Mıborəkə Rəməzonə manqədə, Tolışon adət-ənənon(2)

Mıborəkə Rəməzonə manqədə, Tolışon adət-ənənon(2)

Muminə tolışon səlom, şımə taat iyən ibodəton ğəbul bıbu, Rəməzanə manqədə məxsusə mətləbi bəşımə təğdim kardəm, çəyku bənav urzum heste ki ın manqi mənəvi fırsətonku çok istifodə kardey iyən xıdo mehmonəti manqədə ilahi məğfirət bə həmmə dindaron xususi bə dınyo tolışon ğısmət bıbu.

Bənə dəvardə bərnomə, ımruj həm bə rujə mo aid bıə məxsusə mətləbi ğolibədə tolışə xalği adəton iyən məxsusə mərosimonku sıhbət bəkamon.

Əzizə həmzıvonon, Rəməzan mıborəkə manqədə, Qiloni tolışə məntəğəonədə xususi dionədə, əqə qıləy zoə korpə bala tojədən bə dınyo boy, çəy nomi “Rəməzan” bənon, hukmən ım tojə bə dınyo omə hırdəni ğədəm vey mıburək zıney bıdə. ijən əqə zoə çı Əmirəl Muminin Həzrəte Əli(ə)-i şəhodətə şəvonədə bə dınyo boy, çəy nom Əli intixob bəkan.

Əmmo ğədimə zəmonədə, Tolışə şirə merdon, Rəməzan mıburəkə manqi hilal ya xod ovuşemi vindey cəhəto, ıştə məhəllə məçiton kənoədə iyən Rəməzanə manqi bino bey bənav, deştə məntəğə ruhani və yolə dindaron bə ico, cəm bıdə bin iyən de təştədə ov ekardey, bə millət Rəməzanə mıburəkə manqi bino bey elan kardedə bin.

Im mərosim de məxsus və xususi adət-ənənon bərpo əbi və Tolışə millət ım mərosimiro vey ehtirom nodə bin, əmmə ısət de texnoloqiyaon bə inkişof rəsey Rəməzan mıburəkə manqi ovşum iyən hilali videy de astronomiyə muasir əbzaron vositə əncom iyən muxtəlif mediyaon tərəfo elan bıdə.

Ğədim əyyomədə, Tolışə millət vaxton təyin kardeyro, suki vanqi vey çokə amil zıneydə bin. mıburəkə Rəmezanə manqədə iyən çəsenə vaxti zəmonədə, suki vanq, Tolışə milləti vey çokə oğoəkə amil be.

İjən çəsenə zəmonədə, Məntəğə və məhhələ ruhanion iyən yolə dindaron bə panə kum şeydə bin və de mınocot iyən dıvo handey, di sakinon və əholi çəsenəro oğo əkardin.

In manqi mənəvi ləzəonədə xususi səhər və iftori faxtədə İroni tolışonro həm dıvo kənən iyən ibodətonədə səbr və istiğoməti ıştə fikədə oqətən.

Imrujnə məxsusəs bərnomə sə be, Xıdoku tələb kardəm ki Rəməzanə manqədə bə həmmə dindaron xususi bə Tolışon həm ın mənəvi surfəku rəhmət iyən bərəkəton peqətey ruzi bıdə, Amin.