985-ə hissə-Ğəməri surə -33-42 şərifə ayəon
985-ə hissə-Ğəməri surə -33-42 şərifə ayəon
985-ə hissə
کَذَّبَتْ قَوْمُ لُوطٍ بِالنُّذُرِ(33)
Luti ğovm(həm) çəşnavi doəkəson təkzib kardeşone.
إِنَّا أَرْسَلْنَا عَلَیْهِمْ حَاصِبًا إِلَّا آلَ لُوطٍ نَجَّیْنَاهُمْ بِسَحَرٍ(34)
əmə həm boəvon de sıği bə ico bıə tındəvo vığandemone və fəğət Luti xıyzon sıbdəmi(zəmon) nicotımon doe.
نِعْمَةً مِنْ عِنْدِنَا کَذَلِکَ نَجْزِی مَنْ شَکَرَ(35)
(ım nicot) çəmə səmtiku qıləy nemət be.əmə jıləvoni hakəs ki,şukrko,mıkofot doydəmon.
Luti(ə) ğovm çominə ğovme ki,bın surədə bə peyğombəron çəşnaviyon be etıno kardey təsiri xoto,bəçəvon məşumə sərnıvışti işorə kardey bıə.homoseksualistəti fenomen iyən həmonə ğovmi merdon miyono cinsi rabitəon bərğərol kardey,joqo rəvocış pəydu kardə be ki,çəvon peyğombəron çəvon kardə yavə koy iyən çəy ağıbəti barədə dumoyənde bıə xəbərdoətiyon boəvon hiç qıləy təsirış nıbe.əvon çı Luti(ə) məntığiyə sıxanon ğəbul kardey əvəzi,ə həzrəti çı şəhriku ixroc kardey iyən çəy dıləsutə nəsyətonku rohət bıey fikədə bin.
Xıdovənd həm əvonış bə qıləy dıjdə tındəvo iyən tornado dıçoş karde ki,ziyodə həcmədə bıə sığ iyən səhro huş bə osmonış bardeşe və bə ikkərə bə həmonə fosid iyən bədkorə ğovmi səş rukarde.nəticədə əvon iyən çəvon kə-bəon çı huşə voşi jiyədə dəfn bin iyən əvon bə həlokət rəsin.həlbəttə,çı əzobi nozil bıey bənav Xıdovənd bə həzrəte Luti(ə)xəbəş doe ki,de mıxolifon həmdast bıə ğərəz ıştə həyot həmro, deştə xıyzoni bə ico şəhriku xaric bıbon ta İlahi ğəhriku əmonədə bımandon.çın ayəonku omutedəmon:
1-çəşnavi iyən tars doey,torıxi dırozi çı həmmə peyğombəron vəzifəonku bıə.əmmo umum millət bə ın çəşnaviyon dığğət kardedənin iyən pand qəteydənin.
2- İlahi ədolət tələb kardedə ki,əzobi nozil bıə zəmonədə imoni əhl xilos bıbon və hışk-tar bə ico nısuton.
3-peyğombəron dəvəti ğəbul kardey iyən bə Xıdovəndi vığandə kəson əmron itoət kardey,inev əməli şukre ki,həmonə bın dınyoədə İlahi nemət iyən mıkofoti nozil bıey zəminə hozzı kardedə.
وَلَقَدْ أَنْذَرَهُمْ بَطْشَتَنَا فَتَمَارَوْا بِالنُّذُرِ(36)
(Luti)bə milləti çəmə ğəhriku(və muaxizəku)çəşnaviş doəbe.əmmo(əvon) çəşnaviyonədə mıbohisə kardeşone
وَلَقَدْ رَاوَدُوهُ عَنْ ضَیْفِهِ فَطَمَسْنَا أَعْیُنَهُمْ فَذُوقُوا عَذَابِی وَنُذُرِ(37)
və çəy mehmonon çəyku(bo yavə koonro)tələb kardeşone.əmmo əmə çəvon çəşon ku iyən(əvon)məhf kardemone.(və votemone:)çımı əzob iyən çəşnavi bıçaştənən.
وَلَقَدْ صَبَّحَهُمْ بُکْرَةً عَذَابٌ مُسْتَقِرٌّ(38)
və sıbhdəmi zəmonədə qıləy dayimi əzob bəçəvon soyəx ome.
فَذُوقُوا عَذَابِی وَنُذُرِ(39)
çən,əzob iyən çəşnavi bıçaştənən.
وَلَقَدْ یَسَّرْنَا الْقُرْآنَ لِلذِّکْرِ فَهَلْ مِنْ مُدَّکِرٍ(40)
və bərosti əmə Ğıronımon bo zikri(pandiro) hoston kardemone.çən,aya qıləy pand ğəbuləkə heste?.
Həzrəte Lut(ə) hejo bə ğovmi məşumə ağıbəti həxədə çəşnavi doydəbe,əmmo əvon çəy sıxanonədə şəkk icod kardeşone və əvışon ğeyri-ğanuni hisob kardedəbin.tayinki,İlahi məlayikon qıləy reçinə simo soyb bıə cıvonon şikilədə çı Həzrəte Lut(ə) palu omeyədə,çəvon xəbisə hərəkəton pik həddədə bıə şərə fərdon çə həzrətiku tələbışon karde ki,ıştə mehmonon çəvon ixtiyorədə ğərol bıdon.
De İlahi fərmoni çəvon çəşon ku bin,əmmo nə ıştən iyən nə çəvon ğovmon İlahi çın oşkoə əzobiku pandışon qəte.əvon nəyinki,ıştə kardə koonku peşmon bin,bəlkəm bə həzrəte Luti(ə)coni suyi-ğəsd kardeyışon piye ki,Xıdovəndi Əv iyən çəy xanedanış bəşəvnəy xilosış karde və sıbhdəmi zəmonədə həmonə yavə ko soyb bıə ğovmış bə həlokət rosneşe.çın ayəonku omutedəmon:
1-Xıdovənd ibtido de peyğombəron tərıği huccəti təmom kardedə iyən peşo munkir iyən mıxolifon bəçəvon cəzo rosneydə.
2-ehanə camiyədə fəsod iyən yavə əməlon bo odəmon addi bıbu,pok iyən muminə fərdon kə həm,çı mufsid iyən xilofkoron dastrəsiku əmonədə nibəmande.
3-Ğıron torıxi kitob ni,əmmo dəvardə ğovmon tale iyən sərquzəşti nəğl kardedə ta millət ibrət bıqəton və həxı ğəbul kardey boəvon hoston bıbu.
وَلَقَدْ جَاءَ آلَ فِرْعَوْنَ النُّذُرُ(41)
Və həyğətən çəşnavi doə kəson bə fironıjon soyəx omin.
کَذَّبُوا بِآیَاتِنَا کُلِّهَا فَأَخَذْنَاهُمْ أَخْذَ عَزِیزٍ مُقْتَدِرٍ(42)
(əmmo əvon) çəmə me`cuzəon təkzib kardeşone. çən,əmə əvonımon bəçəmə ğıvvə iyən ğudrəti loyığ şikilədə(de ğəhri)qətemone.
In surə bəyon kardə pencminıə ğovm,fironi ğovmi məşumə sərnıvışt iyən taleye ki,əy bənə Xıdo pərəstış kardedəbin iyən bəçəy fərmonon həmmə muti bin.fironıjon Bəni-İsrayli ğovmışon əsir kardəbe və bə əsorəti ji dənəşonbe iyən de vey yavə şivəon bəvon işkəncə və əziyyəton doydəbin.
Həzrəte Mosə(ə) bo firon iyən çəy tərəfdoron bə Xıdopərəstəti tərəf dəvət iyən bo Bəni-İsrayli ğovmi çı əsorətiku ozod kardero,bə fironi soyəx şe.ə həzrət de İlahi fərmoni çandə qılə mecuzəon çı firon iyən çəy tərəfdoron huzurədə nışonış doe.əmmo əvon bo həxı mığobilədə təslim bıey iyən çı kufr iyən zılmiku dast kəşey əvəzi,bə ğərol omin ki,Mosə(ə) iyən çəy tərəfdoron çı miyoniku bıbon.çən,Xıdovənd həmmə həmonə sıtəmkoronış Nili ruyədə ğərğış karde.çın ayəonku omutedəmon:
1-bə zolımə hukuməton iyən de əvon həmfik bıə kəson tabe bıey,insoni çəvon dınyo iyən axırətədə bıə taleyədə şərik bəkarde.
2-İlahi mecuzəon bo bə milləti aqahəti baxşey iyən huccəti təmom karderoye.əmmo əkəson ki, mecuzəon deştə çəşon vindedən iyən inkor kardedən,həmınə bın dınyoədə bə əzobi dıço bəbeyn.
3-aləmi nufuz soyb bıə ğudrət,fəğət Xıdo ğudrəte.bəşəri çı İlahi ğudrəti mığobilədə bıə ğudrət noçiz iyən bemığdore.harçənd zohirədə vey zumand iyən ğudrətin həm bıbu.
