Şiyə dınyo yolə alimon-170

Mirza Muhəmməd Təği Şirozi Hicri-Ğəməri 1338-ə sori qıləy holədə ki,çəy de bərəkəti pur bıə umriku həşto sor dəvardedəbe,çı mıəborizən qıləy nuyə prosesış bino karde.Dıminə Mirza Nəcəfı-Əşrəfədə çı alimonku I dastə,çı əşirəon yolon iyən Miyonə Furati rəhbəronış bə qıləy məhrəmonə iyən məxfiyə iclosi dəvətış karde.əvon həmonə cələsədə bə ğərol omin ki,de istemorə inqilistoni mıborizə bardeyro qıləy nuyə mərhələ ojkon.çın hədəfi cəhətədə Mirza Muhəmməd Təği Şirozi de qıləy fətvo çı inqilistoni ğəyyuməti jiyədə ko kardeyış bo mısılmınon həromış hisob karde.çın fətvo bədiqə ziyodə koəvonon ıştə idoəronku istefo doşone və de zəmoni dəvarde ım proses ziyod be.Dıminə Mirza bə İraği kişfəri mısılmınon qıləy noməş nıvışte və əvonış bə sulhamizə mitinqon bərpo kardey səmt dəvətış karde.Əv çı millətiku tələbış karde de bə əmniyyət iyən oroməti rioyət kardey,ıştə tələbon min cumlə İslomi Respublikə bərpo kardey və həmçinin çı İraği məmləkəti istiğlol və suverinəti tələbkon.

Deməkə ki,ım etırozinə mitinqon sulhamiz be,əmmo ingilisə hərbiçiyon çı millətiku I nəfərışon de qullə vositə jeşone və ım ko boyis be ta çı İraği yolon iyən alimon bə istemorə inqilistoni zidd ıştə etırozon dıminə devrə binokon.Dıminə Mirza həm de qıləy nomə çı alimonku tələbış karde ki,çı milləti həxə tələb kardeyədə çı hiççiku tarsışon nıbu.bın mıborizəonədə çı Dıminə Mirza fərzənd həm de coqlə yonzə nəfər mıborizi dastqir kardey bə dərbədər kardey bin.de ın holi ijən Dıminə Mirza çı istemorqərə inqilistoni mığobilədə təslim bıeyış hərom elonış karde və hətto qıləy vırədə ıştə silohi cihod bardey koyış həm elonış karde……

Bilaxirin inğılıbiyun səbarz bin Kərbəlo şəhri çı inqılıstoni sultəku xarickon.Dıminə Mirza de surəti bo ın şəhri idorə kardero dıqlə məclisış təşkil doeqıləyni Canqi Ali Məclis və coqləyni Elmi Məclis.sıftənə qıləyni şəhrədə və ətrof roon əmniyyəti bərğərol kardey məsuliyyətışon hestebe və dıminə qıləyni bə dini məsələon iyən milləti mubahisəynə məsləon bərtərəf kardey koş bəştə ehdəş peqətəbe.de ın tərtibi çı Dıminə Mirza nəzədə bənə İslomi hukuməti unvoni qıləy qədə nımunə təşkil kardey və tosə qıləy həddi icro kardey be.

Çın səbarzəti bəpeştə fəğət dı manq dəvardə be,Hicri-Ğəməri 1338-ə sori qıləy holədə ki,həşto sınninə Mirza bənə qıləy həyəconinə cıvoni ıştə de inqılıstoni bıə mıborizəş bəçəy ovc iyən pik həddi rosnəşbe,şubhəninə tərzədə bəfotış karde.kali fərdon bın bovədən və jıqo hisob kardedın ki,çı inqılstoni amilon bəy zəhr doəşone və ın yolə alimışon bə şəhodəti məğami rosnəşone. Dıminə Mirza pokə bədəm çı İmom Huseyni(ə) pokə hərəmədə dəfn kardey be və millət bəştə şucoətin iyən alimə rəhbəri çı dasto doey xoto bə ğəm iyən matəmi ğərğ bıəbin…..

Molla Məhəmməd Kazım Xorasani

İminə Dınyo Canqi bino bıeyku təğribən nəv sor bənav,ironədə muhimmə siyosi hodisəon bə əməl omeydəbe.çı İminə Mirza Tənbaku təhrim və hərom kardey və milləti mıxtəlifə təbəğon de istemorqərə inqılısıtoni mıborizə bardeyədə mıtəfiğəti iyən ibemoni koyədə dıjdə şahko iyən şedevrəti,İroni millət ki,çın ibemoniku qıləy xoşə xotırəşon hestebe,muştoğonə formədə de Ğacari sultonon istibdod iyən zılmon mıborizə bardey iyən bə ədoləti rəseyro coqlə ibemoni tələb kardedəbin.

Ğacari şahon ki,çı İroni rəiyyəti coni iyən sərvəti soyb zıneydəbe,hiç qıləy diroyət iyən ağl nıbə holədə ıştən-boştə de xariciyon muomilə kardey ğərolış bekarde və əcib-ğəribə imtiyozon bə Avropə iyən inqılstoni doydəbe.Ğacari şahon besərıştəti haruj çı milləti fəğrəti iyən bədbəxtəti ziyod beydəbe və həmonə ko boyis be millət Tehronədə hevujə şikilədə etırozon dəvordınon.de ın ədolət tələbə etırozinə nımoyişon mıborizə bardero,çı Ğacari şahon bə repressiyə iyən hoziyəti dastışon ğande və hətto millətışon ğətlı-am həm kardeşone.Tehroni alimon de etırozi nışonə bə Ğom şəhri şin və çı Həzrəte Məsumə(s) hərəmədə etıozinə aksiyəşon dəvordıne. əvon çı qıləy Ədolətxonə təsis kardey tərəfdor bin.qıləy ədolətxonə ki,məsul şəxson min cumlə şah həm bəpe bə İslomi hukmon iyən mısılmınon həxon rioyət kardənin be……