Şiiə yolə alimon-75

Feyz Kaşani ziyodə cəhd kardə qıləy alim və mıxtlifə elmonədə qıləy komilə şəxs be ki,ıştəku ziyodə təlifatonış bə yodiqor haştəşe.ım yolə alim ıştə kitob iyən risolə nıvıştey koş həjdə soriku binoş karde və əv 65 sinnədə beyədə bə sa çıl qılə unvoni nezi kitob iyən risloləonış nıvıştəbe ki,çəvonku har qıləyni İslomi camiyə elm iyən fərhənqi ozavziyedə veyə təsirış bıə.Feyz Kaşani əsəronku qıləyni “Təfsire-Safi” nomoş heste ki,Kərimə-Ğıroni təfsirədə metəbərə kitobonkuye. Feyz Kaşani boştə ım əsəri nıvışteyro,de tosə ə zəmoni bo Kərimə-Ğıroni nışvtə bıə qırd şiyə iyən sınni təfsironış de dığğəti mıtoliyəş karde və peşo ım təfsirış bə şiyə mustənəd və metəbərə rəvoyəton əsos nıvıştəşe.çın yolə alimi coqlə dıjdə kitobonku qıləyni nom “Əlvafi” nomış heste ki,ım kitob həm hədisi mevzuyədə nıvıştə bıə.Feyz Kaşani bo Vafi kitobi nıvışteyro  çı şiyə çoqlə metəbərə hədisi kitobonış yəni Kafi,Təhzib,İstibsar iyən Mən la yəhzəruhul fəğih kitobonış de dığğəti ıştə nəzəkuş dəvordıne və de tikror bıə hədison həzf kardey və şodey iyən de hədison şərhədə təkmili baxşon əlovə kardey,ıştəku qıləy foydəninə kolleksiyə və məcmuəş bə yodiqor haşteşe.Əlvafi kitob çandə cildədə çap bıə.Feyz Kaşani həmçinin kəlom,irfon,əxloği iyən ədəbi sahəonədə həmçinin çandə qılə əsəronış heste ki,bın kırtə fırsədə bo əvoni təğdım kardey məcol mevcud ni….

Əllomə Feyz deməkə ki,islomi elmonədə qıləy zumandə mıştəhid iyən mahirə ustod be,əmmo ijən çəy vucudədə qıləy noməlumə ətəş şuləvər be.Feyz Kaşani ıştə coniku sirab beydə nıbe və bəştə dast vardə elmon məcmuə bə aləmon pərvərdıqori nez bıey və bə kəmoli rəseyro befoydə zıneydəbe.əv co cins və nevədə bıə qıləy elmi dumo be.qıləy elm ki,deəy bəştə vucudi hevujətiş baxş karde ta bə aləmon ofəyə Xıdovəndi nezəti iyən təğərrıbi loyığ bıbu.ım elm bəpe çı coqlə cinsiku bıənin be,çı əməli cinsiku nəyinki,çı mədrəson dərsı-bəhsi cins və neviku.ım kam bardey təşnəti,nəhoyətən əvış çı Ğomi şəhriku bə İlahi yolə arif həkim Sədruddin Muhəmməd Şirazi rosneşe.bə zəmonədə Molla Sədra  çə rujiqori elmi camiyəku rəncidə və norohət be və çı təlif iyən tədrisi koyku dastış kəşəbe.Həkim Sədruddin çı botıni səfo iyən həyğəti nuri nəveyədə çı Mığəddəsə Ğomi şəhri ətrof diyonku qıləyniyədə  sakin bıəbe.Molla Muhsin deştə dusti Molla Əbdur-Rəzzağ Lahici  bə ico,həşt sor Molla Sədra palu İlahi hikməti elmış omute və de ibodət iyən deştə nəfsi mıcohidəti koon məşğul be tayinki,nəhoyətən de Xıdovəndi lutfi bə Ğudsi aləm iyən bə botıni oxoş nıbə elmon qıləy roş pəydu karde.Feyz Kaşani ısət nəyinki,İslomi elmonədə qıləy zumandə fəğih iyən komilə ustod be,bəlkəm qıləy botıni cəhəto aqah bıə arife be ki,ıştə təşnə conış çı həyğəti nuriku sirabış kardəbe..

Feyz Kaşani bə cımə nımoji ziyodə əhəmiyyət doydəbe və jıqo hisob kardedəbe Cımə nımoj Məsumə İmomi(əc) ğeybəti devronədə bə mısılmınon vocibe və ikəs ki,Cımə nımoji handedə, həni lozım ni Zohri nımoji bıvoto.yəni Cımə nımoj çı Zohri nımoji vırə qəteydə.Şirazi hakim çı Feyz Kaşaniku tələb kardedə ki,Cımə nımoji bın şəhrədə bərpoko.əv çı hakimi ım dəvəti ğəbul kardedə və dı sori mıddətədə Şirazi şəhrədə mandedə.əmmo,qədə-qədə çı Cımə nımoji həxədə bəhson və macəraon bə vucud omeydə və hətto ərsə və səhnə bo Feyz Kaşani tanq beydə və əv bə ğərol omeydə ki,bəştə çı moəku bıə Kaşani şəhri oqardo və de tədris,təlim,təblığ iyən təlifi fəoliyyəton məşğul bıbu.şiyə ım yolə alim deştə dustonku idastə Kaşani şəhrədə Cımə nımoji bərpo kardedə.

Əllomə Feyz Kaşani bə tarifi loyığ qıləy əxloği barzə keyfiyyəton soyb be və çı şehrət iyən ğudrəti bə dast vardey dumo nıbe.əv botıni elmi iyən foydəninə təfəkkuri kəsb kardey bəsə coqlə koonsə tərcih və bəpeş qəte və de hukuməti yolon həmnişin və çəvon mehmon bıeyku bə diyəro mandedəbe.əv çı elmi nəvemon iyən nəfsani kəmolaton dumo beyədə bə ziyodə saxtətiyon tovış varde və dayima bəştə dıroz mıddətin iyən təkrorinə səfəon əzob-əziyyəton tov vardedəbe.əv ıştə nəzə və rayon miyono de vey oşko iyən şucoətinə formə əməl kardedəbe və çı riyokorəti iyən yaltağətiku bə diyəro mandedəbe.Molla Muhsin çoko ki,çı harcurnə dınyo pərəstəti iyən beəxloğətiku ıştə norozətiyon elon kardedəbe,de hışkə məazqon,bemənoə təəssıbon iyən ğeyri-alimonə hərəkəton həm mıxolifət kardedəbe və çı dınyopərəstə alimonku bə diyəro mandedəbe.