Bə Nəvuzə idi təbəssım-8

Bə Nəvuzə idi təbəssım-8

Əzizə əməson səlom, şımə ruj bə xəyr bıbu, nəvuz idə rujon bə şımə təbrik ərz kardedəm və ım ğəşənqə rujonədə şıməro xəyr və xoşə ləzzəon urzu kardedəm. Mehribonon de məxsusə bərnomə şımə xıdmətədəm, jəqo ki zıneydəmon İroni mədəniyət və fikədə, jen, çı eşğ, perəse və zandey simvole. Jen kədə ıştı xalısonə mehr, məhəbbət və eşği pevlo iyən kə hol-həvo vey çok və xoş kardedə. ımruj bə nəvuzə idi əyyomədə şoəti icod kardeyro, jenon rol və vırə barədə sıhbət bəkamon. Şıməni dəvət kardəm dəmə bə ico bımandən və bə ım bərnomə quş bıdənən.

Xosə tolışon, qıləy ğəşənqə təbirədə ğeyd bıə ki vaxti jen təbəssım kardedə, quya kə həmmə kərpocon həm dəy sıredən. ailədə şoəti vaxti icod bəbe ki kə jen və inə şo və xoşhal bıbun. Xıdo həm jəqo jenonış xalğ kardə. Xıdo jeni bənə vıl lətif, bənə band səbrin, bənə ov, cari və məhəbbətin xalğ kardəşe. Xıdo çı jenon inə bey xusiyəti və ım vırə barz karde iyən inə bey ğeyməti, həm beheşt zıneydə.

Xıdo Kərimə Ğıronədə, jenon kədə oroməti mehvər zıneydə və vəyə kardey metodi bə ım oroməti rəsəy qıləy hələkəroonku bə hisob vardə. Həminə barədə Romi surə 21 minnə ayədə hamiyəşe:

“Və çəy nışonəonkue ki, şımə ıştəniku jimoni həmroon boşımə ofəyəşe ta çəy kənoədə orom bıbənən və şımə deştə jimoni həmroon miyono qıləy zumandə əloğə və rəhmətış ğərol doe. beşək bın(ilahi nemətədə) bo fik-fam kardə dastə, ğətiyə nışonəon heste.”

Im ayə nışo doydə ki vəyədə Xıdo, bo jenon və mırdon məxsusə oroməti ğərol doəşe.

Əmmo əzizə duston, şoəti ləzzəon icod kardey, ailədə oroməti icod kardey roonku qıləyni bə hisob omeydə. Çand ruj bə Bəharə fəsli mandə əyyomədə, jenon nə fəğət kə təmiz kardedən, bəlkəm deştə lətifə hınə rohiyə vositə, colibə navəjə iyən nuyəvardəti əncom dodən ki kə fəzo lətif kardey və şoəti bois bəbe. Im koon əcumlə, kə dekorasiyə və otağon ranqi əvəz kardey, kanə parçəon de tojə parçəon əvəz kardey, tojə vılon hırye iyən bə kə fəzo xoşə ətro doe, de ailə uzvon bə ico tojə oləton hırye iyən co koon ki bə jenon ohdəy.

Mehribonon, Nəvuzə idi əyyomədə, Jenon de məxsusə şoəti, muxtəlifə şinion iyən ləzətinə xorəkon hozzo və ıştə ailəro vey xoş və çokə ləzzəon icod kardən. Kali jenon deştə hınə dasti vositə, 7 sini surfə duteydən və kali çəvonku 7 qılə sini piyolə de sofali soxteydən və əy de xoşə şikil, rəssoməti kardedən. kali jenon idi səməni pateydən və bə ıştə xışavəndon həm doydən, Nəhayətədə ım jenonin ki idə rujon və əyyomi vey ğəşənq və xoş kardən.

İroni Yolə Rəhbər Həzrəte Ayətullah Xamenei ki bə jenon erjinə nəzəş heste, ailədə jenon barədə hamiyəşe: “be şək şoəti hiss və pisixi iyən oroməti əlovə kardeyədə inə jimon məhorəton rol bənə kə və ailə mudir, inkor nıkardənine.”

Kədə şoəti mudiriyət kardey, həmçınin şoəti, sıre və mısbətə hissi ləzzəon əlovə kardey, bə dədə və inə ohdəy, əmmo inə bə kə fəzo mudiriyət kardey xoto, ım barədə mırdiku navəjəne. Jen şoəti iyən şovğ icodəkəy və həmişə səyocəhdədəy. əv ailə məhəbətinə sutune, və bə ailə uzvon rohiyə və atifəon diğğət kardedə.

İnə ailə mərkəzədəy ki ailə həmmə uzvon dəy səmimiyə rabitəşonışoe, iyən bə çəy xoşhali xoto, vey umid və tərovətin bəben. Jəqo ki inə karde bəzne kə mohiti çok surəti mudiriyət ko, əqər əv şo və xoşə rohiyəş bıbu, çəy hırdənon həm şo və zumandə rohiyə bəben. Nəvuzə id və tətilə əyyom vey çokə fırsət heste ki ailə cəm iyən hırdənon və valedeyni miyonədə, mıhkəmə rabitə ico bıbu, iyən tojədən ım inə heste ki karde bəzne həminə əyyomədə, səmimiyə votımonon amil bıbu, ki ın ko ailə atefiyə rabitəon mıhkəm kardey bois bəbe.

Əmmo əzizon, jenonro çı ımrujnə dınyo muşkilatonku qıləyni ıme ki kali ıstereson çəvon jimonədə muşahidə bıdə, inə şoətion bəştə ailə ovoştono. Kali pisixoloqon etığadışon heste ki jenon şo kardey kırtə roy ıme ki çəvon ıstereson kam kəmon. Həmçınin jeniku, mırdi himoyədorəti rol və bəy mıtəğobilə ehtırom noe, jeni ıstereson kam kardeyədə vey muhimmə roli ifo kardeydə. mırd de həyot həmro və hırdənonku həmmə curnə himoyəon xususi jeniku atefiyə himoyə kardey vositə, karde bəzne çəy ıstereson məhv ko və bəy oroməti və şoəti hədyə bıdə. Jeni ıstereson kam kardeyədə, mırdi məhəbətnə sıxən, vey təsirine. Həminə barədə İmom Rıza(ə) bə muhimm və colibə nuktə işorəş kardəşe, ə Həzrət hamiyəşe: “ har vaxt mırd bəştə həyot həmro bıvoti ki az tıni pidəme, jeni ğəlbədə qıləy eşğ icod bəbe ki hiç vaxt çəy ğəlbədə xarıc nibəbe.”

Bəle mehribonon, mırd ıştə zıvon iyən de kəliməon vositə karde bəzne, jeni dılədə eşği şuləon icod və çəy eşği əlovə ko, iyən jen həm bənə eşğ və məhəbbəti ilahə, həmonə eşği bə lştə ailə uzvon yəni ıştə həyot həmro və hırdənon hedyə bədoy.

Əlovə bə ım, mıtəğobilə ehtırom iyən həyot həmroon bə yande ehtırom noe həm jimonədə şoəti bois bəbe. Ailədə etırom və ədəb, ıstereson və bədə əxloğon kam kardedə iyən hırdənon əqə tovhin, təhğir mohitiku diyəro bıbun, bə vey ozavziye bərəsən.

Nəvuzə idə əyyom, bə yande eşğ doe əyyome, nuyə sori bino bey zəmonədə ailə uzvon bə yande təbrik voteydən və yande maç kardedən və de idəbaxşe və hədyə doe vositə, məhəbbəton əlovə kardedən iyən kə fəzo, şo kardedən. Həğiğətədə nəvuzə id bənə təbiəti tojə perəsey iyən qıləy idə mərosime ki jenon çəy bərpo kardeyədə vey muhimmə rulışon heste.

Xosə əməson bə ım bərnomə quş doe xoto şıməku təşəkkur kardəm, dəvət kardəm de tolışi Rədio bə ico bımandən və bə ımrujnə bərnoməon idomə quş bıdənən ki koy həmroon bə şımə xıdmət təğdim bəkan.