Şiiə yolə alimon

Ğacari şahon ki,ıştəni çı İroni rəiyyəti coni iyən sərvəti soyb zıneydəbe,hiç qıləy diroyət iyən ağl nıbə holədə ıştən-boştə de xariciyon muomilə kardey ğərolış bekarde və əcib-ğəribə imtiyozon bə Avropə iyən inqılstoni doydəbe.Ğacari şahon besərıştəti haruj çı milləti fəğrəti iyən bədbəxtəti ziyod beydəbe və həmonə ko boyis be millət Tehronədə hevujə şikilədə etırozon dəvordınon.de ın ədolət tələbə etırozinə nımoyişon mıborizə bardero,çı Ğacari şahon bə repressiyə iyən hoziyəti dastışon ğande və hətto millətışon ğətlı-am həm kardeşone.Tehroni alimon de etırozi nışonə bə Ğom şəhri şin və çı Həzrəte Məsumə(s) hərəmədə etıozinə aksiyəşon dəvordıne. əvon çı qıləy Ədolətxonə təsis kardey tərəfdor bin.qıləy ədolətxonə ki,məsul şəxson min cumlə şah həm bəpe bə İslomi hukmon iyən mısılmınon həxon rioyət kardənin be……

Im devron de qıləy zəmoni təsadufış karde ki,İrağədə çandə qılə mərace mıştərəkə formədə çı İslomi camiyə rəhbərəti koşon bəştə ehdə peqətəşonbe çın məraceonku .dı nəfər çın inğılobi mığobilədə qıləy tafutinə mevğıyyətışon qəte.Axund Xorasani çın məraceonku qıləyni be ki,de şiddeti bın bovədə be ki,hejo çı sıftəku bəpe mıəyyən bıbu ki,Milli Şura Məclis ğanun noə orqan ni,bəlkəm İslomi ğanunon icroəkə onemone.əmmo Axund Xorasani çın hərəkəti əsl iyən prinsipi bo sultanon zılm iyən sıtəmi məhdud kardero qıləy vəsilə zıneydəbe.binobərin harçənd çı koy xətər iyən təhlukəku aqahətiş hestebe,əmmo de hərəkəti prinsipi mufaiğ be.əv bın millətiku iborət bıə hərkətətədə şirkət iyən iştiroki çı vociboatonku hisob kardedəbe.

Axund Xorasani de həmonə Molla Muhəmməd Kazım Xorasani ki,Hicri-Ğəməri 1225-ə sori Məşhədədə bə dınyo oməbe,çı Mirzaye Şirozi məşhurə şoqirdonku be və çı alimon miyono qıləy barzə məğamış hestebe.əv çı İminə Mirzaye Şirozi bə Samirra şəhri hicrəti bəpeştə əməli surətədə çəy Nəcəfı-Əşrəfədə bıə canişin be və çı Mirza şoqirdon bəçəy tevsiyəon əsos çı Axund Xorasani dərsonədə iştirok kardedəbin.Molla Muhəmməd Kazım Xorasani elmiyyə hovzədə dərs iyən tədrisiə əlovə,dayima bə İroni islomi camiyə iştimoyi iyən siyosi məsləon dığğət kardedəbe.əv bənə ıştə ustodi bo ədoləti bəğərol kardey iyən məzlumon nicotiro fik iyən səy kardedəbe.həmonə norohətçətiyon səbəb be ki,Məşrutiyyə Səltənəti çı səltənətiku vey çok bızıno ki,de hiç qıləy vəchi ğanuni ni.

Axund Xorasani iyən çəy duston de Məşrutə tələb kardə kəson bə ico bıey,boyis be ım inğılob qıləy kırtə mıddətədə bə səbarzəti bırəso.de ın tərtibi vıjnemoni bərpo kardey bəpeştə Məşrutə İminə Məclis Hicri-Şəmsi 1285-ə sori yəni Hicri-Ğəməri 1324-ə sori ıştə koş bino karde.......

Məşrutə Məclisi təşkili bəpeştə Əsosə Ğanun ya Konsutsiyə nıvıştey vəzifəşon bıə qıləy Komitə təşkil be ki,bə İslomi Hukmon dığğət nıkardə holədə,Ğanunonış bə Belçika iyən Fransə insoni iyən humanistə ğanunon əsos hozzışon karde və ım ğanunışon bə şah imzo rosneşone.ım həmonə çi be ki,Molla Muhəmməd Kazım Yəzdi(Muhəğğiğ Yəzdi) çəy barədə çəşnavi doşone. bilaxirin Nəcəfı-Əşrəfiku çı de Muhəğğiğ Yəzdi rahnuma iyən ro nışon doey və həmçinin çı Tehroniku çandə alimon bənə şeyx Fəzlullah nuri ciddiyə tələbon boyis be Konstusiya əvəzon təsdığ kardey be.bə ın əvəzon əsos bə Məclisi nəzorət kardero həx bo ruhaniyon iyən İslomi alimon bə rəsmiyyət zıney be və ım həmonə çiye ki,torıxədə de Məşruə Məşrutə unvoni zıney beydə…..