Mıborəkə Rəməzonə manqədə, Tolışon adət-ənənon(3)

Mıborəkə Rəməzonə manqədə, Tolışon adət-ənənon(3)

Əzizə tolışon səlom, şımə ləzəon mənəvi iyən de Xıdo inoyəti bə ico bıbu.

Rujə moədəmon, Xıdo mehmonəti manqədə şıməro ğəşənqə hol-əhvoli urzo kardəm, Xıdo bə həmmə tolışon ğısmət bıkə ki ın manqi mənəvi erjinə dəğiğəonku istifodə kon.

Imrujnə məxsusə bərnomə ın baxşədə az səidi vıjniyə mətləbi bəşımə təğdim kardəm, dəmə bə ico bımandən.

Qiromiyə əməson, Tolışon mədəniyətədə, rujə manq vey məxsusə ehtıromış heste iyən tolışon əy bənə qınohonku pok bey manqi zıneydən. Tolışon ım manqədə, de muxtəlif roon vositə ıştəni bə Xıdo dərqoh nez kardən və dəy unsiyət qətedən, əcumlə de Ğıroni ğiroət iyən təfsiri və məçiton iyən dini iclosonədə iştirok kardey vositə.

Imrujnə rujonədə, İroni Tolışə məçitonədə qırd Rəməzan mıburəkə manqi məxsusə bərnoməon bərpo bıdən.

Co tərəfiku Tolışə şəhr iyən dion məhəlləonədə və de tolışə merdon iyən jenon iştiroki vositə, kali dovtələbonə ya xod dıştə meyli bıə icloson və bərnoməon həm bərpo bıdən ki Ğıroni ğiroət kardey və ım əziz iyən mıburəkə manqi məxsusə dıvoon handey əcumlə həminə bərnoməonin ki Tolışə rujə əqəton bərnoməonku co qıləyni bə hisob omeydə.

Əlbətə işorə kəmon ki ım dovtələbə bərnoməon, kədə iyən veyni de Tolışə muminə jenon vositə əncom bey, qıləy adət heste ki dəvardə soronədə vey bərpo əbi.

Yə məsələn Şəbanə manqi oxonə rujonədə, Tolışə jenon de məhəliyə şinion pattey vositə bə Rujə mo pişvoz şeydən, ım şinionku bəbe bə xavloə nun, fətir və tastərə işorə kəmon.

Jığo adət bıə ki Tolışə xalğ kədə ıştə i minnə iftoriyə surfə de həminə məhəliyə şinion dərosteydən.

Əzizə əməson, İnşaəllah vəoməy rujon ijən Rəməzanə manqədə bıə Tolışə milləti xususi adəton barədə bə şımə xıdmət məlumat bədamon.

İjən ım əziz və mıburəkə manqədə, Xıdoku şıməro məğfirət və baxşışi tələb kardəm, Xıdo rəhmət, inoyət və lutfi sayədə bımandən.