Şiiə yolə alimon

 Seyd Bəhrul-Ulumi şeer və ədəbiyyoti sahədə qıləy fevğaladə məhorətış hestebe və çəy fiğh, usul iyən ricali boho ğeymətinə əsəronədə bıə şeeron çəyku bə yodiqpr mandə.Əllomə Bəhrul-Ulum çı fiğh iyən usuli muhim iyən mırəkkəbə bəhsonədə mohir bıə holədə,şeer və ədəbiyyotədə həm qıləy çokə zevğış bıə və nəzmi şikilədə çandə sa qılə beytonış nıvıştə.ım ko nəyinki,bə dərsi saqninə mətləbon və məfhumon rəyrə omutey boyis beydə,bəlkəm bə nışon doə bıə ım ğolibi xass və məxsusəti dəlili xoto,bə həmonə bəhson dırozə zəmononədə mandemoni həm komək kardedə.çoko ki,Seyd Bəhrul-Ulumi şeeri sahədə nıvıştə mənzuməon ijən çı elmiyyə hovzə ustod iyən tələbəon tərəfiku ğəbul bıə və bə xoş omə şeeri kolleksiyə bə hisob omeydə.çəy bənə İslomi etığodon bıə coqlə məsələonədə həm çokə şeeronış bıə ki, çəvonku qıləyni ərəbi zıvono bə Şəhidon əğə imom Huseyni(ə) məxsuse.....

Seyd Bəhrul-Ulumi  jimoni ibrətamizə hikoyətonku qıləyni çın yol və diyəro vində alimi Hicri-Ğəməri 1193-ə sori bə vəhyi sərzəmin bıə Hicazi kardə səfəy.əv Hicazədə ıştə məzhəbış yəni təşəyyu məzhəbış məxfi oqətə və ta bədxahon iyən tanzə nəzə soybon şərriku bə diyəro de elmi bəhson məşğul bıbu.umumi millət və elmi şəxsiyyəton çın yolə alimi huzuriku ziyodə xoşhol beydəbin və Əllomə  Bəhrul-Ulumi çoko ki,bo elmi bəhson kardey iyən votemoniro jıqo qıləy çokə şərayitış mışohidə karde,əve dı sor Hicazədə mande və de elmi bəhson koy məşğul be. çun əv bə əhlı-sınnəti fiğhi bıə qıləy zumandə təsəllut və çın yolə alimi xoşə rəftori joqo bə həmonə diyori sakinon məxsusən bə elmi əhli qıləy mısbətə təsirış noəbe ki,haruj ziyodə insonon və alimon boçəy vindero iyən çəy elmi bəhsonədə iştirok kardero bəçəy səmt hərəkət kardedəbin və çəy məhzəriku feyz kəsb kardedəbin.odəmi dığğəti cəlb kardə nuktə ıme ki,İslomi məzhəbon tərəfdoron har qıləyni Seyd Bəhrul-Ulumi ıştə məzhəbi tərəfdor hisob kardedəbin və çəy elmi dərson həm bə çoqlə məzhəbi kəlomi elmi əsos bərpo beydəbe......

Əllomə Bəhrul-Ulum ıştə Məkkədə mandə zəmoni oxonə rujonədə ıştə məzhəbış oşko karde. çoko ki,Əllomə Bəhrul-Ulumi şiyə bıey Hicazədə pevolo be,co məzhəbi kali təəssıbinə fərdon deəy bəhso-cidolışon bino karde.əmmo Əllomə deştə elmi dıyo çəvon qırd elmi bəhsonədə səbarz beşe və ziyodə insononış bə həyğiyə islomi səmt cəzb kardeyış zıne.hətto çı Məkkə şəhri sınniyə cımə imom 80 sinninə  alim oqarde Şiyə məzhəbış ğəbulış karde Seyd Bəhrul-Ulum ıştə Məkkədə bıə zəmonədə coqlə erjinə koonış həm karde.min cumlə əy çı Həcci mərosimi dəğiğə məğamış təyin iyən təsbitış karde və çı Şiyə ım yolə alim de Miğati nomi məşhur bıə vırədə ehram basteyış təyin karde və həmçinin çı Həcci fərizə səhih zınə muhimmə coqlə məkononış həm mıəyyənış karde.həmçinin Əllomə Bəhrul-Ulum qıləy tədbirış həm vinde və Məscidul-Hərami bina sığış jıqo əvəzış karde ki.bə Şiyə fiğhi əsos bəy səjdə kardey səhih bıbu....

Seyd Bəhrul-Ulum ıştə bərəkətinə umri oxoyədə bəştə cismi noxəşəti xoto i mıddət bo tədrisiro ğudrərətış nıbe və ıştə kə və mənzilədə de mıtoliyə iyən kitobon təlifi koy məşğul be.nəhoyətən Şiyə dınyo ım yolə alim Hicri-Ğəməri 1212-ə sori  Zilhiccə ya Rəcəbə manqi  24-ə ruji bə baği iyən əbədiyə dınyo səfə iyən kuçış karde.bəle,çın mislış nıbə yolə alim iyən arifi zərrinə jimoni dırozi fəğət 57 sor be.Seyd Bəhrul-Ulumi bəfoti qıləy nığılə təsirış noe və Şiyə dınyoş bə matəmi ğərğış karde.çın yolə alimi pokə bədəmisə qıləy əzəmətinə  nımoj handey bədiqə,Nəcəfı-Əşrəfədə və çı şeyx tusi mərğədi kənoədə dəfn kardey be.əmmo Seyd Bəhrul-Ulumi  erjinə əsəron iyən təlif kardə kitobon hiçvaxti çı viro və yodo bekardey nıbe.əla innə.....