Şiiə yolə alimon-94

Əllomə Məclisi  çı naviku sarayədə fəsod iyən fısği-fucuri nufuzi proqnoz kardedəbe.binobərin çanədə mumkinbe ıştə ğudrətiku bo saray əhli miyono fısğo-fucuri vəy qəteyro cəhd kardedəbe. ım mıcohidə alim “hakimon de rəiyyəti rəftori ğaydə” nomo qıləy sodə kitobış nıvışteşe ki,çı həzrət Əli(ə) bə Malik Əştər Nəxəyi tevsiyəonku iborət bıə əhdnomə tərcumə və şərh be ki, adilonə hukmronəti formə barədə de co seqlə hədisi bəico be.Əllomə çın kitobi nıvışteyku hədəf “ğafilon oğo və devləti odəmon isloh kardey” bəyonış kardə.ım təğvanin iyən pərhizkorə alim de Səfəvi çoqlə podşo jimonış karde və bə Səfəvi şahon qıləy nığılə təsirış hestebe.bə həmonə dəlili xoto,bə İroni mısılmonə milləti zılm kardə və de fəsodi məşğul bıə saray odəmon  nəzorəti jiyədə oqətey və isloh kardero,çəy şifohi nəsyəton və bənə “hakimon de rəiyyəti rəftori ğaydə” kitobədə bıə isloh kardey ğaydəon vey təsirin bıə....

Navnə bərnomədə həm votemone ki,Əllomə çokonə de bıtpərəston mıbəlliğon mıborizə bardeydəbe və çəvon bıtonış darışte.Əllomə Məclisi mıborizə bardə dastəonku qıləyni həm sufiyon iyən deçəvon inhirofə əğedəon be.əv ıştə əsəronədə bə Sufiyon şıə roy və metodi işorə kardedəbe və çəvon de İmomiyyə Şiyə əndişə və təlimon bıə ziddiyyəton çok-çoki nışon doydəbe.həlbəttə muhimmə nuktə ıme ki,Əllomə Məclisi bənə şeyx Bəhayi  iyən Molla Sədra bıə Şiyə coqlə dıjdə alimon hiçvaxti de islomi əslə irfoni mıxolif bıənin.bəlkəm əv ıştən çı irfoni yolə şəxsiyyətonku bıə.əmmo de sufiyon iyən deçəvon inhirofə əğedəon mincumlə deçəvon bə dini hukmon rioyət nıkardey,bənə zikri həlğə.sima iyən diniku bə botıni meyli əsos təfsiri bıə ğeyri-şəri ayin iyən mərosimon rəvoc pəydu kardey və sayirə tənğıd kardedəbe....

De Əllomə Məclisi bə Səfəvi sultonon təsirinə hərəkəton vositə çın yolə alimi zəmonədə de tədbiri çı İroni de hamsuyə əhlı-sınnəti miyono hiç qıləy canq ya yavə rəftoron bə əməl nıome və çı şiəyon tərəfiku bə ironədə jiyə hiç qıləy əhlı-sınnəti toyfəon həmlə kardey nıbe və ironi məmləkəti insonon de komilə oroməti jimon kardedəbin.harçənd Səfəvi cıvonə şah qədə-qədə bə fırsət tələbon təsiri xoto bə mey iyən şərobxorəti tor eqıne və kişvər əməli surətədə çı dastiku xaric.əmmo çanədə ki,Əllomə Məclisi bəyji be və jimon kardedəbe,bə İroni kişvəri qıləy zərəl nırəse və ironədə çı har qıləy məzhəb və tərığəti tərəfdoron sulh iyən asayişi dılədə jimon kardedəbin.əmmo de Əllomə Məclisi Hicri-Ğəməri  1111-ə sori rəməzonə manqi 27-ə ruji rehləti və çı dınyoku şıey Səfəviyyə devləti suğut bino be....

Əllomə Məclisi ıştə boho ğeymətinə umri bəpeştə  yolə alimon təlim və tərbiyə və ərəbi və farsi zıvono çandə da qılə ziyodə dini təsirinə kitobon təlif və foydəninə kitobon tərcumə kardey və bo şiyə camiyə ziyodə bərəkəton və təsirinə əsəron noey bəpeştə Hicri-Ğəməri 1110-ə sori Rəməzonə manqi vistı haftminə  şəvi  sulton Huseyn Səfəvi səltənəti sıftədə hafto se sinnıdə çı dınyoku şe və isfəhoni şəhri Cami Məçitədə ıştə alimə pı yəni Molla Məhəmməd Təği Məclisi kəno dəfn kardey be.Məclisi aramqo çəy bəfoti zəmoniku de tobə ısət dayima əyo jiyə kəson və mısofir və bə İsfəhoni şəhri sıyohət kardə  bə mısılmonə milləti ziyorətqo təbdil bıə.....