989-ə hissə-Ərrəhmoni surə -19-30 şərifə ayəon
989-ə hissə-Ərrəhmoni surə -19-30 şərifə ayəon
989-ə hissə
مَرَجَ الْبَحْرَیْنِ یَلْتَقِیَانِ(19)
(Şin iyən telə)dıqlə dıyoş rəvon kardeşe ki,bə iyande bırəson.
بَیْنَهُمَا بَرْزَخٌ لَا یَبْغِیَانِ(20)
(əmmo)çə dıqlə miyono qıləy məsofə heste ta həddiku nıdəvardon(və umuj nıqınon)
فَبِأَیِّ آلَاءِ رَبِّکُمَا تُکَذِّبَانِ(21)
çən,ıştə pərvərdıqori kom qılə neməton inkor kardedon?
Navnə ayəon dəvomədə İlahi neməton xısusədə,ın ayəon bə dıyoon neməti işorə kardedə.zəmini kurə səthi təğribən çoədə i hissə dıyo iyən okeyanon ovi dəqətəşe.dıyoon bo bəşəri ehtiyoc bıə xorəki maddonro qıləy dıjdə mənbəy.min cumlə çandə nev ovədə jiyə heyvonon iyən moyon.həmçinin ım dıyon bo inson iyən məhsulon kırne və nəğliyyotiro qıləy muhimmə şosse roonkuye.həmçinin voşon voye,həvo əvəz bıey və hətto zəmini səthədə voon qıniyeku iqlə baxş çı dıyon bərəkətikuye.
In ayəon bə okeyanon kali cozibədorə təzahuronku qıləyni işorə kardedə və hamyedə:iyande kəno cərəyon pəydu kardə şin iyən suyə ovon heste.əmmo de iyande umuj qıniyedənin.jıqo bızın çəvon miyono qıləy divo iyən maneyə mevcude ki,çı tuğyon iyən iyande həddiku dəvardey vəy qəteydə.çın təzahuronku iqlə barizə nımunə,Atlantik okeyanədə dıjdə Qolf Strimi cərəyone.bın dıyo cərəyonədə bə ekvator xətti səmt hərəkət kardə nezə məntəğon ovon qamin iyən Atlantik okeyani çısə-bəsəku dəvardedən və bə Şimoli Avropə sahilon rəseydən.çın cərəyoni ovon temperatur təğribən 10-15 dərəcə de mıcovir iyən hamsuyə ovon miyono tafutış heste.ım dıyo dıjdə ruon deştə ətrofi ovon kam umuj qıniyedə və çandə həzo kilometr ro de ın surəti hərəkət kardedən.çın ayəonku omutedəmon:
1-təbyət çı Xıdovəndi ğudrət iyən rəhməti məzhəre və dıyo iyən okeyanon çəy ğudrət iyən rəhməti həmməysə muhimə məzhəronku qıləyniye.
2-təbyəti ğanun bə Xıdovəndi irodə tabeye,nəyinki,bəçəy irodə hakime.dıyoon su iyən şinə ovon ki, təbiiyi tərzədə bəpe de iyande umuj bıqınon-iyande kəno cərəyonışon heste,əmmo bə iyande umuj qıniyedənin.
یَخْرُجُ مِنْهُمَا اللُّؤْلُؤُ وَالْمَرْجَانُ(22)
Har dıqlə(dıyoku) mırvari iyən mərcon xaric beydə.
فَبِأَیِّ آلَاءِ رَبِّکُمَا تُکَذِّبَانِ(23)
çən,ıştə pərvərdıqori kom qılə neməton inkor kardedon?
وَلَهُ الْجَوَارِ الْمُنْشَآتُ فِی الْبَحْرِ کَالْأَعْلَامِ(24)
və dıyoədə bənə bandı-ku bıə kəştiyon bəy məxsuse.
فَبِأَیِّ آلَاءِ رَبِّکُمَا تُکَذِّبَانِ(25)
çən,ıştə pərvərdıqori kom qılə neməton inkor kardedon?
In ayəon insoni jimonədə bə dıyoon dıqlə roli işorə kardedə iyən hamyedə:mırvari iyən mərcon ki,çı bəşəri jimonədə çandə qılə istifodəonış heste,çı dıyo iyən okeyanon nığılə vıronku istixroc beydə.murvari çı ziynəti iyən dekorativ vəsiləonkuye ki,çı dıyo sədəfon dılədə perəseydə və çı ğədimə zəmoniku bo dıyo sahili kəno jiyə insonon qıləy kəsbo-ko iyən ticorəti vəsilə bıə.
Əmmo şayəd votey bıbu çı dıyon həmməysə muhimmə rol ki,bo çandə nev məhsul iyən enerjiyon nəğliyyotiro qıləy dıjdə zəminə hozzı kardedə.joqo ki,dıjdə kəştiyon çand milyon bo,aləmi şərğiku bə vey ğərbi noxtə həml kardedən,şıkırneydən.ımi həm zikr kardey lozıme ki,bo zəmin iyn reylsi roon soxtey iyən oqəteyro,çandə milyard dollar xarc lozıme.əmmo dıyo roon ziyodə xəzinə iyən xarcış piyedəni və məcconi iyən həvoy çı bəşəri ixtiyorədə ğərolış qətə.çın ayəonku omutedəmon:
1-harçənd inson hışkiyədə jieydə,əmmo dıyo iyən okeyanon həm çı insoni xıdmətədən və çəy mıxtəlifə ehtiyocon təmin kardedən.dıyoon bo mısofiron iyən bo məğliyyotiro qıləy muhimmə rolış heste və çı ğədimə zəmoniku bənə qıləy məcconi iyən hevujə dəvardəco unvoni çı bəşəri dıığğəti nəzədə bıə.
2-əkəson ki,Xıdo vucudi inkor kardedən,çokonə hışki iyən dıyoədə çəy çı bəşəri ixtiyorədə ğərol doə dıjdə neməton nəzədə qəteydənin iyən bəy noşukrəti kardedən?
کُلُّ مَنْ عَلَیْهَا فَانٍ(26)
Harkəs ki,çəy(zəmini)piyo miyoniku şıənine(foni bıənine).
وَیَبْقَى وَجْهُ رَبِّکَ ذُو الْجَلَالِ وَالْإِکْرَامِ(27)
və(fəğət) ıştı pərvərdıqori zot ki,əzəmətin iyən qıromiye,baği mandənine.
فَبِأَیِّ آلَاءِ رَبِّکُمَا تُکَذِّبَانِ(28)
çən,ıştə pərvərdıqori kom qılə neməton inkor kardedon?
سْأَلُهُ مَنْ فِی السَّمَاوَاتِ وَالْأَرْضِ کُلَّ یَوْمٍ هُوَ فِی شَأْنٍ(29)
hakəs osmonon iyən zəminədəy,(ıştə ehtiyoci)çəyku tələb kardedə.Əv har ruj qıləy şə`n və koyədəy.
فَبِأَیِّ آلَاءِ رَبِّکُمَا تُکَذِّبَانِ(30)
çən,ıştə pərvərdıqori kom qılə neməton inkor kardedon?
Navnə ayəon dəvomədə ın ayə bə insoni zəmini dimisə bıə kırtə umri işorə kardedə və hamyedə: çokonəye qıləy inson ki,de mardey dastış kuto beydə və boçəy maqiro qıləy ğudrət mevcud ni,çı cəlol iyən cəmoli soyb bıə Xıdovəndi mığobilədə tuğyonqərəti kardedə və çəy neməton təkzib kardedə?.
Dınyo iyən həmmə məxloğat ki,əyo jimon kardedən,həmişə əvəz bıey,həlokət iyən məhfəti mə`rəzədən iyən dayima baği mandə çi,Xıdovəndi mığəddəsə zote.həmonə vohidə Xıdo ki,hestemoni aləmış ofəyə və qırd kəmolaton məzhəre.
Həmonə mevcuduton dayimi surətədə bəy ehtiyocişon heste və de holi zıvoni ıştə ehtiyocon çəyku tələb kardedən.harçənd de sıxani zıvoni qıləy çi nıvoton və hətto çəy vucudi inkor həm bıkon.çın ayəonku omutedəmon:
1-maq,qıləy umumi iyən bə həmmə kəson şomil bıə ğanune ki,ğərəz Xıdovəndi bə həmmə kəson şomil bəbe.
2-ğərəz Xıdo bə hiçkəsi təkyə məkəmon ki,əvon həmmə foonin.
3-hestemoni aləm itərəfo pərvərdıqori cəlol iyən əzəməti məzhəre və co tərəfiku İlahi bə məxloğati bıə rəhmət iyən ehsoni simvole.
4-Xıdovənd ki,dınyoş ofəyə,əvonış bəçəvon ıştən holi vodoəşni.bəlkəm hejo dınyo koon bəştə elm iyən hikməti əsos tədbir kardedə.
