Pars Today

Şiiə yolə alimon

Cəbəlul-Amil məntəğə çı vey kanə və ğədimə məntəğəonkuye ki,insonon əyo jimonışon kardə və arxeoloqon əyo pəydu kardə çiyon  və bın məntəğədə çı insonon sakin bıey torıx,təğribən de tosə haft həzo sori torıxi rəseydə.

İslomi zuhuri və İslomə dini bın sərzəminədə pevolo bıey bəpeştə,çı Yəməni əhaliku bıə Bəni Amilə ğəbilə bə ın məntəğə kuçışon kardə və çəy bədiqə bə ın məntəğə Cəbəlul-Amil nomışon noə.çı torıxi dəğiğə məlumotonku qıləyni çımiku hikoyət kardedə ki,çı Yəməni əhali de həzrət Əli(ə) dasti de İslomə dini oşno bıən,ın dinışon ğəbul kardə və mısılmon bıən.çən,əcib ni ki, ehanə çəvon imon de bə həzrət Əli(ə) iyən peyğombəri(s) Əhli-Beyti(ə) eşğ iyən məhəbbəti pur bıbu.....

Seminə xəlifə yəni osman ibn əffani xilofəti devronədə  Əbuzər Ğəffari ki,çı peyğombəri(s) vey çokə əshobonku qıləyni be,de de peyğombəre-əkrəmiku(s) hədis votey qıno dastqir kardey və bə Cəbəlul-Amil məntəğə dərbədər kardey be.əmmo ım ıştə kə-bəku dərbədər kardey nəyinki, Əbuzərış təcrid nıkarde,bəlkəm çəy sıxan votey iyən səyon boyis be ta çın məntəğə millət bə Peyğombəri(s) Əhli-Beyti(ə) muhib iyən piyəkəson zumrə daxil bıbon və çəy bəpeştə Şiyə məzhəbi ğəbulkon.çandə soron çın vağiyə iyən hodisə bədiqə çı Hillə şəhri tolə alimonku qıləyni ki,çəy nom Məhəmməd ibn Məkki Cuzeyni və de Şəhide-Əvvəli ləğəbi məşhur be,Cəbəlul-Amili məntəğədə bo dini dərson tədrisiro qıləy elmiyyə-hovzəş təsis karde.çı şəhide-əvvəli cəhdon səbəb be Cəbəlul-Amili məntəğədə dini maarifon revnəğ pəyduko.çı Cəbəlul-Amili məntəğə şiəyon məhəbbət,elm iyən aqahətişon bə iyande omuteşone və ım irso-merıs de tobə ısətnə zəmonə həm dəvomış heste.

İslomi azizə peyğombəri(s) nəvəonku çandə qılə xanedan iyən nəslon Cəbəlul-Amili məntəğədə jimon kardedən.çəvonku məşhurə qıləyni həm çı Sədri xanedane ki,çı İmom Mosə Kazımi(ə) nəvəonkuye.Hicri-Ğəməri daminə əsrədə Cəbəlul-Amil məntəğə çı osmaniyon hukuməti jiyədə be və osmani hakimon bə Şiyə alimon nisbətədə ziyodə ğəddorətiyon kardedəbin.joqo ki,ziyodə alimon bə ğərol omin ki,həmonə məntəğə tərkko və çəyo kuçkon.veyə alimon min cumlə Sədri yolə xanedani bəzi uzvon çı Cəbəlul-Amil məntəğəku bə İrağ iyən İroni səmt hicrətışon karde.....

Hicri-Ğəməri çordəminə əsrədə İrağədə çı Sədri xıyzoni yolonku qıləyni seyd İsmoyl Sədr be.əv Hicri-Ğəməri 1258-ə yəni milodi 1842-ə sori İsfəhonədə bə dınyo çəşış oj karde və şəş sinnədə beyədə ıştə pış çı dasto doe.əv tosə çordə sinni ərəbi ədəbiyyot,fiğh iyən usulış ıştə bo palu omuteşe və vistı se sinnədə beyədə de şeyx Mırtəzo Ənsari vindey şevği çı İsfəhoniku bə Nəcəfı-Əşrəfi səmt hərəkətış karde.əmmo bə Nəcəfi rəsey bənav şeyx Mırtəzo Ənsari bəfotış karde və əv hiçvaxti deəy mıloğot kardeyış nızıne.demiyən seyd İsmoyl Nəcəfədə mande və çı Məhdi Kaşiful-Ğita iyən Mirzaye Şirozi dərson məclisədə iştirokış karde.əv təğribən vist sor çın buzurquvarə alimon palu dərsış təhsil karde və çı kamə fərdonku be ki,çı Şiəyon ali-məğamə mərcə bıə Yolə Mirzaye Şirozi ıştə umri oxonə da sorədə ıştə dərs iyən bəhsi kursiş bəy aspardeşe və ın yolə alim ıştə təlim iyən tələbon tərbiyə və perosney koyış bəçəvon ehdəş noe....