Şiiə yolə alimon-95

De Əllomə Məclisi bə Səfəvi sultonon təsirinə hərəkəton vositə çın yolə alimi zəmonədə de tədbiri çı İroni de hamsuyə əhlı-sınnəti miyono hiç qıləy canq ya yavə rəftoron bə əməl nıome və çı şiəyon tərəfiku bə ironədə jiyə hiç qıləy əhlı-sınnəti toyfəon həmlə kardey nıbe və ironi məmləkəti insonon de komilə oroməti jimon kardedəbin.harçənd Səfəvi cıvonə şah qədə-qədə bə fırsət tələbon təsiri xoto bə mey iyən şərobxorəti tor eqıne və kişvər əməli surətədə çı dastiku xaric.əmmo çanədə ki,Əllomə Məclisi bəyji be və jimon kardedəbe,bə İroni kişvəri qıləy zərəl nırəse və ironədə çı har qıləy məzhəb və tərığəti tərəfdoron sulh iyən asayişi dılədə jimon kardedəbin.əmmo de Əllomə Məclisi Hicri-Ğəməri  1111-ə sori rəməzonə manqi 27-ə ruji rehləti və çı dınyoku şıey Səfəviyyə devləti suğut bino be....

Əllomə Məclisi ıştə boho ğeymətinə umri bəpeştə  yolə alimon təlim və tərbiyə və ərəbi və farsi zıvono çandə da qılə ziyodə dini təsirinə kitobon təlif və foydəninə kitobon tərcumə kardey və bo şiyə camiyə ziyodə bərəkəton və təsirinə əsəron noey bəpeştə Hicri-Ğəməri 1110-ə sori Rəməzonə manqi vistı haftminə  şəvi  sulton Huseyn Səfəvi səltənəti sıftədə hafto se sinnıdə çı dınyoku şe və isfəhoni şəhri Cami Məçitədə ıştə alimə pı yəni Molla Məhəmməd Təği Məclisi kəno dəfn kardey be.Məclisi aramqo çəy bəfoti zəmoniku de tobə ısət dayima əyo jiyə kəson və mısofir və bə İsfəhoni şəhri sıyohət kardə  bə mısılmonə milləti ziyorətqo təbdil bıə.....

Biharul-Ənvar ki,çəy komilə nom “Biharul-Ənvar,Əlcamiyə liduvəri əxbaril Əimmətil Əthar”(nuri dıyoon Əyimeye-Əthari(ə)sıxanon qovhəron şomil bıey mənoədəy) Əllomə Məhəmməd Bağır Məclisi həmməysə muhimmə əsər bə hisob omeydə və çı Şiyə hədisi dıjdə dayirətul-məarif iyən ensklopediyəy ki,qırd dini məsələon bənə torıx,fiğh,kəlom,Ğıroni təfsir və sayirə ıştədə ehtivo kardedə.ım kitob çı islomi azizə peyğombəre-əkrəmi(s) iyən çə həzrəti Əhli-Beytiku rəsə (ə) bə həşto penc həzo hədisi şomil beydə və çəy təlif 30 sor bə dırozi dəkəşe.Əllomə Məhəmməd Bağır Məclisi şoqirdonku idastə çın buzurquvarə alimi idorəçəti jiyədə çın erjinə əsəri bə ərsə rəseyədə ziyodə cəhdonışon karde...

Əllomə Məhəmməd Bağır Məclisi çı Biharul-Ənvar kitobi mığəddimə və vəsədə ıştə elmi təhsili mərhələ iyən mənəvi iyən ruhi təkamuli devroni və həmçinin ıştə bə hədisi elmi səmt bıə nəzə bəyon kardedə.əv de bə ıştə zəmonədə elmi camiyədə bənə ədəbi,fiğh iyən usuli.hikmət və fəlsəfə,kəlom iyən riyozi dəb bıə və rəvoc pəydu kardə elmon omutey işorə kardə votedə ki,çəy nəvə ruf çə həmonə rəvoc pəydu kardə elmonku sirob nıbe və ıştə bə həyği mərıfəti elmi ətəşış  və çı elmon nəticəon əvış bə həyğiyə  elm,mərıfət iyən hikməti zulolə sərçeşmə yəni Məsumin(ə) sıxanon iyən vəhyi səmt hidoyətış karde.

Əllomə Məclisi Kərimə-Ğıron iyən peyğombəre-əkrəmi(s) iyən çə həzrəti pokə Əhli-Beytiku(ə) rəsə hədison çı dini mərıfəti ğəbul kardə həmməysə muhimmə mənbə hisob kardedəbe.