Şiiə yolə alimon-56

Mığəddəs Ərdəbili baxşeş və səxavət qıləy həddədə be ki,bəziyon əy de Hatəm Tayi mığoyisə kardedən.ğəhətiyə rujonədə Mığəddəs Ərdəbili ıştə mənzil və kədə bıə qırd çiyon çı fəğıron miyiono təğsımış və boştə iyən boştə xıyzoni çı qıləy fəğıri səhmi mığdorədə oqəteşe.çəy jimoni həmro ikərə bəçəy bın koy etırozış karde və çəvon fərzəndon vəşyan mandeyku ıştə norohətçətiş nışon doe.Mığəddəs Ərdəbili qıləy cəvob nıdoə holədə ıştə kəyku xaric be ta bışo Kufə məçitədə de etıkofi koy məşğul bıbu.Mığəddəs Ərdəbili çı kəyku xaric bıeyku dı ruj dəvardə nıbe ki,qıləy noməlumə şəxs de ziyodə qandım iyən keyfiyyətinə ordə bə ico bəçəvon kə ome və voteşe ki,ımon şımə məçitədə etıkof kardə şuyə vığandəşe.Muhəğğiğ Ərdəbili bəkə oqardey bədiqə çəy jimoni həmro bə keyfiyyətinə ordə və qandımi vığandey xoto ıştə rizoyətış nışon doe.harçiku bexəbə bıə Muhəğğiğ Ərdəbili dərəse ki,qırd ım ətiyyə və hədiyyə Xıdovəndi tərəfiku bıə,əve de bə Xıdovəndi şukr və həmdi koy məşğul be…..

Təvazukorəti iyən sodə jimon kardey qıləy çokə sıfəte ki,Mığəddəs Ərdəbili de əy dərostey bıəbe.nəğlışon kardə ki, ruji qıləy kərvon Nəcəfiku  oqardeydəbe və istirohət kardey fikışon hestebe.kərvoni əhliku ikəs ki,vey oqınəbe,Mığəddəs Ərdəbiliş vinde və əvış nızıne.çəyku tələbış karde ki,çı pul və muzdi mığobilədə bışi çəy oləton bışışto.Mığəddəs Ərdəbili əvış ğəbul karde və deçəy oləton şırtey koy məşğul be.bın zəmonədə milləti əvışon zıne və bə həmonə oləti soybi sə-sıxanışon karde.həmonə merd xəcolət kəşə holədə Mığəddəs Ərdəbiliku uzrxahətiş karde.əmmo,Mığəddəs Ərdəbili de qıləy komilə oroməti və de sırə diyəni bəy voteşe:”mumini bəsə çəy bıvə səy sape bıə həx bəsə çəy oləti şışteysə həm veye”….

Mığəddəs Ərdəbili ki,ıştə qırd zu və umrış xolisonə formədə çı Əhli-Beyt(ə)-I xıdmtədə sərfış karde və bə ım iftixori şərəfyob be ki,bə Sahibul-Əmr Məhdiyyi-Movudi(əc) məhzəri bırəso.çəy Mirfeyzullah təfrişi nomo bıə qıləy şoqird nəğl kardedə ki,I şəv çı mıtoliyə bədiqə,bə Əmirəl-Muminini Hərəmi səmt bıə ıştə hucrədə nıştəbim.ikərə həm vindeme ki,şəvi nimədə ikəs bə hərəmi səmt hərəkət kardedə.az jıqo fikım karde ki,əv dızde,əve əvım təğib karde və çəy dumo eqınim.peşi dərəsim ki,ım merd cənab Mığəddəs Ərdəbiliye.çoko ki,bə mığəddəsə ziyərtqo bə rəse,ğıflon ıştənbəsə oj be və az ijən bəştə təğibi dəvomım doe.Şeyx ome və çı mıborəkə zərihi mığobilədə mande və məseydəbim ki,de ikəsi sıxan voteydə.peşo,çəyu xaric be və bə Kufə məçiti tərəf şe.məçiti dılədə mehrobi kəno de qıləy şəxsi dırozə sehbətış karde və çəy bədiqə oqarde.bın zəmon şeyxi mınış vinde və mı de isrori çəy izoh və tozihim piye.mıku əhdış se ki, çanədə az bəyjim ım mətləbi bo hiçkəsi nəğl nıko və nıvoto.əy voteşe ki,az qıləy dini məslədə muşkilım pəydu karde,əve bə Əmirəl-Muminini(ə) xıdməti rəsim və çə həzrətiku koməkım tələb karde.ə həzrəti hamyeşe ki,ımruj İmom Zəmon Sahibul-Əmre(əc).əve tı bə Kufə məçit bışi və çə həzrətiku sıvolkə.çən,mı bə Kufə məçiti şim,çə həzrətiku sıvolım karde və ıştə cəvobış se.çımı Kufə məçitədə vində şəxs həm İmom Zəmon Məhdi(əc) be”.bəle həmonə dınyoədə ki,de zılmət iyən toykiyəti pure,yolə şəxsiyyəton heste ki,de təğva və pokəti ıştəni bə nuri mənbə rosnedən və hərəbaxt beydən….

Yolə alim və fəğih bıə Mığəddəs Ərdəbili nəhoyətən Hicri-Ğəməri 933-ə sori Rəcəbə manqi çın dınyoku şe.de ın tərtibi  Ardəvili şəhriku pemə və bə qırd təşəyyu dınyo vavriski doə çın fəğohəti həşi,I umr əbədiyə islomi din və şəryəti royədə onıqnə cəhdon bədiqə Nəcəfı-Əşrəfədə ğurubış karde,eşe.qıləy holədə ki,çın yolə alimi erjinə əsəron ijən islom iyən şiyə dınyoədə nuroni və dəvəşə əsəronku bə hisob omeydə.Mığəddəs Ərdəbili mıtəhhər və pokə bədəm şiəyon iyən çəy duston əvışon movlaye-muttəğiyan həzrəte Əli(ə)-I hərəmi dılədə dəfn kardeşone ta çoko ki,əv dınyoədə çı Əhli-Beyt(ə)-I aşığ be,axırətədə həm deəvon həmnişin bıbu…