Mıborəkə Rəməzonə manqədə, Tolışon adət-ənənon(4)

Mıborəkə Rəməzonə manqədə, Tolışon adət-ənənon(4)

«و هذا شهرالانابة و هذا شهر التوبة و هذا شهر العتق من النّار».

 Mehribonon səlom, rujə manqədə şımə hol-əhvol mənəvi bıbu, ım manqi rujonədə şıməro xəy, səadət iyən Xıdo dərqohədə ibodəti tovfiği urzu kardəm və dıvo kardəm ki şımə nımoj-rujəon ğəbul bıbu.

Əzizon ım əziz və bərəkətinə manqədə, de məxsusə bərnomə şımə xıdmətədəmon, ım məcmuə mətləbonədə pidəmone bə rujə manqədə bıə Qilon, xususi Tolışə xalği miyono bıə kanə və torixiyə adət-ənənon işorə və diyə kəmon. dəvət kardəm dəmə bə ico bımandən.

Əzizə həmzıvonon, Tolışə xalği nəzəku, Rəməzonə manq ya rujə mo yəni bədi və bevəcionku diyəro mandey və bə ğəşənqion rəsey. 

Tolışon etığadışon heste ki rujə mo qıləy fırsəte ki inson bəştə zoti cəlo bədoy, kin-kudurəton bə kəno nodə iyən şəytoniku diyəro bey məşğ kardə.

Rujə mo Tolışon miyonədə, səmimiyət iyən mehribonçiyəti əlovə kardedə, Tolışə xalğ, Rəməzonə manqədə məçitonədə qırdə bəben və de yande və cəmaət surəti nımoj voteydən, iyən ruji de ibodəton və nımoj-rujəon ğəbul bey bə yande təbrik dodən. çəvon zıvonədə ın iborət daimən tikror bıdə: “şımə nımoj rujəon ğəbul bıbu”.

Əmmo əzizə duston, Rujə moədə bıə qıləy adət ki tolışə xalği miyono vindey bıdə ıme ki, 2 ya 3 ruj Rəməzanə manqi bənav, yolə şəxsiyəton və məntəğə piyə odəmon səyo cəhd kardən ki manqi ovşum(hiloli) bıvindon. Bə çəy xoto bə dion vey barzə məntəğə iyən bandon bəşen və bə osmon diyə kardedən.

Tolışon, bə Rujə mo vey erjin zıney xoto, 3 ruj Rəməzonə manqiku bənav, rujə qətey bino kardən və jığo bə rujə mo pişvaz şedən.

Tolışon çəsenə iyən iftori surfəonədə, vey məhəlliyə xorəkon hestin ki veyni de Tolışə jenon vositə pattey bıdə, ım xorəkon bənə, şıt iyən çəyku məhsuloni bənə bırzə şıt, firni, muxtəlif xavloon, məhəliyə havzə ya səbzi ki ıştən boğonku çınyəşone, aş, cur bə curə kuku əcumlə vuzə kuku, Çeğertemə və məhəliyə kijəonku iborətin.

Əzizə əməson, ımrujnə məxsusə bərnomə həm bə şımə təğdim be, ijən vəoməy rujonədə, Tolışə milləti miyono bıə Rujə manqi məxsusə adəton barədə bə şımə məlumat bədamon.

Tojədən ım əziz və mıburəkə manqədə, Xıdoku şıməro məğfirət iyən baxşışi tələb kardəmon, umidımon heste ki ım manqədə Xıdo rəhmət, inoyət və lutf bə şımə ğısmət bıbu.