Rəşti şəhri vindəninə vıron

Qiloni ostani Rəşti şəhr bəştə coğrafi,ixtisodi,iştimoyi,fərhənqi iyən siyosi-idori şərayiti rəğmən qıləy muhimmə vırəş heste.çın şəhrıstoni sakinon umdətən de xıdməti,ticori iyən səney koon məşğulin.çımosnə əlovə çın məntəğə di camaati umdə fəoliyyəton tuməcorəti iyən bırz  kaşteye.

Im şəhrıston Kaspi dıyo şimoli 30 kilometriyədə qıləy hevujə colqoədə,cənubi tərəfiku de Ənəzli porti və şimoliku de Əlborzi bandı-ku silsilə əhotədəy.Rəşti şəhrədə çı voşi voye mığdor bə dıyo nez bıey dəlili xoto çı şimol-şərğiku Kaspi dıyo kulokon qıniyedə,əve bın şəhrədə ziyodə voş voyedə.çın şəhri iğlim kaspi metədilə həvosatış heste və tıvoston qam iyən zımıston metədil dəvardedə.Sipiyə ruku dıqlə xıçə de Siyahrud iyən Qovhər rud Rəşti şəhri şərğ iyən ğərbi tərəfiku cərəyon kardedə və nəhoyətən bə Ənzəli stili rubedə.....

Rəşti şəhri əsliyə sakinon qil nomo qıləy ğomv təşkil doydə ki,de farsi zıvoni iyən qiləki ləhcə qəp jeydən.torıxi mənbəonədə omə ki,ım şəhr de zumandə ehtımoli İslomi bənav həm mevcud bıə və çəy torıx bə Sasaniyon devrə oqardedə.İslomi devrədə de tosə Səfəviyyə sulolə zəmoni Rəşti şəhr jəqo həm qıləy hevujətiş nıbe.əmmo 2-ə şah Əbbosi zəmoniku de tobə Ğacariyyə sulolə hukuməti oxo,Rəşti şəhr bə qıləy dıjdə ticori şəhri təbdil be və bın şəhrədə kərvonon ıştə məhsulon de ın roy vositə bə Meditaranə dıyo vığandedəbin.ımruj həm Rəşti şəhr çı İroni muhimmə dıjdə şəhronku qıləyniye və çı İroni turistik iyən aqrar sənaye ğutbonku bə hisob omeydə.Rəşti şəhr həmçinin pulo(polad) dıjdə istehsoləkə və bə vəhm ya xərçənqi noxəşəti zidd damonon istehsol kardə ğutb bə hisob omeydə.bın şəhrədə bə nevbənev beməyon mevcudiyyəti xoto,həmçinin dıyo məhsulonku bəhrə bardey xoto və həmçinin bəştə kanə torıxi cəhəti xoto, Rəşti şəhr milsış nınbə xorəkon məskən həm məhsub beydə.bə kali statistik məlumoton əsos, Rəşti şəhrədə 170 nev məhəlli iyən lokalə xorəkon hozzı kardey beydə.çımonsə əlovə Rəşti şəhr qujdi mənbəonku istifodə kardey zəminədə həm ziyodə nevonış heste və bın şəhrədə çı mıxtəlif nev məhəlli qujdonku,vəhşiyə pərəndəon və həmçinin moyə xoərkonku  oko doey beydə.bəçəy xoto,Rəşti şəhr 2015-ə milodi sori bə Yunseko nəzorəti jiyədə de kreativə xorəkşınosi nomi bə dınyo kreativ və xəlloğə xorəki şəhron şəbəkə daxil be.bə Yunseko kreativə şəhron standardon əsos,Rəşti şəhr qıləy şəhre ki,çı şəhri stabilə inkişofədə şəhrvandon zumandəti iyən innovasiyəku oko doydə.Rəşti şəhr İroni yeqanə şəhre ki,de dınyo co 18 qılə şəhri bə ico xorəkşunosi zəminədə Yunsekoədə ğeyd bıə......

Rəşti şəhr şəhri reçinəti cəhəto ziyodə vindəninə vrıonış heste.memorəti uslubi cəhəto qıləy məxsusə vırəş heste ki,çəy barizə noxtə çın şəhri əsliyə meydon yəni Şəhrdori meydon ya Şuhəda meydondə mışohidə kardey bəbe.çın meydoni ətrofədə mevcud bıə binon ıştə devrə memorəti reçinəti nışon doydə.Şəhrdori meydoni ətrofədə ,şəhrdori imorət,poçt,milli kitobxonə  və həmçinin Cənqəli inğılobi ozodi tələb kardə rəhbər Mirza Kuçəkxani mıcəssəmə iyən heykəl mevcude.Şəhrdori imorət ya bina Həşi sori 1276-ə soriku de tosə 1305-ə soron soxtə bıə. Şəhrdori sipiyə bina çı Rəşti şəhri odəmi çəşi nəvaziş kardə və reçinə binonku bə hisob omeydə və ım həm ziyodə turiston dığğəti bəştə səmt cəlb kardedə. Saati ğullə çı Şəhrdori bina hissəonkuye ki,ğədimə zəmononədə bo milləti çı otəşi vəş qətey iyən coqlə xətər və təhlukəonku aqah kardeyro istifodə beydəbe.ımruj həm ha nim saatədə ikərə ım saat zanq jeydə və milləti çı ruji zəmoniku xəbədo beydə.ım saati ğullə 24 metrə bılındiş heste ki,ım ğullə de Rəşti şəhri simvoli nomi məhsub beydə.Rəşti şəhri kanə kəon kali qıləyni həm memorəti,nəğğoşəti ya rəssoməti cəhəto və həmçinin kərpici rəssoməti ziyodə erjış heste və qıləy muhimmə əsəronku bə hisob omeydə.bəçəy xoto ım binon bənə mıədəni ya fərhənqi irisi nomi ğeyd kardey bıə.....