Pars Today

Şiiə yolə alimon

Həsənəli hejo çı hırdənətiku har uj sıbhdəm deştə pı bə ico de de ibodət iyən razo-niyozi koy məşğul beydəbe və fəğət haft sorış hestebe ki,Hoci Məhəmməd Sadığ Təxt Pulodi əvış bo şoqirdəti ğəbulış karde.qıləy dərs ki,bın məktəbədə tədris beydəbe de coqlə həmə məktəbon far kardedəbe.Həsənəli çı kəmoli mərhələonku dəvardeyış de fiğh,usul,kəlom,fəlsəfə iyən bənə ımon bıə elmon handey binoş nıkarde,bəlkəm çı elmi omutey kəno,hejo çı sıftəku deştə nəfsi təmiz kardey koy məşğul be.şeyx Həsənəli ıştə umri oxonə vaxtonədə Məşhədi şəhrədə  Noxudəki nomo qıləy diyədə jimon kardedəbe və bə həmonə dəlili xoto Şiyə ın yolə alim de Həsənəli Noxudəki nomi məşhur be…..

Şeyx Həsənəli Noxudəki deməkə ki,ziyodə de səfə,elm iyən təlimi koy məşğul beydəbe,əmmo ıştə ibodət iyən bəşəvnəy oğo mandeyku bə dumo mandedəbe və ım ko dəvom doydəbe. Həsənəli ponzə sinniku həmmə Rəcəb,Şəban iyən Rəməzonə manqonədə rujəş qəteydəbe və haft sinniku de tobə ıştə umri Cımə şəvon həmmə de dıvo,nımoj,razo-niyoz iyən ibodəti koy məşğul bıə.irfoni seyro-sulukədə çəy şivə hejo çe həmonə Məsumə İmomon(ə) qətə ro və şivə be,çəy vucud həmmə de viloyəti eşği pur be və dayima çı İmom Əli(ə) nom çəy zıvonədə cari be,Şeyx Həsənəli Noxudəki ıştə irfoni metodi barədə çandə kərə təkidış kardə ki,bə coqlə irfoni məktəbon əks ya Sufiyon ki,kam bə şəri hukmon dığğət kardedəbin və ya hətto kali vıronədə İslomi hukmon nəzədə qəteydənin,əmmo Şeyx Həsənəli Noxudəki irfoni şivədə bə İslomə dini hukmon rioyət kardey vey muhimme.Şeyx Həsənəli Noxudəki bə nımoj qıləy məxsusə dığğətış hestebe və tevsiyə kardedəbe ki,nımoji koyədə çanədə kardey bəzıniyon zəhmət bıkəşən və bəy dığğətkənən.əv seqlə çi bənə ıştə irfoni şivə usuli unvoni çəyku bəhs kardedəbe.bəşəvnəy oğo mandey,həlolə loğmə iyən bə nımoji dığğət kardey.məxsusən nımoji sıftənə vaxtədə votey və bəvədə ğəlbi huzuri malik bıey.əv jıqo hisob kardedəbe ki,həyğəton kəşf kardey fəğət de İslomi şəryətu tərığ və roy vositə de bə Məsumə İmomon(ə) qətə ro və şivə pemandə holədə imkonış heste…..

Şeyx Həsənəli Noxudəki rəhəccud,dayimi iyən xolisonə ibodət boyis be ki,Xıdovənd kəroməton baxşko və çəy məşhur bıey əsliyə dəlilonku qıləyni həm həmonə kəroməton bin ki,millət ısət çı xəvass yəni xususi odəmon vıə ya əvam yəni umum məxloğ bıbu,həmmə mısəğim iyən sərostə surətədə çəy şoyd bıən.ayətullah Mərəşi Nəcəfi ıştə”Musəlsəlatun fil icazat” kitobədə bın barədə jıqo nıvışteydə:”əv çı milləti miyono de “mustəcəb əddəvə”nomi məşhur be və ziyodə hocətməndon iyən noxəşon bəy pənoh bardedəbin.çən,əv boəvon dıvo kardedəbe ya boəvon dıvoon nıvışteydəbe və de ın vəsilə iyən vositə noxəşə odəmon şifo pəydu kardedəbin və çəvon muşkiloton bərtərəf beydəbe.demiyən əv çı təvazu iyən sodəti kəmolədə be və hiç qıləy iddioş nıbe və çı zohidon qıləy barizə nımunə be ki,fəğət bə Xıdo dığətış hestebe iyən çı dınyəvi koonku bə diyəro be”….

Həmonə yolə arifi kəroməton həm keyfiyyət cəhəto dığğət kardənin be və ım inoyəton bə yolon,alimon,ustodojn iyən şoqirdon,mənsəb soybon və həmən umum məxloği dığğəti mərkəzədə bıə.Şeyx Həsənəli Noxudəki kə hiçvaxi bo noxəşon,giriftorə məxloği iyən ehtiyocinə məxloği dimi bastə bıənıbe və çun millət har qıləy zəmonədə bəçəy mənzıli ovard kardedəbin, norohət beydə nıbe.hətto ğeyri-mısılmonə odəmon həm çəy lutfonku bəhrə bardedəbin iyən əvon boştə muşkiloton bərtərəf kardero bəy mırosiyət kardedəbin.

In yolə arif həmişə bəştə duston iyən nez odəmon tevsiyə kardedəbe ki,bə milləti xıdmətkon iyən bo fəğır-fuğəraon muşkiloton həlliro bəvon sədəğə bıdon və ya qıləy çi nəzrkon.ehanə ikəs çəyku qıləy tevsiyəş piyedəbe,de həzrəte İsa-Məsih(ə) jimoni və ya de mevla həzrət Əli(ə) vəsiyyətonku bıə qıləy rəvoyəti bəyon kardey,əvoni bə milləti xıdmət nışon doey səmt sıfarış kardedəbe…….

Şeyx Həsənəli Noxudəki bənə qıləy komilə arifi unvoni hejo de qıləy zohidonə şivə jimon kardedəbe və çı dınyo iyən çəy məzhəronku dimış qordınəbe.əv dayima bə dınyo aşığ bıə iyən dınyo tələb kardə və həmçinin dini boştə dınyəvi iftixoron kəsb kardero vəsilə ğərol doə alimonku norohət iyən çəvonku qıləy şikoyətış hestebe və ıştə şıə roy iyən təriği çəvonku hejo co kardedəbe.

In yolə arif həmişə boştə şoqirdon ruşd iyən hidoyətiro bəvon tevsiyəon kardedəbe ki,ısət əmə çəvonku I baxşi boşmə bəyon kardedəmon:çanədə kardey zıneydon bə nımoji əvvəlinə vaxti dığğətkənən və Ğıroniku çandə qılə ayə de çəy mənonoədə tədbiri sıbdəmi zəmonədə tilovətkənən.dıqlə mətləb muhimme.qıləyni həlolə xorək iyən coqləyni bə nımoji dığğət iyən ət usloh karcey.ehanə ım dıqlə dırıst bıbu,əmandəni həm dırıst bəbe.