) 

Və bə rosti ıştə qırd ayə və mecuzəonro bə fironi nışon domone. əmmo əy təkzib iyən imtino kardeşe.

قَالَ أَجِئْتَنَا لِتُخْرِجَنَا مِنْ أَرْضِنَا بِسِحْرِكَ يَا مُوسَى (57) 

(Fironi) Voteşe: ha Mosə ha! ayə tı oməş deştə sehri əməni çəmə sərzəminiku bə bi bekəş?

In ayəon ijən bə həzrəte Mosə(ə)-i de fironi bıə diyaloqi işorə kardedə və hamyedə: Firon bə Mosə(ə)-i həx bıey dəlolət kardə qırd mecuzəonış mışohidə karde. yəni çə həzrəti əso bə əjdəho peqardey və həzrəte Mosə(ə)-i dasti sipyi bıey. əmmo, ımonış həmmə inkorış karde.əv  Mosə(ə)-ış sehrbozi unvanədə təğdımış karde və elanış karde ki, əv çımı hukuməti peqordıney dumoe və dılış heste çımı taxtı-taci bə dast bıqəto və ıştən çımı vırədə hukumətkəy.

Çı fironi nəzəku həzrəte Mosə(ə)-i dəvət,inov boçəy hukuməti qıləy təhdid bə hisob omeydə be.zira Bəni-İsrayli çı fironi sultəku ozod kardey,bəçəy hukuməti vırto-volo bıey boyis əbi.boçi ki,əvon bo saxt iyən qonə koon xoto çı bandə və nokəon ğıvvəku oko doydəbin.əve fironi Mosə(ə)-ış mıttəhəm karde ki,əv çı keşvəri əmniyyət iyən iştimayi asayşi bəyənde jeydə.

Çın ayəonku umutedəmon:

1-Mecuzə bə məxloği huccəti təmom kardey xotoe,əmmo çiçkəmon ki,məxloğiku i dastə bəştə inodkorəti xoto,vey ruşinə mecuzəonışon ğəbul kardedəni iyən əvışon sehro-cadu zınə.

2-sıtəmkorə hukuməton hejo ıştə mıxolifon de camiyə əmniyyəti və asayişi bəyənde jıey mıttəhəmışon kardə və bəçəvon ələyh çı vətənpərvəron hiss iyən emosiyaku oko doəşone.

فَلَنَأْتِيَنَّكَ بِسِحْرٍ مِّثْلِهِ فَاجْعَلْ بَيْنَنَا وَبَيْنَكَ مَوْعِداً لَّا نُخْلِفُهُ نَحْنُ وَلَا أَنتَ مَكَاناً سُوًى (58) 

(Fironi)Voteşe: əmə həm hukmən bənə həmonə sehri botı bəvardemon. çən. (ısət) çəmə deştə miyono qıləy zəmon ğərol bıdə ki,bəştə və`də xilof beməşəmon. (əv həm)qıləy həmoyə məkanədə və ya qıləy fosilədə ki, bə həmməy nisbətədə yeksan bıbu.

قَالَ مَوْعِدُكُمْ يَوْمُ الزِّينَةِ وَأَن يُحْشَرَ النَّاسُ ضُحًى (59) 

(Mosə) Voteşe(çəmə) və`də vırə zinəti(idi) ruje və çoştə faxtiye ki,(bıdə) qırd məxloğ əyo cəm bıbon.

فَتَوَلَّى فِرْعَوْنُ فَجَمَعَ كَيْدَهُ ثُمَّ أَتَى (60) 

Çən, fironi peştış qordıne(məclisış tərk karde) peşo(və`də doə bıə ruji) ijən oqarde.

Bə Əraf iyən Şuəra surəonədə omə ayəon əsos,firon de Mosə(ə) iyən Harun(ə)-i bəhsi bədiqə,deştə muşaviron qıləy iclosış təşkil doe iyən çəvonku tələbış karde ki, çı Misri sərzəmini qırd sehrbozon bə poytəxt cəmkəyn və de mıxtəlifə təşviğ iyən təhdidi əvoni çı Mosə(ə)-i mığobilədə ğərol bıdəyn.əv deştə ın ko dılış hestebe həm çı Mosə(ə)-i abru çı içtimaiyyəti vədə bobəy ta həni bə məxloği miyon beşe nızıno və həm ijən ıştə Firon bıey ğudrəti bə milləti nışon bıdəy.

Vey əcib-ğəribə ko ıme ki,Firon ıştə qırd ğıvvəku okoş doe ta ğasbu Mosə(ə) iyən çəy bo ıştə koyku dast bıkəşon.əmmo çun əvon bəştə qətə roy həx bıey və bə Xıdovəndi himoyə iyən hidoyəti komilə şikilədə peştıpur bin,əve nəinki,bəçəvon dıl qıləy tars dənışe,bəlkəm əvon ıştə çı məxloği mığobilədə hozzı pəydu kardeyışon elan kardeşone.Mosə(ə) deştə bo Harun(ə)-i dılışon hestebe çın fırsətiku çok-çoki istifodəkəyn iyən çı fironi soxtemoni rısvokəyn iyən deştə həğğaniyyəti nışon doey çəyku bəhrə bobən və de ımrujnə təbiri,ım təhdidiku boştə qıləy dıjdə fırsət icodkəyn.

Çın ayəonku umutedəmon:

1-Bo ilahi həyğəton bəyon kardeyro,çı məxloği şoyvonəti və istirohət kardə iyən idə rujon fırsətiku mınosibə formədə istifodə kardey bəbe.

2-çı umum-məxloği huzurədə,kali dini munozirə və debaton əncom və icro kardey bəbe və ım çı Mosə(ə)-i de fironi bıə rəftori şivəonkue.