Şiiə yolə alimon-105

Əllomə Bəhrul-Ulum bə ehtiyocinə fərdon koon rəsey barədə  ziyodə hekoyəon nəğl bıə.əv bənə ıştə cədd Əmirəl-Muminin Əli(ə) azuğə və nunə kison bəştə kul noydəbe və şəvi nimədə  Nəcəfi kuçonədə hərəkət kardedəbe və çı fəğırə insonon kəon bə kəno noydəbe və hətto çə azuğə kison sape tikəy pul həm noydəbe.Əllomə şəvon qıləyniyədə ıştə məşhurə şoqirdonku qıləyni vanqış je və de şiddəti bəy tehmətış je və sə-sıxanış karde ki,boçi ıştə fəğır iyən ehtiyocinə hamsuyə holiku xəbədo niş? Əllomə Bəhrul-Ulum bəştə şoqirdi voteşe ki,ıştı fəğır və dastış təy bıə hamsuyə vəşyan və şamqonə nıhardə holədə hıtə,əmmo tı bəçəvon holi rəsəniş. həmonə şoqird de xəcolət kəşə holi iyən uzrxahəti ərzış karde ki,çımı çəvon vəzyətiku xəbəm bıəni.Əllomə voteşe:məlume ki,ıştı çəvonku xəbə bıə ni.çun ehanə çəvon holiku aqah bıəbiş və ımi zıne-zıne şamqonə hardəbe və bəy etıno kardə nıbe,tı bəvədə kofir əviş.əmmo mıni norohət və niqəron kardə çi ıme ki,tı çıro ıştə mısılmonə bıvəku qıləy xəbə ni?bəpe tı ıştə dini bıvon holiku xəbədo bıbuş və bəvon koməkkoş.əllomə de xorək iyən puli pur bıə siniş doe bəştə şoqirdi və çəyku tələbış karde ki,bə həmonə muminə bıvə kə bışo və deəy bə ico xorək bıho və ıştə hamusyə ğarzon pərdaxtko,bıdo.....

Bo Əllomə Bəhrul-Ulumi nəğl bıə kəroməton miyono,bəsə həmmə qıləyniyə ğəşənqə qıləyni çəy de Vəliyyi-Əsri(əc) bıə vindemonone və çəy şərhon metəbərə kitobonədə omə.Ğeybəti zəmonədə de İmom Zəmoni(ə) muloğot iyən vindemon fəğət bo İlahi ovliyaon mumkine və əvon ım dıjdə sırron de tosə ıştə umri oxo ıştə sinəonədə məxfi oqəteydəbin və çəvon əmin iyən pərhizkorə kamə veynezə odəmon çımiku aqah beydəbin.binobəərin harçənd Ğeybəti zəmonədə de həzrət Sahibul-Əmri vindemon kardey nomumkin ni,əmmo bəpe zıney bıbu ki,çı mənfəəti dumo bıə kali fərdon mevcude ki,duyədə ıştə de Məsumə İmomon(ə) vindemoni barədə sıxaan votedən və de ım iddio vositə əvon boştə qıləy şehrət pəydu kardedən ta çı milləti noaqahətiku suyi-istifodəkon və əvon ıştə maddi mənfəəton dumon.əmmo de Xıdo-Huccəti vindevoni həlovət iyən şinəti çaştə yolə şəxsiyyəton ıştə jimoni devronədə ım dıjdə sırrışon puşniyə və oşkoşon kardəni.Əllomə Bəhrul-Ulum çə həmonə yolə şəxsiyyətonku be ki, çəy de İmom Zəmoni(ə) vindemoni xəbə çı sadığ iyən əminə alimon palu bə təvatur rəsə  və jıqo məşhure ki,ın yolə alim qahi vaxti ıştə elmi muşkilot iyən sıvolon  çəvobi sıeyro bə həzrət Sahibul-Əmri huzuri mışərrəf bıey bəpeştə dəparsedəbe və ıştə cəvobi ğəbul kardedəbe....

Cəfər ibn Xızr bin Yəhya Cənaci Hilli Nəcəfi de Şeyx Cəfər Nəcəfi,Kaşifuıl-Ğita,Şeyx Cəfər Kəbir və Şeyxul-Məşayix  ləğəbon  məşhur bıə Şiyə ın yolə alim  və mərcəye-təğlid Hicri-Ğəməri senzəminə əsrədə bə dınyo omə və əv çı Əllomə Vəhid Behbəhani iyən Əllomə Bəhrul-Ulumi məşhurə şoqirdonku bə hisob omeydə və Əllomə Bəhrul-Ulumi bəfoti bəpeştə Şiyə mərcəiyyət və rəhbərəti məsələş bəştə ehdəş peqəte.

Şeyx Cəfər Kaşifuıl-Ğita Hicri-Ğəməri 1154-ə sori Nəcəfı-Əşrəfi mığəddəsə şəhrədə bə dınyo çəşış oj karde.çəy nəsəb və şəcərə bə Əmirəl-Muminin Əli(ə)  ləşkəri bəfodor iyən zumandə fərmonədə Malik Əştəri rəseydə. Çı Şeyx Cəfəri pı Xızr nomış hestebe və ıştə rujiqori alim iyən zohdionku bə hisob omeydəbe.