550-ə hissə-Taha surə-77-80 şərifə ayəon

550-ə hissə

وَلَقَدْ أَوْحَيْنَا إِلَى مُوسَى أَنْ أَسْرِ بِعِبَادِي فَاضْرِبْ لَهُمْ طَرِيقاً فِي الْبَحْرِ يَبَساً لَّا تَخَافُ دَرَكاً وَلَا تَخْشَى (77) 

Və bə rosti əmə bə Mosə vəhy kardemone ki, çımı bandəon bəşəvnəy(çı Misriku) hərəkətkə iyən boçəvon ovaşteyro çı dıyo miyoniku qıləy ro ojkə və çı deşmınon təğibiku iyən diyoədə ğərğ bıeyku mətars(çəy fiki məkə).

Vəynə bərnoməonədə həzrəte Mosə(ə) iyən sehrbozon imon vardey bəyon be və çı dastoni həmonə hissə bə oxo rəse.ın ayəon bə Bəni-İsrayili ğovmi jimoni co qılə macəra işorə kardedə.

Həzrəte Mosə(ə)-i bə sehrbozon səbarz bıey bədiqə,rujbəruj çə həzrəti tərəfdoron ziyod bedəbe. şəy bəpeşt çı Mosə(ə) iyən fironıjon miyono dave və çanq-bəyəxəon ziyod bedəbe. tosə əvırə ki,həzrəte Mosə(ə) Xıdovəndi tərəfiku məmur be,çı fironi sultə jiyədə bıə Bəni-İsrayili çı Misriku bekəy bobəy və əvoni bə Beytul-Muğəddəs oqordıni.

In ayə çı Xıdovəndi fərmoni jıqo bəyon kardedə ki,əvon bəbe şəvi nimədə şəhəriku xaric bıənin bin ki,deşmon çəvon xaric bıeyku xəbədo nıbon iyən de həzrəte Mosə(ə) ıştə əso bə Nili dıyo jıey, de ilahi əmri dıyoədə hışkə ro oj bıənin be.bın zəmon şımə de səlomətəti çə ruyku dəbəvardiyon,nə çı deşmoniku bıtarsənən və nə çı dıyo oviku.

Çın ayəku umutedəmon:

1-boştə din iyən ayini hifz kardey xoto hicrət lozıme. harçənd muşkilatonış həm bıbu.

2-məxloği çı sıtəmkoron sultəku peroxney, çı peyğombəron bərnoməonku qıləyni bıə.

فَأَتْبَعَهُمْ فِرْعَوْنُ بِجُنُودِهِ فَغَشِيَهُم مِّنَ الْيَمِّ مَا غَشِيَهُمْ (78) 

Çən, firon deştə ləşkəri dıyoədə dumo əvon eqınin. çən, dıyoku qıləy dıjdə ləpə əvonış eqəte və əvonış qırd ebordıne.

وَأَضَلَّ فِرْعَوْنُ قَوْمَهُ وَمَا هَدَى (79) 

Firon ıştə ğovmış bə zəlolət eğandeşe və bə hidoyət nırosneşe.

Mosə(ə) iyən çəy tərəfdoron hərəkət kardey xəbə bə fironi quş rəse və əv ıştən şəxsən qıləy dıjdə ləşkərış peqəte əvonış təğibış karde.tainki,əvon bə Nili ru sahil rəsin və Mosə(ə) iyən çəy tərəfdoronış bə muhasirəş qəte.

Mosə(ə)-i tərəfdoron vindeşone ki,çəvon peştono firon deştə zumandə qoşuni mandə və çəvon vədə həm Nili ru be.əve tars iyən vəhşəti çəvon bədəmış qırd eqəte. bın zəmon Mosə(ə) deştə əsoş Nili ruş dı poə kardeşe və ov dıqlə tərəfədə mande. de ilahi ecozi ro hışk be iyən rohət çəyo dəvarde bedəbe.bın zəmon Mosə(ə)-i tərəfdoron binoşon karde bo ğədəm şode.Bəni-İsrayil çı Nili ruku dəvardin. firon iyən çəy ləşkər əvoni təğib kardə holədə dumo əvon hərəkət kardedəbin ki, bın zəmon ovi əvonış eqəte və əvon çı ovi jiyədə ğərğ bin.yənde səpe cəm bıə ov ivrədə bənə qıləy dıjdə ləpə çəvon səpe peş be və çı fironıjon canqi təchizatonış həmmə ebordınışe.

Ayə dəvomədə hamyedə:firon de Mosə(ə)-i mecuzəon vindey,nə ıştən imonış varde və nə məxloğış hidoyət karde.bəlkəm de ziyodə inodkorəti bə məxloği zəloləti boyis be. əv ki,ıştəni çı Misri camaati xıdo zıneydəbe,çı səodəti əvəzi, məxloğış bə zəlolət iyən bədbəxtəti tərəf kəşışe və oxoyədə həm ıştən həmən çəy tərəfdoron məhvo-nobud bin.

Çın ayəonku umutedəmon:

1-ov iyən dıyo çı Xıdo məmurinin.qahi bə odəmi rəhm iyən bəzi faxti ğəzəb kardedən.

2 -camiyə hakim iyən rəhbəron çı milləti hidoyət iyən zəlolətədə əsosinə rolışon heste.

يَا بَنِي إِسْرَائِيلَ قَدْ أَنجَيْنَاكُم مِّنْ عَدُوِّكُمْ وَوَاعَدْنَاكُمْ جَانِبَ الطُّورِ الْأَيْمَنَ وَنَزَّلْنَا عَلَيْكُمُ الْمَنَّ وَالسَّلْوَى (80) 

Ha Bəni-İsrayil ha! həyğətən, əmə şımə deşmınon (dastiku) şımənımon peroxniye iyən deşmə Turi bandi rostə tərəfədə və`dəqo ğərol domone(və`dəmon noe). və bəşmə bənə Mənn iyən Səlva(hozzıə xorəxon) nozil kardemone.

In ayə Xıdovəndi bə Bəni-İsrayil ğovmi bıə yolə neməton işorə kardedə və hamyedə: çı fironi çənqaliku ozod bıey ki,de ilahi ecozi iyən de həzrəte Mosə(ə)-i rəhbərəti bə əməl ome,çı Xıdovəndi bə ım ğovmi bıə iminə hədiyyə be.

Turi band çı həzrəte Mosə(ə) iyən Bəni-İsrayiliku i dastə odəmi miadqo və vindemon kardə vırə iyən çı Tovrati lovhəon ğəbul kardə vırə be.qıləy məhəl ki, ilahi hidoyət əyo nozil bedəbe iyən Xıdovəndi ğudrət əyo təcəlli pəydu kardedəbe.

Həlbəttə ozodi iyən hidoyəti neməti kəno,Xıdovənd həmçinin maddiyə neməton həm bəvon nozil kardedəbe.əvon biyabonədə avarə iyən sərqərdon qardə faxti,əvon mınosibə xorək pəydu kardey zıneydənıbin.bın zəmon Xıdovənde-Aləm çəvon nezədə bıə bandiku anqivin bo əvon bekardedəbe və çəvon ixtiyorədə ğərol noydəbe və ləzzətinə qujdış bıə hırdə pərəndəon bəçəvon tərəf vığandedəbe ta əvon çə pərəndəon qujdiku bəhən.

Çın ayəku umutedəmon:

1-istiğlol iyən ozodi ilahi yolə nemətonkue ki,bəbe hejo əy bə yod dənəy iyən çəy ğədri bızıni.

2-peyğombəron məmurin ki,məxloği hidoyətkəyn.əmmo sıftədə əvoni bəbe çı tağutə rejimon sultəku ozodkardey zəminə hozzıkəy.

3-Xıdovənd həm bə mənəviyə neməton işorə kardedə və həmən bə mənəviyə neməton. əmmo mənəviyə koon bənavin.