991-ə hissə-Ərrəhmoni surə -46-61 şərifə ayəon
991-ə hissə-Ərrəhmoni surə -46-61 şərifə ayəon
991-ə hissə
وَلِمَنْ خَافَ مَقَامَ رَبِّهِ جَنَّتَانِ(46)
Və boştə pərvərdıqori məğamiku tarsə kəson,dıqlə (vəhışti)boğ heste.
فَبِأَیِّ آلَاءِ رَبِّکُمَا تُکَذِّبَانِ(47)
çən,ıştə pərvərdıqori kom qılə neməton inkor kardedon?
ذَوَاتَا أَفْنَانٍ(48)
dıqlə boğ ki,xəyli iyən tərovətinə doonış heste.
فَبِأَیِّ آلَاءِ رَبِّکُمَا تُکَذِّبَانِ(49)
çən,ıştə pərvərdıqori kom qılə neməton inkor kardedon?
فِیهِمَا عَیْنَانِ تَجْرِیَانِ(50)
həmonə dıqlə boğədə dıqlə çeşmə cariye.
فَبِأَیِّ آلَاءِ رَبِّکُمَا تُکَذِّبَانِ(51)
çən,ıştə pərvərdıqori kom qılə neməton inkor kardedon?
فِیهِمَا مِنْ کُلِّ فَاکِهَةٍ زَوْجَانِ(52)
həmonə dıqlə boğədə har miyvəonku dı nev hozzıye.
فَبِأَیِّ آلَاءِ رَبِّکُمَا تُکَذِّبَانِ(53)
çən,ıştə pərvərdıqori kom qılə neməton inkor kardedon?
Navnə bərnomə dəvomədə ğıyoməti ruji çı mucrim iyən qınokoron cəzo həxədə sıxan votedəbe,ın ayəon bə vəhışti əhli mıkofoti işorə kardedə və çı vəhışti bemisl iyən həyəconinə nemətonku bəzi qıləyniyon aşmardedə.əmmo bə ayəon ənənəvi ğaydəon rioyət kardə holədə imon iyən salehə əməli bə vəhışti daxil bıey meyor təğdım kardey əvəzi,bə Xıdo imoni nəticə işorə kardedə ki,ım həmonə de aləmon ofəyə pərvərdıqori fərmonon mıxolifətiku bıə tars və xofe.
Imi həm zikr kardey lozmıe ki,millətiku i dastə Xıdo bə cəhəndımi tarsi xoto ibodət kardedən və i qrup həm de vəhışti umu.əmmo həyğiyə muminon Xıdo bəçəy Xıdoəti xoto itoət kardedən iyən bəçəy əmron nıpemandeyku tarsedən.həlbəttə ım çı Xıdovəndi məğam və vırəku bıə tarse,nəyinki,çəy zotiku bıə tars. çıro ki,pərvərdıqori mığəddəsə zot bə xof iyən tarsi səbəb beydəni.inson çı Xıdovəndi noməhdud iyən oxoş nıbə zoti həxədə fik kardə zəmonədə,çəy vucudədə tars iyən xofiku qıləy holət bə əməl omeydə.
Xıdoku tarsə insonon bə ın dəlili xoto tarseydən ki,zıneydən Xıdovənd bəçəvon əməlon nəzorət kardedə və əvoni həmmə holon iyən bədə koon əncom doə zəmonədə mışohidə kardedə və çəy norəvoə sıxanon məseydə.bənə qıləy fərzəndi ki,tarseydə çəy pı əv yavə ko bə vırə rosnə zəmondə bıvindo,harçənd əy təmbih həm nıko.ha holədə Xıdoku tars ıştən çı curm iyən qıno vəy qətə amile.aləmon pərvərdıqoriku çı İlahi evliyaon həyo boyis beydə ki,əvon çı har qıləy nopəsəndə koyku bə diyəro bımandon,harçənd ə ko qıno hisob həm nıbu.
Təbiiye ikəs ki,bə jıqo qıləy məğami rəseydə,Xıdovənd həm çəy mıkofoti ziyod kardedə və vəhıştədə nəyinki,iqlə boğ bəlkəm,dıqlə və ya mumkine çəysə ziyodə boğon boəvon hozzı kardedə.ə boğon ki, çeşmə iyən nəhron oviku sirob beydə və çandə nev miyvəon çə vəhışti əhli dastrəsədə ğərol doydə.çın ayəonku omutedəmon:
1-Xıdovənd bəştə bandəon bıə rəhməti məzhəre və çəy mığəddəsə zot bə xofi boyis beydəni.əmmo bə Xıdovəndi bənə ın əzəmətinə dınyo ofəyəkəs və pərvərdıqori unvoni bıə məğam və vırə nisbətədə mərıfət,səbəb beydə ki,imoni əhl ıştə sıxan iyən rəftorədə mığət bıbon iyən çı curm,qıno iyən bə əmri nıpemandeyku bıtarson.
2-vəhıştədə neməton ziyodəti jıqoye ki,hejo bə vəhışti əhli ləzzət baxş kardedə və hiçvaxti bə doj iyən oqıniye boyis nibəbe.
مُتَّکِئِینَ عَلَى فُرُشٍ بَطَائِنُهَا مِنْ إِسْتَبْرَقٍ وَجَنَى الْجَنَّتَیْنِ دَانٍ(54)
(Vəhışti əhl) bəsə dibo ostor iyən dıjd boftə bıə avşumisə təkyə kardəşone iyən çə dıqlə boği miyvəon dastrəsədəy.
فَبِأَیِّ آلَاءِ رَبِّکُمَا تُکَذِّبَانِ(55)
çən,ıştə pərvərdıqori kom qılə neməton inkor kardedon?
فِیهِنَّ قَاصِرَاتُ الطَّرْفِ لَمْ یَطْمِثْهُنَّ إِنْسٌ قَبْلَهُمْ وَلَا جَانٌّ(56)
həmonə vəhıştonədə jimoni həmroon hestin ki,bə cokəson nəzə kardedənin iyən çımon bənav hiç qıləy inson iyən cıni dast bəvon rəsəni.
فَبِأَیِّ آلَاءِ رَبِّکُمَا تُکَذِّبَانِ(57)
çən,ıştə pərvərdıqori kom qılə neməton inkor kardedon?
کَأَنَّهُنَّ الْیَاقُوتُ وَالْمَرْجَانُ(58)
əvon bənə yağut iyən mərconin.
فَبِأَیِّ آلَاءِ رَبِّکُمَا تُکَذِّبَانِ(59)
çən,ıştə pərvərdıqori kom qılə neməton inkor kardedon?
هَلْ جَزَاءُ الْإِحْسَانِ إِلَّا الْإِحْسَانُ(60)
aya çe çoki mıkofot ğərəz çoki ni?
فَبِأَیِّ آلَاءِ رَبِّکُمَا تُکَذِّبَانِ(61)
çən,ıştə pərvərdıqori kom qılə neməton inkor kardedon?
Vəynə ayəon bə vəhışti əhli bənə çı honiyon kənoyədə vəhışti reçinə boğonədə sakin bıey və bəçəvon çı çandə nev miyvəon və ləl-qılon nemətonku bəhrə bardey işorə kardedəbe,ın ayəon bə vəhışti əhli həmonə vəzyəti işorə kardedə ki,əvon de xotırcəmə holədə ıştə peştonışon bə mıtəkkəon dəhaştəşone və ım çəvon qıləy komilə oroməti iyən asayişi dılədə bıey nışon doydə.peşo ə boğon tevsif kardedə ki,çəy miyvəon dastrəsədəy.çən,peşo hamyedə:muminon vəhıştədə coyli nin,bəlkəm Xıdovənd boəvon jimoni həmroon ğərolış doə ta çəvon həmdəm iyən munis bıbon.fevğaladə lətif,reçin,pok iyən iffətinə jimoni həmroon ki,vəhışti əhli çəvonku ləzzət bəbardeyn və çəvon eyşo-işrəti komil bəkarde.
Xıdovənde-Xalığ vəhışti jimoni həmroon vəsfədə hamyedə:əvon fəğət bəştə jimoni həmroon nəzə kardedən və bə cokəson səmt qıləy nəzəşon ni.ım jenon ıştə həyot həmroon bənav de hiç kəsi qıləy rabitəşon bıəni iyən əvon fəğət bəştə jimoni həmroon aşığin.bayin ki,əyo bənə de ləzzəti çəşi bə jenon təmşo kardey iyən ğeyri-ğanuni cinsi rabitəon bıə qınoon mevcud ni,ğasbu ın ayəon dınyoədə bıə çı muminə jenon xısləton bəyon kardedə ki,bə ın xısləton xoto,əvon bə vəhışt ro pəydu kardedən.
Çın ayəon oxonə baxş bə qıləy kulliyə usuli işorə kardedə ki,Xıdovəndi nəzdədə hiç qıləy çokə ko yodo beşedəni iyən Xıdo bə çokə ko soybon çokə mıkofot əto kardedə.dınyoədə de dınyo mıtənosib iyən axırətədə de axırəti mınosib və vəhışt çı Xıdovəndi bə ehsoni əhli bıə ehsone.çın ayəonku omutedəmon:
1-muminon bə dınyəvi həromə ləzzətonku dəvardey xoto,Xıdovənd həm vəhıştədə boəvon uxrəvi ləzzəton hozzı bəkarde.
2-poki,reçinəti iyən lətofət çı vəhışti jimoni həmroon xıslətone və bə jıqo xısləton soyb bıə jenon dınyoədə həm ıştə kəon vəhışt kardey bəzıneyn.
3-Xıdoku omutəmon və bə ehson iyən çoki kardə kəson çokikəmon iyən hiçvaxti cokəson çokiyon çı viro beməkəmon.
