Pars Today

Şiiə yolə alimon

Hicri-Ğəməri 1287-ə sori İsfəhoni seydonku qıləyni bıə seyd İsmoyl Təbətəbayi nomo seydi kədə qıləy zoə fərzənd bə dınyo ome ki,çəy nomışon Həsən noşone.seyd Həsəni xıyzon çə məntəğə ruhaniyonku be və de rujiqori di təsərrufoti məşğul beydəbin.seyd Həsən fəğət şəş sorış hestebe ki,əvışon çı İsfəhoni Qomşe məntəğədə de dini təblıği koy məşğul bıə bəçəy cədd və yolə pıə bıə Mir Əbdul Baği aspardeşone ta dini elmon təlim bıvindo.Mir Əbdul Baği ıştə qırd səyonış karde ta seyd Həsəni de dini elmon oşnoko və əy bə qıləy barzə alimi səviyyə bırosno.çəy çın seydə balə tərbiyə iyən perəsey koyədə ziyodə səhmış hestebe.seyd Həsən deştə yolə pı rahnuma və ro nışon doey ıştə nevcıvonəti zəmondə boştə elmi təkmil kardero bə İsfəhoni şəhri səmt hərəkətış karde.əv ıştə umri senzə sorış çın şəhri elmiyyə hovzəonədə dəvordıneşe və bın mıddətədə çı ziyodə ustodon məhzrədə elmonış kəsb karde və fiğh,usul, iyən ərəbi ədəbiyyotış təkmil kardeşe və hikmət,fəlsəfə iyən irfonış çı Mirza Cahanqirxan Ğəşğayi palu omuteşe.çımi bəpeştə seyd Həsən bə Nəcəfı-Əşrəfi səmt bə ro dəıniye iyən çı İminə Mirzaye-Şirozi və çı Nəcəfi elmiyyə-hovzə coqlə ustodon nəzdədə de dini elmon təhsili koy məşğul be.seyd Həsən Təbətəbayi təğribən ıştə umri haft sorış çı Nəcəfi elmiyyə-hovzəonədə dəvordıneşe və çəy bədiqə de iştihodi dərəcə kəsb kardey bə İsfəhoni şəhri oqarde və çın şəhri Nəcəfi elmiyyə-hovzəonədə de dini elmon tədrisi koy məşğul be.həmonə sorədə be ki,bəştə tədrisi koyədə bıə qıləy əcibə məhorəti xoto,əv de Mıdərris nomi məşhur be və çəy bədiqə həmmə kəs əy de seyd Həsən Mıdərris nomi zıneydəbin….

Seyd Həsən Mıdərrisi umriku çandə soron de İron iyən dınyodə bıə dıjdə inğılobon bə əməl omey ico qıləy zəmoni dəvarde.İronədə Məşrutə inğılob,İminə Dınyo Canq və Rusiyə Dıjdə İnğılob.bın otəış qətə dınyoədə Seyd Həsən Mıdərris dayima çı ədoləti icro kardey dumo be və əv hejo çı sıftəku ki,İsfəhoni mədrəsə iyən elmiyyə-hovzəonədə dərsonış bino karde,de zu tətbiğ kardə kəson əməl iyən rəftoron mıxolifon be və səy kardeəbe de məntığ iyən istidlolon bə milləti bıə zılm iyən sıtəmi vəy bıqəto.

Seyd Həsən Mıdərris de tədrisi bə zəmon bə tələbəon vəzyəti iyən bə elmiyyə-hovzəon maddi vəzyəti rəseydəbe və bə mudiron təyiğ vardedəbe ta vəğf bıə molon bo tələbəon sərfkon və çəvon muşkiloton bərtərəfkon.əv çı xilof iyən ğeyri-məntıği koon mığobilədə mandedəbe və hiçvaxti bəvon təslim beydə nıbe və çı ədoləti icro kardey koyədə ıştə dasto omə har qıləy ko əncom doydəbe.çəy təslim nıbey ruhiyyə ərsəş bo fırsət tələb və mənfəəti dumo bıə kəson tanqış kardəbe və həmonə ko səbəb be ki,bo iminə kərə idastə odəm bə ğərol omin əy  terrorkon.xoşbəxtanə həmonə terrori ko bə nəticə nırəse və bədxahon ıştə yavə və məkrinə plani icro kardeyədə nokom mandin…..

Seyd Həsən Mıdərris ço sor be İsfəhonədə be,İromədə Məşrutə inğılob bə səbarzəti rəse. Mıdərris həmonə sıftəku de Məşrutə inğılobi mıvofiğ be.çıro ki,əy bo zolımon dasti kuto kardero qıləy çokə roy zıneydəbe.Məşrutətələb kardə kəson iminə ğələbə bədiqə çı şəhron idorə ko de Əyoləti İttifoğon vositə əncom doey be və Mıdərris çı İsfəhoni şəhri Əyoləti İttifoği uzvonku qıləyni be.həmonə zəmonədə be ki,Bəxtyori Məşrutətələbə ğıvvon komandir Səmsamus-Səltənə İsfəhoni şəhri hukuməti rəyisətiş bəştə dast qəte və çəy məğsəd ım be ki,de Ğacariyyə bıə canqiku bə əməl omə xəsorəton de İsfəhoni şəhri camaatiku moliyyot sıey cubronko və çəy əvəzi beşo.əv de məğsədi milləti çı təzyiği jiyədə ğərol doydəbe və hətto ko de hoziyəti bə oxo rəse.Seyd Həsən Mıdərris ki,çın vəzyətiku aqah be,de milləti mıdofiyə koy məşğul be və koy jıqo vində Səmsamus-Səltənə çəy dərbədər kardey fərmonış bekarde.İsfəhoni şəhri camaat bo Mıdərrısi himoyə kardero vıjoronışon tətil karde və çəy dumo İsfəhoni şəhri tərk kardey məğsədışon hestebe.çı milləti ın hərəkət boyis be ki,Səmsamus-Səltənə ıştə ğoldorətiku dast bıkəşo və Seyd Həsən Mıdərris çı milləti barzə fəryodi miyono ki,əvon”bıjyo Mıdərris” şuori doydəbin,bə İsfəhoni şəhri oqarde......