Şiiə yolə alimon-104

Əllomə Bəhrul-Ulum ıştə ım mınozirəon iqlə baxşonədə bə yəhudiyon sıvol və şubhəon dəğiğə formədə cəvob doey bəpeştə jıqo voteşe:din iyən məzhəbi barədə bəştə pı iyən əjdodon itoət məkənən və ıştə təəssıb iyən xudbinətiku dast bıkəşənən.zira ım dınyo foniye və hakəs maqi şərbəti bəçaşte.ağılmand iyən huşinə şəxs əve ki,ıştə məzhəbi əğedəon de burhan iyən dəlilon dərkko.zira,məğul iyən ğəbul bıənin ni ki,qırd din iyən məzhəbon iqlə zəmonədə bərhəx bıbon. çən,bəpe har qıləy ağılmandə inson səyko çı mıxtəlifə dinon miyono ıştə din və məzhəbi çok-çoki bızıno və əy ğəbulko.şək ni ki,maşkinə ğıyoməti dıjdə ruji ım uzr ğəbul nibəbe ki,inson bıvoto:əmə ıştə din iyən məzhəbədə bəştə pı iyən əjdodon təbəiyyət kardemone və bəvon pemandimon.əgər jıqo bıbu,bəpe bıtpərəston və otəşpərəston həm nicot pəydu bəkardeyn və əvon həm bərhəxin.peşo Əllomə Bəhrul-Ulum bə həmonə ğovmi yolon dimış qəte və voteşe:tı ki,çın qrupi yol məhsub beydəş,aya de tosə ısət bo həxı bə dast vardero qıləy cəhdı kardə?əy voteşe:insofən jəqo qıləy fikədə bıənim və çı həzrəte Muhəmmədi(s) həxədə hiç qıləy təhığotım bardəni.əmmo sıət fikım heste bın barədə mıtoliyəkom və və ıştə mıtoliyə nəticəon bəşmə nışon bədom.torıxədə omə ki,ım dastə yəhudiyon peşo islomışon varde və çı rostəvıj iyən dırsıstkorə mısılmononku bin......

Əllomə Bəhrul-Ulum çoko ki,ıştə nəfsi təzkiyə iyən tərbiyə piyo de ciddiyyəti ko kardedəbe,çəy nəzorəti jiyədə elm omutə kəson həm bə ım foydəninə ko səmt dığğət doydəbe.Nəcəfi elmiyyə hovzə dıjdə ustod dayima hejo ıştə tələbəon bo şəvi nımoji voteyro tərğib iyən təşviğ kardedəbe. hətto nəğl bıə ki,iruj ın yolə alimi ıştə dərsi klasış çəy tələbəon bə şəvi nımoji bedığğətəti kardey xoto,tətilış karde və bəvon xitob kardə holədə voteşe:çıro az bəşəvnəy şəvi nımojonədə şımə nol iyən bəme məseydənim?çəy ım sıxani bə tələbəon veyə təsirış karde və əvon çə rujiku bə şəvi nımoji səmt tdim qəteşone.çoko ki,ım əxloği hodisə iyən təhəvvul tələbəonədə bə əməl ome,ım buzurquvar iyən yolə alim ijən sənibəton ıştə tədrisi koyış bino karde.

Şəvi nımoj ki,fəzilətış ziyod bıə nımojonkuye və mıxtəlifə hədis iyən rəvoyətonədə bə ım bərəkətinə nımoji handey veyə sıforış bıə.şəvi nımoj həmməysə muhimmə mıstəhəbbi nımojonkuye ki,11 rıxətış heste və çəy vaxt şəvi nimədə de tosə sıbi zəmoniye.bə “və minəlleyli......” ayə əsos şəvi nımoj bə peyğombəre-əkərmi(s) vocib iyən bə co milləti mıstəhəbbe.rəvoyətonədə bəçəy əhəmiyyəti veyə təkid bıə və əv çı mumini şərəf,ruji qınon kəfforə,ğəbi vəhşəti bərtərəfəkə və ruji zamin elon kardey bıə və tevsiyə bıə vəxt dəvardə zəmonədə çəy ğəzo handey bıbu.....

Əllomə Bəhrul-Ulum bə ehtiyocinə fərdon koon rəsey barədə  ziyodə hekoyəon nəğl bıə.əv bənə ıştə cədd Əmirəl-Muminin Əli(ə) azuğə və nunə kison bəştə kul noydəbe və şəvi nimədə  Nəcəfi kuçonədə hərəkət kardedəbe və çı fəğırə insonon kəon bə kəno noydəbe və hətto çə azuğə kison sape tikəy pul həm noydəbe.Əllomə şəvon qıləyniyədə ıştə məşhurə şoqirdonku qıləyni vanqış je və de şiddəti bəy tehmətış je və sə-sıxanış karde ki,boçi ıştə fəğır iyən ehtiyocinə hamsuyə holiku xəbədo niş? Əllomə Bəhrul-Ulum bəştə şoqirdi voteşe ki,ıştə fəğır və dastış təy bıə hamsuyə vəşyan və şamqonə nıhardə holədə hıtə,əmmo tı bəçəbvon holi rəsəniş. həmonə şoqird de xəcolət kəşə holi iyən uzrxahəti ərzış karde ki,çımı çəvon vəzyətiku xəbəm bıəni.Əllomə voteşe:məlume ki,ıştə çəvonku xəbə bıə ni.çun ehanə çəvon holiku aqah bıəbiş və ımi zıne-zıne şamqonə hardəbe və bəy etıno kardə nıbe,tı bəvədə kofir əviş.əmmo mıni norohət və niqəron kardə çi ıme ki.tı çıro ıştə mısılmonə bıvəku qıləy xəbə ni?bəpe tı ıştə dini bıvon holiku xəbədo bıbuş və bəvon koməkkoş.əllomə de xorək iyən puli pur bıə siniş doe bəştə şoqirdi və çəyku tələbış karde ki,bə həmonə muminə bıvə kə bışo və deəy bə ico xorək bıho və ıştə hamusyə ğarzon pərdaxtko,bıdo.....