844-ə hissə-Sadi surə-49-58 şərifə ayəon

844-ə hissə

هَذَا ذِكْرٌ وَإِنَّ لِلْمُتَّقِينَ لَحُسْنَ مَآبٍ (49) 

Im qıləy zikre(bəyod dənoeye) və həyğətən bo pərhizkoron qıləy çokə oqardə vırə bəbe.

جَنَّاتِ عَدْنٍ مُّفَتَّحَةً لَّهُمُ الْأَبْوَابُ (50) 

Əbədiyə boğon ki, çəy bəon bəçəvon dimi oj bıə.

مُتَّكِئِينَ فِيهَا يَدْعُونَ فِيهَا بِفَاكِهَةٍ كَثِيرَةٍ وَشَرَابٍ (51) 

Əyo(bəsə taxtonsə) təkyə bəjəneyn(ıştə peşti dəbəhaşteyn və). əyo ziyodə miyvəon iyən peşoməninə(çiyon) tələb bəkardeyn.

Çandə bərnomə bənav kali ilahi peyğombəron sərquzəşton bəyon be. ın ayəon sıftədə dəvardə ayəon kulliyə surətədə bəyon kardedə və hamyedə: navkonəyon sərquzəşton bəyon kardeyku hədəf, təzəkkur və pand qəteye. zira, Kərimə-Ğıroni nozil bıey hədəfonku qıləyni, zikr və bəyod dənoeye. ayəon dəvomədə hamyedə: Xıdovəndi lutfon fəğət bə peyğombəron məxsus ni, bəlkəm Xıdo royədə bıə qırd təğvanin iyən pərhizkorə şəxson çokə ağıbətışon bəbe. Xıdovəndi bəvon dınyoədə nışon doə saxti iyən kaxtiyon əvəzi ğıyoməti ruji bebəşe və bəçəvon çokə koon çokə mıkofot bədoe. ehanə əvon dınyoədə bə həlol iyən həromi rioyət kardedəbin və kali ləzzət iyən xoşətiyonku dastışon kəşəbe, çımi əvəzi Xıdovənde-Aləm bəvon ğıyoməti ruji dınyo ləzzətonsə bəpeyə ləzzəton və xoşə neməton əto bəkarde.

Həlbəttə, dınyəvi jimoni rifoh iyən xəşəti rədəvardedə və de noxəşəti iyən maqi bə oxo rəseydə. əmmo, vəhışt iyən çəy ləzzəton əbədiye və hiç qıləy oxonə noxtəş mevcud ni. bo dınyoədə hejo səy və cəhd krdə kəson, Xıdovənd ğıyoməti ruji boəvon qıləy çokə mevğıyyət və vırə hozzo bəkarde ta çı bandəon barədə ilahi ədolət təcəssım pəyduko.

Çın ayəonku umutedəmon:

1-dəvardə torıxi nəğl kardey, bo sətasponeyro ni, bəlkəm bəpe bə insoni oğoəti iyən pand qətey boyis bıbu.

2-jimoni dırozəti jəqo həm muhim ni, bəlkəm əsos məsələ jimoni keyfiyyət və çokonə bə oxo rosney muhimme. təğva bə xoşə ağıbəti boyis bedə. liza, pərhizkor iyən təğvaninə şəxson yeqanə dastən ki, Xıdovəndi çəvon xeyə ağıbəti soyb bıey həxədə və`dəş doə.

3-ilahi rəhməti bəon bə vəhışti əhli dimi oje və əvon çiç tələbkon, çəvon ixtiyorədə bəbe.

وَعِندَهُمْ قَاصِرَاتُ الطَّرْفِ أَتْرَابٌ (52) 

Və çəvon kəno jimoni həmroon heste ki, fəğət bəştə şuon xıyə bəkardeyn və(deəvon) həmsinnin.

هَذَا مَا تُوعَدُونَ لِيَوْمِ الْحِسَابِ (53) 

Ime boşmə hisobi ruji və`də doə bıə çiyon.

إِنَّ هَذَا لَرِزْقُنَا مَا لَهُ مِن نَّفَادٍ (54) 

Həyğətədə, ım çəmə ruziye ki, boəy oxo ni(sə nibəbe).

Navnə ayəon dəvomədə ki, vəhışti neməton vəsf kardedəbe, ın ayəon bə insoni bə jimoni həmro hətto vəhıştədə həm ehtiyoci işorə kardedə və hamyedə: Xıdovənde-Aləm bo vəhışti əhli pok iyən reçinə jimoni həmroonış ğərol doə ki, əvon fəğət bəştə jimoni həmroon erəxeydən, bə cokəson dığğət kardedənin və əvon deştə jimoni həmroon həmsinn iyən həmsorin.

Ayəon dəvomədə hamyedə: bo həmməkəsi bıə hisob-kitobi ruji fəğət pərhizkor iyən təğvaninə şəxson çı vəhışti nemətonku bəhrə bəbardeyn. joqo ki,ilahi və`də çəvon barədə real və həyğət bəbe və Xıdovənd bəştə və`dəon xilof nibebəşe. coqlə nuktə ıme ki, vəhıştədə ilahi ruzi iyən neməton hiçvaxti sə nibəbe və bə oxo nibərəse.

Çın ayəonku omutedəmon:

1-çokə jimoni həmro xısusiyyət ıme ki, ğərəz ıştə şu bə cokəson çəşış nıbu iyən ıştə dıli fəğət bəştə şuə dəvasto.

2-vəhışti neməton həm hisob-kitobış heste və həmən dayimiye.

3-miad cismoniye və ğıyoməti ruji insonon bənə dınyo jimoni cismi qıləy şikilışon bəbe. əv ləzzətinə miyvəon oko bədoe və peşoməninə çiyon pebəşome. həmçinin, de reçinə jimoni həmroon bəico çəvon cinsi tələbon bə vırə rosney bəbe.

هَذَا وَإِنَّ لِلطَّاغِينَ لَشَرَّ مَآبٍ (55) 

(Vəhışti əhli mıkofat)Ime və bo tuğyonəkəyon vey yavə oqardə vırə mevcude.

جَهَنَّمَ يَصْلَوْنَهَا فَبِئْسَ الْمِهَادُ (56) 

Qıləy duzəx ki, əyo daxil bəbeyn. çı bevəcə oromqohe(vırəy).

هَذَا فَلْيَذُوقُوهُ حَمِيمٌ وَغَسَّاقٌ (57) 

Im qılə iyən çırkinə ove ki, bəpe peşomon.

وَآخَرُ مِن شَكْلِهِ أَزْوَاجٌ(58) 

Və(ğərəz ımon) co ıncur cəzon nevon(bo əvon  heste).

Kərimə-Ğıroni şivə və metod ıme ki, çokə insonon ağıbəti hejo çı bədə fərdon ağıbəti kəno ğeyd kardedə ta məsəkəs de ın dıqlə mığoyiə kardey, de ojə çəşi ıştə jimoni roy iyən metodi bıvıjno. iyo həm çı vəhışti əhli bəhrə bardə neməton zikri bəpeştə, hamyedə: əmmo, əkəson ki, ıştə həddiku dəvardedən və çı tuğyon iyən usyoni əhl bedən, ğıyoməti ruji əvoni qıləy saxt və şiddətinə cəzo çəş kardedə. əvon çı ləziz və nuş bıə peşoməninə çiyon əvəzi,qılə ov və ıştə bədəmi çırkinə ovi pebəşomeyn.

Çəvon vırə duzəx və cəhəndım bəbe. qıləy vırə ki, bədkor iyən yavə ko soybon əyo cəm kardey bəbeyn və çəvon qırd bədəm iyən cismiku ufunət iyən bevəcə bu bome. həlbəttə, çı cəhəndımi əhli əzob və cəzo, fəğət çı qılə ov iyən sutunə otəşiku iborət ni. bəlkəm, çandə nev iyən ziyode ki, bə cəhəndımi hejo əzob-əziyyəti dılədə mandey boyis bəbe və hiçvaxti çəvon əzobon bə oxo nibərəse və boəvon adi nibəbe.

Çın ayəonku umutedəmon:

1-ıştə ağıbəti fik kardey boyis bəbe ki, inson ıştə jimoni roy vıjnemonədə dəğiğ iyən huşin bıbu və dınyo ofəyə Xıdovəndi əmron mığobilədə tuğyongərəti iyən yoləşəxəti nıko.

2-ilahi cəzoon bənə çəy mıkofati nevbənev və mıxtlife və hiçvaxti duzəxi əhli vəzyət normal iyən addiyə formaədə nibəbe.

3-mığət bıbəmon və ğıyoməti ruji əbədiyə cəzo de ın dınyo rədəvardə iyən kırtə ləzzəton məhırəmon.