Şiiə yolə alimon-80

Şeyx Hurr Amili boho ğeymətinə əsəron bə yodiqor mandə və muhəğğiğon çəy təlif kardə kitob iyən risolə mığdor bə 55 qılə rəsedə.ım yolə muhəğğiğ boştə kitobon tərtib kardero qıləy dəğiğ iyən məxsusə metodış hestebe.əv çı har qıləy hədisi həxədə təhğiğ kardero bə çandə qılə nusxəon ovard kardedəbe və tafut doə iborəon de dığğəti tədğiğ kardedəbe və çəvon həmməysə səhihə qılə vıjniyedəbe.çı şeyxi Amili vey erjinə koonku qıləyni həm mırəkkəbə hədison təhğiğ kardedəbe və əy deştə izoh iyən şərhi bo handə kəsi sodə və rohət kardedəbe. həmçinin şeyx bə hədison cəm kardey qıləy məxsusə dığğətış hestebe və mıxtəlifə kitobonədə pərokəndə surətədə bıə hədison bə ivrə qırdə kardedəbe ta ehanə qıləy muhəğğiğ çəvonku xəbədo bıeyış bıpyo,bəpe de dığğəti ko kardənin be və bo ımi ziyodə vaxt sərf kardənin be. Şeyx Hurr Amili kali kitobon bənə “isbatul-huda” və “cəvahirus-səniyyə” məxsusə mevzuonədə de pərokəndə hədison cəm kardey məğsədi təlif kardey bıə ki,çəy bədiqə bıə bə muhəğğiğon ziyodə koməkış kardə.”isbatul-huda” bə hədison şomil beydə ki,çı Xıdo-Rəsuli(s) nıbuvvət, imomət mecuzəon bəyoni isboti həxədəy və “cəvahirus-səniyyə” kitobədə həm Şeyx çı Peyğombəre-Əkrəm(s) iyən İmomon(ə) Xıdovəndi ğovl iyən sıxaniku bıə nəğl kardə hədisonış qırdəş kardə.jıləvoni bən hədisi istilohən hədise-ğudsi həm votedən....

Seyyid Suleymon Huseyni zoə və de Əllomə Bəhrani nomi məşhur bıə Seyyid Haşim Bəhrani Şiyə torıxi yolə alimonku qıləyniye ki,hədisi elmədə boho ğeymətinə kitobonış bə irs noə.əv yonzəminə əsri iminə nimədə Bəhreyni Tubli şəhri kəno Ketektan diyədə bə dınyo çəşış oj karde.Tubli bə zəmonədə çı Bəhreyni elmi iyən siyosi şəhr be.çın yolə alimi vilodəti torıx dəğiğə surətədə ğeyd bıəni.əmmo,torıxəvonon çəy vilodəti torıxışon Hicri-Ğəməri 1030 ila 1040-ə soronədə zınəşone.votey beydə Əllomə Bəhrani nəsəb və şəcərə de vistı penc qılə vositə bə Əhli-Byeti(Ə)haftminə imomi,İmom Mosə ibn Cəfəri(ə) rəseydə.Tubli həmonə zəmonədə hakim nıştə mərkəzi şəhr be və bəştə elmi iyən siyosi mərkəziyyəti xoto məşhur bıəbe.həmonə rujonədə Şeyx Muhəmməd bin Macid bin Məsud Bəhrani,həmonə sərzəmini elmi iyən mənəvi yolyəti və mərcəiyyəti koş bəştə ehdəş peqətəbe…..

Seyyid Haşım Bəhrani ıştə mığəddəmə təhsilonış ıştə vətən Bəhreynədə dəvordınəşe.çın yolə alimi elmi jimoni ım hissə və baxşi həxədə jəqo həm veyə məlumot ni.əmmo,Əllomə Bəhrani Bəhreynədə bıə iştimoyi mevğıyyət vey vavriski doydəbe.Seyyid Haşım Bəhrani ıştə moəku bıə vırədə ıştə təhsil iyən tədrisi bədiqə bə Nəcəfı-Əşrəfi səmt hərəkətış karde və çə zəmonə məşhurə alimon məhzəriku istifodəş karde.əv çandə sor bədiqə bə elmi-mənəvi məğami iyən iştihodi rəsey bədiqə,çı elmiyyə hovzə yolə mərcə və mıştəhidonku qıləyni be.harçənd Əllomə Bəhrani bə Nəcəfi şəhri daxil bıey barədə qıləy dəğiğə məlumot ni.əmmo,torıxi fakton nışon doydə ki,ım yolə alim Hicri-Ğəməri 1063-ə sori Nəcəfi yolə ustod Fəxruddin Tureyhi nəzdədə de elmi təhsili koy məşğul bıə.i mıddət Nəcəfi elmiyyə hovzədə de təhsil iyən tədrisi bədiqə,Əllomə Bəhrani bəştə moəku bıə sərzəmini oqarde və çı Şeyx Muhəmməd bin Macid bin Məsud Bəhrani rehləti bəpeştə ıştə jimon kardə camiyə milləti elmi və dini rəhbərəti və mərcəiyyəti koş bəştə ehdəş peqəte.çəy mərcəiyyəti əhotə qırd Bəhreyniku həm xaric be və İslomi co sərzəminon şiəyon həm bəy təğlid kardedəbin.yəni dini əmr və hukmonədə tıbğe ım yolə alimi nəzəon əməl kardedəbin…