552-ə hissə-Taha surə-85-89 şərifə ayəon

552-ə hissə

قَالَ فَإِنَّا قَدْ فَتَنَّا قَوْمَكَ مِن بَعْدِكَ وَأَضَلَّهُمُ السَّامِرِيُّ (85) 

Xıdovəndi(hamyeşe) əmə ıştı ğovmımon ıştı(omey) bədiqə imtovon kardemone və Samiri əvonış çı royku bekardeşe.

Vəynə proqramədə ərzımon karde ki,həzrəte Mosə(ə) bo Tovrati ğəbul kardey xoto, çıl ruj Turi bandədə mande iyən bə milləti tərəf nıoqarde.çın dovrani oxoyədə, Xıdovənd bə Mosə(ə)-i xəbə doydə ki,ıştı iyo bıə mıddətədə,qıləy Samiri nomo bıə kəs, məxloği çı Xıdopərəstəti iyən tohidiku bə inhirofi tərəf okırney zəminə hozzı kardeşe.millət həm bın imtovonədə ğəbul nıbin iyən bə şırk və bıtpərəstəti tərəf dimışon qəte.

Həlbəttə bə bıtpərəstəti tərəf oqardey,çı Misri camaati miyono movcud be.liza əvon çı Nili ruyku dəvardə faxti,de qıləy bıtpərəstə ğovmi vindey,jəqo qıləy bıti soxtey tələbışon karde.eyni holədə  Mosə(ə)-i çıl rujnə ğeybət və ğayib bıey,ın fırsətış bo Samiri bə əməlış varde ta bıtpərəstəti çı milləti miyono rəvoc bıdəy.

Deməkə ki, həzrəte Mosə(ə) bə Turi bandı-ku şıə faxti ıştə bo Harun(ə)-ış çı məxloği miyoni ıştə canişinış elan kardəbe,əmmo məxloğ bəçəy sıxan iyən xəbərdorətiyon dığğətışon nıkarde və bəy nıpemandin.

Çın ayəku umutedəmon:

1-osmoniyə rəhbəron ğeybəti dovran,imtovon iyən fitnə zəmonon bıə və mumkine ziyodə insonon bın dovranədə mınhərif bıbu.

2-mominon hejo ilahi imtovoni mə`rəzədən iyən inhirof və zəloləti xətərəiku əmonədə nin.

فَرَجَعَ مُوسَى إِلَى قَوْمِهِ غَضْبَانَ أَسِفاً قَالَ يَا قَوْمِ أَلَمْ يَعِدْكُمْ رَبُّكُمْ وَعْداً حَسَناً أَفَطَالَ عَلَيْكُمُ الْعَهْدُ أَمْ أَرَدتُّمْ أَن يَحِلَّ عَلَيْكُمْ غَضَبٌ مِّن رَّبِّكُمْ فَأَخْلَفْتُم مَّوْعِدِي (86)

Çən, Mosə ğeyzin və norohət bəştə umməti tərəf oqarde(və voteşe) ha çımı ğovm ha! ayə şımə pərvərdıqori bəşmə qıləy çokə(Tovrati nuzul bıey) və`dəş nıdoe? Ayə(çımı ğeybəti) mıddət bəşmə dıroz be? Yaanki, piyedəyone şımə pərvərdıqori tərəfiku qıləy ğəzəb bəşmə nozil bıbu ki, şımə(jıqo) bəçımı və`dəon xilof beşeydon?

Həzrəte Mosə(ə) bə Turi bandi şıey bənav bəştə ğovmi çəşnavi doşe ki,Xıdovəndi və`dəş doə ki,Tovrati nozilkəy və az boəy ğəbul kardeyro əyo şedəm.ə həzrət çı millətiku əhdış sıe ki,çəy ğeybəti dovranədə bəçəy bo Harun(ə)-i əmron pebəmandeyn və bəy itoət bəkayn.əmmo məxloğ bəştə bın və`də xilof beşin iyən bə Harun(ə)-i hiç qıləy etinoşon nıkarde.bəçəy xoto həzrəte Mosə(ə) çı Turi bandiku oqardeyədə,bə Tovrati nozul bıeyro şoyvonəti kardey əvəzi,ğeyzin iyən əsəbi be.

Çın ayəku umutedəmon:

1-bə dini ğeyrəti xoto və çı kofiron mığobilədə,ğeyzin iyən norohət bıey,Xıdo ovliyaon xısusiyyətonkue.

2-ilahi ovliya və peyğombəron ğəzəb,Xıdo ğəzəbi həm nozil kardedə.

3-bə ilahi əhd-peymoni və bəştə və`dəon xilof beşey,camiyədə irtica iyən inhirofi zəminəon hozzı kardedə.

قَالُوا مَا أَخْلَفْنَا مَوْعِدَكَ بِمَلْكِنَا وَلَكِنَّا حُمِّلْنَا أَوْزَاراً مِّن زِينَةِ الْقَوْمِ فَقَذَفْنَاهَا فَكَذَلِكَ أَلْقَى السَّامِرِيُّ (87)‏

(Məxloği bə Mosə) Voteşone: əmə deştə meyli və xoşi bə və`də xilof nibeşimon. bəlkəm, əmənışon vadar karde. əmə çı fironıjonku deştə peqətə zər-zivəron bə otəş şodomone. və Samiri jıləvoni bəmə ilğaş karde.

Bəni-İsrayil ki,ıştə kardə koyku peşmon bin,binoşon karde bo bəhonə iyən uzr vardey. əvon voteşone:əmə deştə ixtiyori iyən zıne-zıne ım ko əncomon nıdoe, bəlkəm əmə jıqo bə Samiri sıxan və ilğaon təsiri ji dəşimon ki,nızınə holədə bəçəy votə sıxanon əməl kardemone və çəmə tono  çı fironıjonku bıə telı və zər-zibəon həmmə bə Samiri heykəl soxtə kurə şodomone.Samiri həm ıştə dastədə bıə qırd çiyonış əyo ğandeşe və oxoyədə əv qıləy telıə poynəş soxte.

Çın ayəku umutedəmon:

1-qınokoron boştə qınoon bəhonə vardeyro,cokəson ıştə inhirofi amil iyən mığəssır zıneydən ki, ım həm çəvon qınoku bəkam nibəkay.

2-zər-zibəron bo məxloği inhirof kardey zəminəonkue.məxsusən ehanə deşmon boəy qıləy bərnomə və plan bıkəşo.

فَأَخْرَجَ لَهُمْ عِجْلاً جَسَداً لَهُ خُوَارٌ فَقَالُوا هَذَا إِلَهُكُمْ وَإِلَهُ مُوسَى فَنَسِيَ (88) 

Samiri(çə həmonə telıonku) boəvon qıləy sədo bekardə poynə soxteşe. bın zəmon(deştə tərəfdoron bə məxloği) voteşone: ım şımə iyən çı Mosə Xıdoe. çən, Samiri(çı Xıdo iyən Mosə qırd təlimonış) çı yodo bekarde.

أَفَلَا يَرَوْنَ أَلَّا يَرْجِعُ إِلَيْهِمْ قَوْلاً وَلَا يَمْلِكُ لَهُمْ ضَرّاً وَلَا نَفْعاً (89) 

Çən, ayə vindedəniyon ki,(ım poynə) bəvon hiç qıləy cəvob doydəni iyən bəvon hiç qıləy xəyo-zərəlış ni?

Samiri çı məxloğiku sıə de həmonə zəro-zivəron qıləy telıku bıə heykəlış soxte və qıləy fəndış oko doe ki,çə həmonə poynəku qıləy sədo beşedəbe. ım ko boyis be ki, camaat bə həmonə sədo bekardə poynə dığğətkəyn.əve Samiri iddioş karde ki, Mosə(ə) ıştən həm bə Turi bandi şıey əvəzi bəbe bə ın poynə soyəx oməbe iyən çəyku bəbe fərmonış sıəbe.

Xıdovənd əvoni mızəmmət kardə holədə hamyedə:əvon çoko de poynə sədo məsey, çı vahidə Xıdoku dastışon kəşe? əmmo nıvindeşone ki,çə poynə dastiku hiç qıləy ko omeydəni iyən bəvon hiç qıləy xəy və ziyonış ni?qıləy holədə ki,qıləy həyğiyə məbud bəbe hiç nıbu ıştə bandəon ehtiyoci təminkəy.

Çın ayəonku umutedəmon:

1-həxə roy deşmınon,bo məxloği çı royku bekardey xoto çı harcurnə əbzoronku istifodə kardeydən.

2-çı veyə insonon ağl çəvon çəşonədəy.ta Xıdo deştə çəşi nıvindon,bəy imon vardedənin.