970-ə hissə-Zariyati surə -38-46 şərifə ayəon

970-ə hissə

وَ فِی مُوسى‏ إِذْ أَرْسَلْناهُ إِلى‏ فِرْعَوْنَ بِسُلْطانٍ مُبِینٍ(38)

Və Mosə(sərquzəştədə qıləy nışonəon heste)qıləy zəmon ki,əvımon de ruşin iyən oşkoə dəlili bə fironi səmt vığandemone.

فَتَوَلَّى بِرُکْنِهِ وَ قالَ ساحِرٌ أَوْ مَجْنُونٌ(39)

çən,firon de bəştə ğudrət iyən ləşkəri təkyə kardə holədə dim qordınışe və voteşe:əv ya coduqəre ya cındo.

فَأَخَذْناهُ وَ جُنُودَهُ فَنَبَذْناهُمْ فِی الْیَمِّ وَ هُوَ مُلِیمٌ(40)

çən,əmə çəy ləşkərımon(deştə ğəhri) qətemone və əvon bə dıyo ğandemone.qıləy holədə ki, əv(bəştə inodkorəti iyən deşmınəti xoto)bə mızəmməti loyığ be.

Vəynə bərnomədə sıxan bə Luti ğovmi əzobi nozil bıeyku sıxan votey be,ın ayəon bə firon iyən bəçəy tərəfdoron işorə kardedə və hamyedə:həzrəte Mosə(ə) bə Bəni-İsrayili ğovmi səmt şıey əvəzi,iminə qəmədə bə fironi soyəx şe.zira əv həmonə ğovmış ıştə zolımonə sultə jiyədə oqətəşbe,bəçəvon merdon iyən jenon əzob iyən işkəncə doydəbe və əvonış nokə və kənizış kardəbe.

Çən,həzrəte Mosə(ə) bo Bəni-İsrayili ğovmi çı fironi çənqaliku ozod kardero,ibtido bə fironi soyəx şe və de İlahi mecuzəon,dəlil iyən ruşinə məntıği nışon doey,ıştə həxətiş isbot karde.əmmo firon iyən çəy tərəfdoron həxə sıxanışon ğəbul nıkarde.əvon Mosə(ə) coduqər zıneşone və əvışon de kamə ağli soybi iyən cındoəti mıttəhəmışon karde.

Nəhoyətən,İlahi ğəzəb fironıjonış dəqəte.qıləy holədə ki,hiç qıləy fərol kardey royışon nıbe.əvon həmmə Nili ruyədə ğərğ bin,eşin və torıxi dırozi çı mıxtəlifə ğovm iyən milləton tərəfiku mızəmmət kardey bıən. çın ayəonku omutedəmon:

1-milləti çı zolımon sultəku ozod kardey,çı peyğombəron inğılobi hədəfonku qıləyniye.

2-fosidə hukuməton Xıdo merdon ki,bo camiyə koon islohiro ğıyom kardedən,bəçəvon şəxsiyyət iyən xarakteri suyi-ğəsd kardedən.norəvoə behtonon bəvon ğandedən iyən əvoni mınhərif,sehrkor iyən məcnun təğdım kardedən.

3-dıjdə ğudrəton deştə qırd ğıvvə iyən imkonaton İlahi irodə mığobilədə vey zəyif iyən ocizin.çən,bəpe bə Xıdo təvəkkulkəmon iyən hiç qıləy tarsi bəştə dıli ro mədəmon.

وَ فِی عادٍ إِذْ أَرْسَلْنا عَلَیْهِمُ الرِّیحَ الْعَقِیمَ(41)

Və Adi ğovmi(sərquzəştədə qıləy nışonə və ibrət mevcude) bə zəmon ki,bəsə əvon hışk iyən həlokəkə vo vığandemone.

ما تَذَرُ مِنْ شَیْ‏ءٍ أَتَتْ عَلَیْهِ إِلاَّ جَعَلَتْهُ کَالرَّمِیمِ(42)

(ın vo) bəçəy vəy beşə hiç qıləy çi vodoydə nıbe illa ki,əy (bənə pıxə astə)hırd iyən məhf kardedəbe.

Həzrəte Hud(ə) çı Ad ğovmi peyğombər be.qıləy ğovm ki,Ərəbi Cəzirə iyən ləpəki cənubədə jimon kardedəbin iyən cismi nəzəku zumand,barzə bolo iyən dıjdə cussəşon bıə fərdon bin.əvon çı bandı-kuon miyono dıjd iyən barzə binon soxtey koyədə qıləy məxsusə məhorət iyən ğudrətışon hestebe.

Əmmo,əvon bə İlahi peyğombəron tabe bıey əvəzi,bə sıtəmkorə hukuməton itoət kardedəbin iyən çı həxı mığobilədə mandedəbin tayinki,Xıdovənd qıləy saxtə əzobış bəçəvon piyo nozil kardeşe.qıləy dıjdə tındə vo əvonış dəqəte ki,həmonə zumandə millətış bənə kıləş və sımə rostış karde iyən bəsə zəminisə ekkuyeşe.çın ayəonku omutedəmon:

1-Vo ki,avəon vırəbəvırə kardey,voşi nozil kardey iyən rəsəyon perəseyədə İlahi rəhməti məzhəre,qahi zəmon İlahi ğəhr və ğəzəb həm beydə,vironəti vardedə iyən mucrimon bə həlokət rosneydə.

2-ov iyən vo harçənd təbiiyi təzahuronku bə hisob omeydə,əmmo çı Xıdovəndi fərmoni jiyədəy iyən deçəy irodə zolımon ıştədə ğərğ iyən həlok kardedə.

وَ فِی ثَمُودَ إِذْ قِیلَ لَهُمْ تَمَتَّعُوا حَتَّى حِینٍ(43)

Və Səmudi ğovmi(sərquzəştədə həm qıləy ibrəti nışonəon heste)bə zəmon ki,bəvon votey be:tosə qıləy kırtə zəmoni(ki,se rujisə vey ni,çı jimoniku)bəhrə bobənən.

فَعَتَوْا عَنْ أَمْرِ رَبِّهِمْ فَأَخَذَتْهُمُ الصَّاعِقَةُ وَ هُمْ یَنْظُرُونَ(44)

əvon bəştə pərvərdıqori fərmoni itoət nıkardeşone.

فَمَا اسْتَطاعُوا مِنْ قِیامٍ وَ ما کانُوا مُنْتَصِرِینَ(45)

çən,qıləy holədə ki,nəzə kardeydəbin,avəçəkə əvonış dəqəte.çən,çəvon nə əyşte ğudrətışon hestebe və nə (əvon)ıştəni mıdofiyə kardey zıneşone.

وَ قَوْمَ نُوحٍ مِنْ قَبْلُ إِنَّهُمْ کانُوا قَوْماً فاسِقِینَ(46)

və çəvon bənav Nuhi ğovm(məhf kardemone.zira) qıləy nıpemandə iyən bədə ko soyb bıə millət bin.

Həzrəte Saleh(ə) çı Səmudi ğovmi peyğombər be.əvon Saleh(ə) peyğombəriku boştə həxəti isbot kardero qıləy əcibə mecuzə tələb kardeşone.yəni ə həzrət çı bandı-kuh dıləku qıləy şatur xaric kardənin be. Həzrəte Saleh(ə) bəvon voteşe:əgər ım ko əncom doey bıbu və şımə imon nıvon,həlok bəbiyon.əmmo əvon ki,qımon kardedə nıbin jıqo qıləy mecuzə bə əməl omənine,ijən bəştə tələbon isror kardedəbin.

De ilahi ğudrəti qıləy dıjdə cussəş bıə şatur çı bandı-ku dıləku xaric be.əmmo Səmudi ğovm çı Həzrəte Salehi(ə) həxəti iğror kardey əvəzi,ə həzrətışon təkzib karde və çı şaturi kıştey fikədə bin.çən,həmonə şaturi kıştey bədiqə se ruj bəvon mehlət doey be ta tobəkon.əmmo əvon onıqardin və de osmoniyə avəçəkə jıqo bəsə zəmini dimisə eqınin ki,bəsə poysə əyştey iyən bo komək tələb kardey zuşon həm nıbe.

Həmçinin deməkə ki,İlahi dıjdə peyğombər Həzrəte Nuh(ə) çandə soron boştə ğovmi irşod iyən hidoyətiro səyonış karde,əmmo qıləy kamə dastə bə ə həzrəti imonış varde və əmandə dastə ıştə kufr iyən noloyığə koonədə isror kardeşone tayinki,əvon həm de qıləy dıjdə seyl iyən tufoni məhf bin,şin.çın ayəonku omutedımon:

1-İlahi sınnət iyən adət bə mucrimon mehlət doeye.əmmo əgər tobə nıkon,dınyo iyən axırətədə bə əzobi giriftor bəbeyn.

2-dəvardə ğovmon taleku ibrəti dərsi nıqətə iyən ıştəni isloh nıkardə ğovm iyən milləton,ıştən bo və omə nəslon ibrəti dərs bıey bəzıneyn.

3-həmmə təbiiyi təzahuron min cumlə ov,vo iyən avəçəkə İlahi ğəzəbi səbəbon bıey və bə mucrim iyən fosidə ğovmon həlokəti boyis bıey bəzıneyn.