Şiiə yolə alimon-103

Əllomə Bəhrul-Ulum nəyinki,çı Şiyə camiyə və elmiyyə hovzədə rəyisəti koyədə qıləy məşhurə şəxs be,bəlkəm,çı İslomi əxloğiku qləy komilə nımunə be və bo camiyə qıləy dini jimoni səpkış bə təsvirış kəşəbe.ım məşhurə alim bəştə mənəvi,təğva iyən irfoni dərəcəon dəlili xoto,çı Şiyə alimon palu fevğəladə ehtıromi soyb be.joqo ki,əvon çəy məğam və dərəcə bə isməti məğami ne həm hisob kardəşone.Seyd Bəhrul-Ulumi əxloğ iyən rəftor bə tarif iyən təğdıri loyığ be.çəy təvazu iyən sodəti çı umumməxloği ğəbul kardə rəftor be və eyni holədə çəy qıləy məxsusə heyət və cozibəş hestebe.çəy bə ehtiyocinə şəxson iyən səfilon qıləy məxsusə mərhəmət və mehribonətiş heste.əv kam sıxan votedəbe və ziyodə sukut kardedəbe və dayima təfəkkur iyən əndişə kardə holədə be.ehanə qıləy sıxan həm votedəbe,de Xıdo zikri bə ico be.ruji dırozi ıştə dərsi məclisonədə çı mısılmınon muşkilaton bərtərəf kardedəbe və bəşəvnəy həm mutaliyə iyən ibodəti koy məşğul be.çəy harde-hıtey vey kam be və vey vaxti şəvi nimədə Nəcəfi şəhri kuçonədə piyodə nəveydəbe və sıbi mınocoti zəmonədə ıştəni bə Kufə məçiti rosneydəbe.peşo sıbi nımoji bərpo kardey bədiqə bə Nəcəf oqardedəbe və çı har koy bənav bəştə buzurquvarə pı  və cəddi Əmirəl-Muminin Əli(ə) hərəm şeydəbe....

Əllomə Bəhrul-Ulum İslomi elmonədə mahirətisə əlovə,coqlə dini etığodon usul və mənbəonku çokə aqahətiş hestebe və həmonə ko səbəb be ki,bo İslomi həxətə isbot kardero de həmonə cərəyonon və mıxolifon mınozirə və elmi bəhson dəvordıneydəbe.min cumlə çı Əllomə Bəhrul-Ulum de yəhudi alimon elmi bəhse ki,torıxədə deçəy cuziyyot və detalon ğeyd kardey bıə.çın mınozirə mehtəvo və məzmun vey vaxti bənə Məsumə-İmomon(ə) de yəhudi iyən məsihi alimon kardə elmi bəhson be ki,ısət ımon qıləy kitobi ğolibədə de həmonə nomi nıvıştey bıə.macəra çımiku iborət be ki,Əllomə Bəhrul-Ulum deştə duston iyən şoqirdon bo İmom Huseyni(ə) ziyorət kardero bə çı Nəcəfiku bə Kərbəlo şəhri səmt hərəkətışon karde.əvon roy nimədə bə Zulkifl ğəryə və di rəsin ki,çəy sakinon yəhudiyonku iborət bin.əvon ki,çı seyyidi alicənobəti iyən şərofətiku aqah bin,əve əvon cəmbin de ın yolə alimi vindemon kardero bəçəy mandə kərvonsəro omin.seyyid həm de xoşə dimi bəçəvon və beşe və əvonış ğəbul karde.yəhudi alimonku dı nəfər ki,əyo cəm bıəbin,çandə qılə məbhəsonku bəhs kardeşone və dılışon hestebe çı Əllomə istidlolon bıməson.Əllomə Bəhrul-Ulum  de səbr iyən hovsələ iqlə-iqlə bəçəvon sıvolon cəvob doydəbe və çı yəhudi alimon sıvolon mığobilədə dəparseşe ki,çı yəhudiyon ziddiyətonış boəvon ruşin və məlumış karde.ım məbhəson vey vaxti çı Tovrati təhrifoton,həzrəte Muhəmmədi(s) həğğaniyyəti və de İslomə dini omey əmandə dinon nəsx və ləğv bıəy barədə bıə bəhson be.....

Əllomə Bəhrul-Ulum ıştə ım mınozirəon iqlə baxşonədə bə yəhudiyon sıvol və şubhəon dəğiğə formədə cəvob doey bəpeştə jıqo voteşe:din iyən məzhəbi barədə bəştə pı iyən əjdodon itoət məkənən və ıştə təəssıb iyən xudbinətiku dast bıkəşənən.zira ım dınyo foniye və hakəs maqi şərbəti bəçaşte.ağılmand iyən huşinə şəxs əve ki,ıştə məzhəbi əğedəon de burhan iyən dəlilon dərkko.zira,məğul iyən ğəbul bıənin ki,qırd din iyən məzhəbon iqlə zəmonədə bərhəx bıbon. çən,bəpe har qıləy ağılmandə inson səyko çı mıxtəlifə dinon miyono ıştə din və məzhəbi çok-çoki bızıno və əy ğəbulko.şək ni ki,maşkinə ğıyoməti dıjdə ruji ım uzr ğəbul nibəbe ki,inson bıvoto:əmə ıştə din iyən məzhəbədə bəştə pı iyən əjdodon təbəiyyət kardemoen və bəvon pemanimon.əgər jıqo bıbu,bəpe bıtpərəston və otəşpərəston həm nicot pəydu bəkardeyn və əvon həm bərhəxin.peşo Əllomə Bəhrul-Ulum bə həmonə ğovmi yolon dimış qəte və voteşe:tı ki,çın qrupi yol məhsub beydəş,aya de tosə ısət bo həxı bə dast vardero qıləy cəhdı kardə?əy voteşe:insofən jəqo qıləy fikədə bıənim və çı həzrəte Muhəmmədi(s) həxədə hiç qıləy təhığotım bardəni.əmmo sıət fikım heste bın barədə mıtoliyəkom və və ıştə mıtoliyə nəticəon bəşmə nışon bədom.torıxədə omə ki,ım dastə yəhudiyon peşo islomışon varde və çı rostəvıj iyən dırsıstkorə mısılmononku bin......