977-ə hissə-Tuuri surə -41-49 şərifə ayəon

977-ə hissə

أَمْ عِنْدَهُمُ الْغَیْبُ فَهُمْ یَکْتُبُونَ(41)

Aya ğeyb çəvon nəzdədəy və əvon(harçi bıpyişone lovhi-Məhfuziku)nıvışteydən?

أَمْ یُرِیدُونَ کَیْدًا فَالَّذِینَ کَفَرُوا هُمُ الْمَکِیدُونَ(42)

ya dılışon heste(bo həxı miyoniku bardero) hiyləku oko bıdon?əmmo kofiron ıştən bə hiylə giriftor bin.

أَمْ لَهُمْ إِلَهٌ غَیْرُ اللَّهِ سُبْحَانَ اللَّهِ عَمَّا یُشْرِکُونَ(43)

ya əvon ğərəz Xıdo co qıləy məbud hesteşone?Xıdovənd çəvon boəy şərik ğərol doə çiyonku mınəzzəh və poke.

Navnə proqramədə Xıdovənde-Aləm çı peyğombəri(s) mıxolifonku sıvol-cəvob kardedəbe ki,bə çiçi əsos jıqo behtonon bə Xıdo-Rəsuli(s) ğandedon?,ın ayəon həmonə sıvolon cəvobədə hamyedə:aya mıxolifon iddio kardedən ki,əvon ıştən de ğeybi aləmi qıləy rabitəşon heste və İlahi vəhyi mıstəğim iyən sərostə formədə ğəbul kardedən və bə Xıdo-Rəsuli(s) boəvon vardə Xıdo kəlomi qıləy ehtiyocışon ni?.

Yaan ki,bo Xıdo-Rəsuli(s) çı miyoniku bardero qıləy hiylə iyən məkrinə plan hozzı kardedən?.qıləy holədə ki,bəpe bızınon ki,əvon ıştən de ilahi irodə məğlub bəbeyn və çəvon məkrinə planon deçəvon ıştən zərəli təmom bəbe.əvon əgər bə bo Xıdo şərik ğərol doə puçə ğudrəton təkyə kardedən,bəpe bızınon ki, həmonə ğudrəton çı Xıdovəndi ğudrəti mığobilədə əvoni himoyət və bəvon komək kardey nibəzıneyn.çın ayəonku omutedəmon:

1-mınhərifon  dəvəti şivəonku qıləyni,çandə qılə parsemononku bəhs kardey,bo fərdon oğo kardey iyən əvoni bə təfəkkuri vodor kardeyroye.

2-hakəs ğərəz İlahi evliyaon iyən peyğombəron de ğeybi irtiboti iddio bıko,çəy iddio hiç qıləy ağlıi iyən elmi dastəkış ni və çəy sıxanon botıle.

3-Xıdovənd imoninə insonon hamiye və lozım bıə zəmonədə çı deşmınon məkrinə planon vəy bəqəte.

وَإِنْ یَرَوْا کِسْفًا مِنَ السَّمَاءِ سَاقِطًا یَقُولُوا سَحَابٌ مَرْکُومٌ(44)

Əvon əgər bıvindon osmoniku i poə(saru)eqıneydə,(ijən imon nibəvardeyn və)votedən:ım qıləy dəbırcıniyə bıə avəy.

فَذَرْهُمْ حَتَّى یُلَاقُوا یَوْمَهُمُ الَّذِی فِیهِ یُصْعَقُونَ(45)

çən,əvoni(bəçəvon ıştən holi)vobıdə ta əvon həmonə ruj ki,bəvədə bə avəçəkə dıço bəbeyn,bıvindon.

یَوْمَ لَا یُغْنِی عَنْهُمْ کَیْدُهُمْ شَیْئًا وَلَا هُمْ یُنْصَرُونَ(46)

qıləy ruj ki,çəvon hiyləon boəvon hiç qıləy foydəş nibəbe və (bəvon)komək kardey nibəbe.

In ayəon bə mıxolifon iyən munkiron inodkorəti ovc iyən pik həddi işorə kardedə və hamyedə:ehanə Xıdo əzob sığon ğəlibədə çı osmoniku nozil bıbu,ijən əy inkor kardeydən və votedən:ımon osmoniyə avəy ki,dəbırcıniyə bıə və de ın şikili eqıneydə.əvon nəyinki,mənəvi həyğəton inkor kardedən,bəlkəm hissi iyən bəçəş çiyə həyğəton həm jıqo təhrif kardedən ta bo Xıdo ğəbul kardero bə bo ji nıdəşon.

Liza ayəon dəvomədə bə rəsuli-əkrəmi(s) xitobən hamyedə:ım fərdon bəçəvon ıştən holi vobıdə.əvon hanədə nin ki,tı əvoni oğo bıkoş.əvon ıştən ıştənışon bə hani jıə və tı çanədə həm səykoş əvon oğo nibəbeyn.fəğət maq iyən həlokət əvoni oğo bəkarde.əmmo həni ımi boəvon hiç qıləy foydəş nibəbe. çımisə əlovə çəvon məkrinə planon,bo Xıdo dini iyən həxı məf kardero boəvon qıləy foydəş nibəbe və həni boəvon qıləy xiloskor nibəbe.çın ayəonku omutedəmon:

1-inodkorəti çı insoni sə çəşi bo həyğəton vindero ku kardedə.ısət çı bımando mənəvi həyğəton ki,bəpe de dıli çəşon vindey iyən ğəbul kardey bıbu.umumən çı insoni inodkorəti əy bə həxı nodırsıtə təhlili səmt vodor kardedə.

2-peyğombəron irşod iyən hidoyət bo əkəsiye ki,çı həyğəti zıney dumo bıbu.nəyinki,əkəs ki,çı həxı mığobilədə inodkorətiko.

3-mıxolif iyən munkiron məhfəti ıştə mıhosibəonədə nəzə qəteydənin.əvon qımon kardedən ki,həmişə bəmandeyn iyən ıştə mərkinə planon icro kardey bəzıneyn.qıləy holədə ki,havaxti Xıdo irodəko,maq iyən məhfəti əvoni dəbəqəte və çəvon planon bə bod bədoe.

وَإِنَّ لِلَّذِینَ ظَلَمُوا عَذَابًا دُونَ ذَلِکَ وَلَکِنَّ أَکْثَرَهُمْ لَا یَعْلَمُونَ(47)

Və həlbəttə bo sıtəm kardə kəson ğərəz ımi qıləy(co)əzob heste.əmmo çəvon veyni zıneydənin.

وَاصْبِرْ لِحُکْمِ رَبِّکَ فَإِنَّکَ بِأَعْیُنِنَا وَسَبِّحْ بِحَمْدِ رَبِّکَ حِینَ تَقُومُ(48)

və boştə pərvərdıqori fərmoni(əncomiro) səbrkə və poydorətikə ki,tı çəmə çəşədəş (və çəmə himoyəti jiyədəş) və qıləy zəmon ki,(haniku) əyşteydəş,deştə pərvərdıqori sıtoyişi əy de pokəti sıtoyişkə.

وَمِنَ اللَّیْلِ فَسَبِّحْهُ وَإِدْبَارَ النُّجُومِ(49)

və şəvi i nimədə astovəon qim bıə zəmonədə Xıdo təsbihkə.

Vəynə ayəon dəvomədə ki,çı İlahi əzob və ğəhri çı inodkorə munkiron piyo nozil bıey  barədə be,ın ayəon hamyedə:İlahi əzob fəğət bə axırəti ayid ni,bəlkəm dınyoədə və bərzəxədə həm ım şomil bəbe.əmmo əvon ki, vəhyiku xəbəşon ni,çın əmriku aqahətiş ni və ıştə isloh iyən İlahi cəzoku nicoti fikədə nin.

Çın surə oxoyədə çı deşmınon məkrinə planon və çandə nev behtonon bəyoni bədiqə,Xıdovənd bə peyğombəre-əkrəmi(s) xitobən hamyedə:bo risoləti məsuliyyəti əncom doeyro ki,ıştı duşədə noəmone və tı sabit ğədəm iyən ğoym bıbu ki,əmə bətı ro nşon bədomon iyən tıni himoyə bəkardemon və tı i ləzə həm çəmə çəşiku xaric nibəbeyş ki,tını bəştı ıştən holi vobıdəmon.

Həlbəttə boştə ruhiyyə zumand kardero de Xıdo qıləy dayimiyə rabitə bıbast və har sub iyən şəvədə əy həmd iyən təsbihkə ki,ım ko tıni çı cokəsonku be ehtiyoc bəkarde və tıni bə ğudrət iyən əzəməti məbdə mıttəsil bəkarde və dəbəçokne.çın ayəonku omutedəmon:

1-zolımon dınyo iyən axırətədə ıştə ağıbətiku bexəbədon.və illa jıqo əməl nıəkardin iyən de qıləy co iborəti bəştə sıtəmiku dast əkəşin.

2-Xıdo dini hifzi royədə bəpe çı inodkorə mıxolifon mığobilədə mandey bıbu və de səbr iyən hovsələ bə çın roy muşkiloton tov biyo və təhəmmulko.

3-ehanə insoni imonış bıbu ki,Xıdovənd çəy royədə səy və cəhd kardə kəson vindedə və bəvon komək kardedə,çəy səbr ziyod beydə və ıştə səyonku dast kəşeydəni.

4-de Xıdo dıvo iyən ibodət və rəbboni zikr,bo İlahi fərmoni icro kardero bə insoni  rufi zumandətiro ziyodə təsir noydə.