Şiiə yolə alimon-84

Əllomə Məclisi pı Muhəmməd Təği Məclisi Hicri-Ğəməri yonzəminə əsrədə jiyə şiyə məşhurə alimonku qıləyni bıə.qıləy alim ki,nəyinki,ıştən çı Əhli-Byeti(ə) məktəbi royədə erjinə xıdmətonışon bə vırə rosnə,bəlkəm çəybənə qıləy ali-ğədr və bərəkətinə vucud Şiyə dınyoədə çı qıləy bərəkətinə alimon səsilsiləş bina noe ki,çəvon har qıləyni bənə osmonədə dəvəşə astovə  çı Əhli-Beyti(ə) barzə maarifışon bə İslomi dınyo rosneşone.

Dəvardə bərnoməonədə ərz kardemone ki,İronədə de Səfəvi silsilə zuhuru və buruzi Təşəyyu məzhəb çın kişvəri rəsmi məzhəb elon kardey be və de ın tərtibi şiəyon de tosə qıləy ziyodə həddi oromətişon pəydu karde və bo Əhli-Byeti(ə) alimon qıləy çokə fırsət bəvə beşe ki,ta de dərs və bəhsi məclison təşkil doey,çın məktəbi həyğəton bəyji kardey bıbu.Muhəmməd Təği Məclisi həmonə alimon perəsə devronədə və 1003-ə Hicri-Ğəməri sori Səfəvi bə zəmon bıə poytəxtədə yəni İsfəhoni dıjd iyən ğəşənqə şəhrədə  bə dınyo çəşış oj karde.çəy pı Molla Əli Məclisi deştə fəzl iyən ədəbi məşhur be və çı hədisi raviyonku bə hisob omeydəbe.əy ıştə fərzəndış de şiəyon nəvminə İmomi eşği Muhəmməd Təği nomış noe və hejo çı hırdənətiku çı dini usulon iyən Şiyə məktəbi əğedəon bəy təlimış doe və əy deştə bə ico bə məclison bardedəbe…..

Muhəmməd Təği Məclisi bəştə alimə dədə alimonə tərbiyə iyən təlimon xoto,hejo həmonə hırdənəti soronku çoko ki,ıştə həmsor bıə əğılon cəmədə beyədə və jıqo de hənəki məşul bıənin bıə zəmonədə,de Kərimə-Ğıroni ayəon iyən rəvoyəton hırdənon moyizə kardedəbe və boəvon çı vəhışt iyən cəhənnəm və çı çokə ko iyən bevəcə ko soybon ağıbəti həxədə sıxan votedəbe. çəy alimə pı kardeyış zıne ki,jıqo qıləy pokə fərzənd hejo çı sıftəku de Əhli-Byeti(ə) zulol iyən pokə məktəbi oşnoko və çəy vucudədə çı təlim iyən kəmoli şovğış bə vucud vardeyış zıne. həmonə nəğş və rəsm ki,hırdənəti zəmonədə bə Muhəmməd Təği sofə dıli nışte və əvış qıləy məsir iyən royədə ğərolış doe ki,ıştə boho ğeymətinə umrış çı Əhli-Byeti(ə) məktəbi pokə royədə sərfış karde və çı Şiyə dınyo məşhurə alimonku qıləyni be…..

Muhəmməd Təği ıştə alimə pı palu elm iyən dini mığəddimə dərson omutey bəpeştə,çı isfəhoni dıjdə ustodon məhzərədə çəvon elmiku çok-çoki okoş doe və deştə pı rahnuma və roy nışon doey,bə zəmon Nəcəfı-Əşrəfi elmiyyə hovzəku bə İsfəhon mıhocirət kardə dıjdə alimonku qıləyni bıə  Əllomə Mevla Əbdullah Şuştəri palu bardeşe.Muhəmməd Təği çandə soron çın yolə ustodi palu dərsış omute və de fiğh,hədis,usuli-fiğh,kəlom iyən təfsiri elmi omutey məşğul be.çın yolə ustodi bəfoti bəpeştə de şiyə coqləyni yolə alim,arif və fəğih bıə şeyx Bəhayi oşno be və çın yolə alimi palu irfoni seyrış bino karde.Məclisi çı sıftəku bə irfoni elmi qıləy məxsusə rəğbətış hestebe və  de hovzədə rayic bıə elmi omutey ıştə bə həyğəton dast pəydu kardero demi bərtərəf kardedəbe.əv de şeyx Bəhayi  oşno bıey bədiqə ıştə qim kardə çiş pəydu karde. həmçinin şeyx Məclisi bənə Mirfendereski,Ğazi Əbus –Suru,Əmir İshoğ Əstərabadi,şeyx Əbdullah ibn Cabir Amili,Molla Ğasim Amili və sayirə alimon dərsi məclisonədə iştirokış karde və çın yolə alimon elmonku istifodəş karde….

Muhəmməd Təği Məclisi Hicri-Ğəməri 1034-ə sori qıləy zəmon ki,sivi I sinnış hestebe və intizor hestebe ki,əv hejo çı İsfəhoni elmiyyə hovzəonədə de tədrisi koy məşğul bıbu,əmmo əv bə Nəcəfı-Əşrəfi şəhri hicrətış karde.əv bə ğərol ome ki,ıştə nəfsoni tərbiyə irfoni səfə iyən bə kəmoli dərəcəon rəseyro.Nəcəfı-Əşrəfədə sakin be və çı Əmirəl-Muminin(ə) hərəmi civar və kəno de elmi təhsili koy məşğul be.