Şiiə yolə alimon-81

Seyyid Haşım Bəhrani ıştə mığəddəmə təhsilonış ıştə vətən Bəhreynədə dəvordınəşe.çın yolə alimi elmi jimoni ım hissə və baxşi həxədə jəqo həm veyə məlumot ni.əmmo,Əllomə Bəhrani Bəhreynədə bıə iştimoyi mevğıyyət vey vavriski doydəbe.Seyyid Haşım Bəhrani ıştə moəku bıə vırədə ıştə təhsil iyən tədrisi bədiqə bə Nəcəfı-Əşrəfi səmt hərəkətış karde və çə zəmonə məşhurə alimon məhzəriku istifodəş karde.əv çandə sor bədiqə bə elmi-mənəvi məğami iyən iştihodi rəsey bədiqə,çı elmiyyə hovzə yolə mərcə və mıştəhidonku qıləyni be.harçənd Əllomə Bəhrani bə Nəcəfi şəhri daxil bıey barədə qıləy dəğiğə məlumot ni.əmmo,torıxi fakton nışon doydə ki,ım yolə alim Hicri-Ğəməri 1063-ə sori Nəcəfi yolə ustod Fəxruddin Tureyhi nəzdədə de elmi təhsili koy məşğul bıə.i mıddət Nəcəfi elmiyyə hovzədə de təhsil iyən tədrisi bədiqə,Əllomə Bəhrani bəştə moəku bıə sərzəmini oqarde və çı Şeyx Muhəmməd bin Macid bin Məsud Bəhrani rehləti bəpeştə ıştə jimon kardə camiyə milləti elmi və dini rəhbərəti və mərcəiyyəti koş bəştə ehdəş peqəte.çəy mərcəiyyəti əhotə qırd Bəhreyniku həm xaric be və İslomi co sərzəminon şiəyon həm bəy təğlid kardedəbin.yəni dini əmr və hukmonədə tıbğe ım yolə alimi nəzəon əməl kardedəbin…

Seyyid Haşım Bəhrani dini iyən fiğhi mərcəiyyət və təlif iyən tədrisisə əlovə,de iştimoyi koon məşğul be və məxsusən məhkəmə koonədə bə sıtəm vində kəson və məhrumon koon rəse.əv de Bəhreyni hakimon əmr be məruf iyən nəhy əz munkəri koyədə şucoətin iyən ciddiyə rəftorış hestebe.əve Bəhreyni milləti bəy qıləy məxsusə ehtırom iyən məhəbbətışon hestebe və əv bə mısılmınon dılon mahbubə şəxsi təbdil bıəbe.əv qıləy navəjənə pərhizkorə alim be ki,de məmur iyən valiyon bə milləti xoto,ciddi rəftor kardedəbe və çı milləti və bəy pənoh bardə kəson həx-huğuğon mıdofiyə kardedəbe….

Əllomə Bəhrani ıştə şərofətinə umrış de hədison cəm kardey,təshih iyən tərtibi koy məşğul be və hiçvaxti çı hədisi kitobi pəydu kardey iyən cəm kardey koyku onıqıne və dayima həmonə hədisə kitobon tənzim və tərtib kardeydəbe və bo hədisonku çok-çoki istifodə kardeyro ıştə dasto har har qıləy fırsətiku oko doydəbe.əv bənə Kərimə-Ğıroni ,etığodi usulon və islomi torıxi bıə mıxtəlifə islomi elmon mevzuonədə bıə əsəronış bə yodiqor noəşone ki,çəvon umumi mığdor 75 qılə zikr kardey bıə.çın pərhizkorə alimi elmi əsəron bo elmi dumo bıə kəson bənə qıləy dayirətul-maarifi və ensklopediyə hisob beydə və bəvon ziyodə mənfəət və xeyrış baxş kardə.çın yolə alimi çı İmomət və Məsumon(ə),çəvon hədison və çəvon xısusiyyəton və fəziləton həxədə həmməysə veyə əsəronış heste…..

Əllomə Bəhrani hədis iyən rivayi kitobon tədvinədə qıləy dəğiğ iyən məxsusə şivə və metodış hestebe.əv bo həzrəte Əli(ə) iyən co məsumə imomon imoməti isbot kardero,çı əhlı-sınnəti rəvoyətonku istifodəş kardə və Hədisi-Mənzilətış de əhlı-sınnəti sa qıləsə veyə alimi roy vositə və deçəvon qırd sənəd və kitobon bə ico zikrış kardə.Mənziləti-Hədis  İslomi alimon nəzdədə qıləy məşhurə hədise ki,İslomi əzizə peyğombəri(s) bəvədə həzrət Əli(ə) bəştə nisbətədə bıə vırə və məğamış bənə Haruni bə Mosə(ə) mislədəy.illah ki,çə həzrəti bəpeştə həni co qıləy peyğombər nibome.şiəyon bın bobədən ki,dıqlə nıbuvvət və şəcərə cəhəto bıvətisə əlovə xısləton,Haruni(ə) bə Mosə(ə) coqlə mənziləton həm heste ki,Əli(ə) həm bə islomi peyğombəri(s) nibətədə bıəşe.min cumlə çə həzrəti itoəti vocib bıey,vəzir bıey iyən himoyə, məhbubiyyət və bəsə cokəsonsə barzə səviyyədə bıey……