843-ə hissə-Sadi surə-44-48 şərifə ayəon

843-ə hissə

وَخُذْ بِيَدِكَ ضِغْثاً فَاضْرِب بِّهِ وَلَا تَحْنَثْ إِنَّا وَجَدْنَاهُ صَابِراً نِعْمَ الْعَبْدُ إِنَّهُ أَوَّابٌ (44)

Və(bəy votemone:) çı beməyon  nozıkə xol-xıçonku idastə bəştə dast bıqət və deəy(bəy) bıjən ta(bəştı jeni zərəl nırəso) və ıştə ğəssəmi dəmarışt. əmə Əyyubımon səbrəkə vinde. çı çokə bandə! bərosti əv(çəmə dərqoyədə)vey tobəkə be. 

Navnə proqramədə çı həzrəte Əyyub(ə)-i həxdədə sehbət kardemone və votemone ki, Xıdovəndi əvış cismi cəhəto de vey yavə formadə noxəşəti, mol iyən fərzəndi çı dasto doey imtovonış karde və ə həzrət həm qırd çın çiyon mığobilədə səbr kardedəbe və bə Xıdo şık kardedəbe. çoko ki, rəvoyotədə omə ki, həzrəte Əyyub(ə)-i jimoni həmro çə həzrəti noxəşəti qırd devronədə əvış coyli nıhaşteşe və hejo çəy kənoyədə be. əmmo,iqlə ruj çə həzrəti jimoni həmro ki, bəy diyə kardeyku oqonıyibəbe, bə şəytoni vəsvəson giriftor be və voteşe ki, Xıdovəndi Əyyub(ə)-ış çı viro bekardə və əv bo Əyyub(ə)-i çın saxti iyən muşkilatonku peroxneyro bəpe ğərəz Xıdo bə cokəson soyəx bışo. həzrəte Əyyub(ə) çın sıxanonku vey norohət və ğeyzin be və ğəssəmış harde ki, havaxt ki,əv çokbe iyən çı yonquku bəsə səpoysə əyşte,ıştə jimoni həmro bədəmi cəhəto tənbih bəkarde.

Əmmo, Əyyub(ə) de Xıdovəndi lutf iyən inoyəti çın saxtə noxəşətiku nicotış pəydu karde, bə ğərol ome ki, bəştə jimoni həmro qırd ın saxti iyən noxəşəti zəmonədə bıə fədokorətiyon xoto, əy tənbih nıko və bəy hiç qıləy cəzo nıdo.

In ayə hamyedə: Xıdovənde-Aləm bə Əyyub(ə)-i hamyeşe: çun tı de Xıdo nomi ğəssəmı hardə, əve Xıdo nomi hurməti oqət və ıştə ğəssəmi dəmarışt. əmmo, çun əv bə əfv iyən quzəşti loyığe, əve bəştə dast çı qandımiku ihuşə və ya bənə əy çi peqət və əy qədə-qədə bıjən bəştə jimoni həmro bədəmi ta tı həm ıştə ğəssəmı oqətoş və əv həm bədəmi cəhəto qıləy zərəlo-ziyon nıvindo.

Çın ayəku umutedəmon:

1-çoko ki, ğıyoməti ruji Xıdovənd bə insoni çokə koon xoto, çəy qınonku dəbəvarde, dınyoədə həm sıfarış kardedə ki,bə çokə ko soybon çokə koon xoto, çəvon cəzon həm sıvıkkon.

2-Xıdovəndi nomi hurməti oqətey lozıme. liza, bəpe de Xıdo nomi bıə ğəssəmon darıştey nıbu.

3-de peyğombəri(s) xışovəndəti iyən nezəti bə ğanuni əməl kardey mane nibəbe.

وَاذْكُرْ عِبَادَنَا إبْرَاهِيمَ وَإِسْحَاقَ وَيَعْقُوبَ أُوْلِي الْأَيْدِي وَالْأَبْصَارِ (45) 

Və ğudrət iyən bəsirəti soyb bıə çəmə bandəon İbreym və İshoği və Yəğubi bə yod dənə.

إِنَّا أَخْلَصْنَاهُم بِخَالِصَةٍ ذِكْرَى الدَّارِ (46) 

Həyğətən, əmə əvonımon ğıyoməti mənzıl bəyod dənə de qıləy məxsusə ixlosi xolis kardemone.

وَإِنَّهُمْ عِندَنَا لَمِنَ الْمُصْطَفَيْنَ الْأَخْيَارِ (47) 

Və əvon çəmə palu vıjniyə bıə kəson iyən çokə şəxsonin.

وَاذْكُرْ إِسْمَاعِيلَ وَالْيَسَعَ وَذَا الْكِفْلِ وَكُلٌّ مِّنْ الْأَخْيَارِ (48) 

Və İsmoyl və Yəs`ə və Zulkifli zikrkə ki, əvon həmmə çokə şəxsonin.

Vəynə bərnomədə ayəon dəvomədə ki, navkonə peyğombəron sərquzəşti bəyon kardedəbe, ın ayəon icmoli surətədə şəş qılə ilahi peyğombəron barədə sıxan votedə və hamyedə: əvon Xıdovəndi pokə bandəon bin və Xıdovənd həm əvonış çı harcurnə botıni qıno və nopəkətiyonku təmizış kardəbe və əvonış bə ixlosi vey barzə dərəcəş rosnəbe.

Bın ayəonədə bə həmonə peyğombəron iminə xısləti  yəni bəçəvon əbd və Xıdo bandə bıey işorə bıə. yəni peyğombəron de ubudiyyət iyən bandəçəti vositə bə ın barzə məğami rəsən. əvon nəinki, ibodət iyən Xıdo pərəstışi koyədə, bəlkəm ıştə jimoni qırd koonədə həyği surətədə bə Xıdo əmron təslim və tabe bin. bə adi insonon əks ki, ıştə jimoni dırozi adətən ıştə təmənno iyən oruzon dumon və ehanə həm bəçəvon tələbon əks qıləy ko əncom doey bıbu, norohət bəbeyn və kərohətışon bome. qıləy holədə ki, ilahi merdon və ovliyaon hejo Xıdovəndi əmron bəsə ıştə tələbonsə bəpe qəteydən və de ziyodə iftixor, iştiyoğ iyən həvəsi əy bə vırə rosneydən. təbiiye ki,bə ın məğami rəsey, bə qıləy daxili daxili rizoyət iyən cəhdi ehtiyociş heste və jıqo fərdon bo peyğombərəti məğami ğəbul kardey ləyoğətışon heste və əvon çı çok və vıjniyə bıə kəsonkuon.

Ubudiyyətisə əlovə, Xıdovənde-Aləm ıştə peyğombəronış çı elm iyən bəsirəti soybonış həm hisob kardə. ıştə vəzifə zıneyədə zumandə dərk iyən bəsirəti ğıvvə. ilahi merdon co xıslətonku qıləyni həm ım be ki, əvon boştə hədəfon bəvə bardey xoto, ıştə iyən ıştə tərəfdoron zu iyən imkonatonku oko doydəbin və çəvonku bəhrə bardedəbin. həmçinin bın ayədə dı kərə bə ın nuktə işorə bıə ki, peyğombəron çokə şəxson iyən xeyrə ko soybon bıən.

Çın ayəonku umutedəmon:

1-naavkonə peyğombər iyən çəvon ğovmon sərquzəşton mutoliyə kardey iyən ilahi peyğombəron təclil kardey və əvoni de çokə nomi ğeyd kardey, bo insonon tərbiyə iyən perosneyro Ğıroni şivəonku qıləyniye.

2-peyğombəron qırd kəmolaton sərçeşmə, ubudiyyəte. liza, Xıdovəndi vədə salehə əbd və bandə bıey, çəvon co kəmolatonku bənav zikr bıə. de qıləy co bəyoni peyğombəron bə Xıdo bandəti iyən ubudiyyəti təsiri xoto, bə ın barzə məğami noil bıən.