Şiiə yolə alimon-96

Əllomə Məhəmməd Bağır Məclisi çı Biharul-Ənvar kitobi mığəddimə və vəsədə ıştə elmi təhsili mərhələ iyən mənəvi iyən ruhi təkamuli devroni və həmçinin ıştə bə hədisi elmi səmt bıə nəzə bəyon kardedə.əv de bə ıştə zəmonədə elmi camiyədə bənə ədəbi,fiğh iyən usuli.hikmət və fəlsəfə,kəlom iyən riyozi dəb bıə və rəvoc pəydu kardə elmon omutey işorə kardə votedə ki,çəy nəvə ruf çə həmonə rəvoc pəydu kardə elmonku sirob nıbe və ıştə bə həyği mərıfəti elmi ətəşış  və çı elmon nəticəon əvış bə həyğiyə  elm,mərıfət iyən hikməti zulolə sərçeşmə yəni Məsumin(ə) sıxanon iyən vəhyi səmt hidoyətış karde.

Əllomə Məclisi Kərimə-Ğıron iyən peyğombəre-əkrəmi(s) iyən çə həzrəti pokə Əhli-Beytiku(ə) rəsə hədison çı dini mərıfəti ğəbul kardə həmməysə muhimmə mənbə hisob kardedəbe...

Əllomə Məclisi Biharul-Ənvari kitobədə hədisonış bə rasional və bə qıləy mevzu əsos təğsım bəndi kardedəbe ta handə kəson və muhəğğiğon qıləy kamə zəmonədə həmməysə veyə bəhrə bıbon və çı har qıləy mevzu piyo bə mevcud bıə hədison qıləy kulliyə nəzə kardey bızıno.ım yolə alimsəy kardedəbe ki,Biharul-Ənvari kolleksiyə və məcmuəədə qırd dini məsələ və mevzuon ehtivo kardedə və bəvon ayid bıə hədison qırdəş karde.ım məcmuə de “ağl iyən cəhli” mevzu bino beydə və bə Xıdoşınosi iyən tohidi,İlahi ədoləti və peyğombəron torıxi ayid bəhson idoomə və dəvom pəydu kardedə......

Biharul-Ənvari kitobi coqlə xısusiyyətonku qıləyni ıme ki,Əllomə Məclisi çın dıjdə məcmuə har qıləy fəsli de mınosibə ayəon binoş kardə və har vırədə bə ayəon təfsiri ehtiyoc bıə,çı mıfəssir iyən təfsirəvonon nəzəş bəyon kardə.ayəon iyən təfsiri zikri bəpeşt,de həmonə mevzu əloğədor bıə hədisonış nəğl kardə və ziyodə vıronədə bə rəvoyəti şərhi işorə kardedə vəbo muxatəb iyən handə kəson fame və sərəseyro saxt və çətin bıə kəlməon izohış doə.əv çı rəvoyəton şərh və təfsirədə çı bənə luğət,təfsir,kəlom,torıx,əxloğ və sayirə mıxtəlifə mənbəonku okoş doə.ım şərhon çın muhiməmmə hədisi məcmuə və kolleksiyə imtiyozonku qıləyniye....