Mıborəkə Rəməzonə manqədə, Tolışon adət-ənənon(5)

Mıborəkə Rəməzonə manqədə, Tolışon adət-ənənon(5)

اَللّهُمَّ رَبَّ شَهْرِ رَمَضانَ            الَّذى اَنْزَلْتَ فیهِ الْقُرْآنَ       وَافْتَرَضْتَ على عِبادِکَ فیهِ الصِّیامَ          صَلِّ عَلى مُحَمَّدٍ وَ آلِ مُحَمَّدٍ        وَ ارْزُقْنى حَجَّ بَیْتِکَ الْحَرامِ فى عامى هذا وَ فى کُلِّ عامٍ                     وَ اغْفِرْ لى تِلْکَ الذُّنُوبَ الْعِظامَ    فَاِنَّهُ لا یَغْفِرُها غَیْرُکَ         یا رَحْمنُ یا عَلاّمُ.

Muminə tolışon səlom, şımə taat iyən ibodəton ğəbul bıbu, Rəməzanə manqədə məxsusə mətləbi bəşımə təğdim kardəm, çəyku bənav urzum kardəm ki ın manqi mənəvi fırsətonku çok istifodə kardey iyən xıdo mehmonəti manqədə məğfirət bə həmmə dindoron xususi bə dınyo tolışon ğısmət bıbu.

Bənə dəvardə bərnomə, ımruj həm bə rujə mo aid bıə məxsusə mətləbi ğolibədə tolışə xalği adəton iyən məxsusə mərosimonku sıhbət bəkamon.

Əzizə duston, İroni tolışon, bə səhər ya çəsenə “sukə xonə” ya “Pəşə Sur” voteydən, tolışon zıvonədə, sur yəni şanqonə və “pəşə sur” yəni qıləy xorək ki şanqonə bəpeşt, hardey bıdə.

Dəvardə soronədə, çunki məse iyən vindeyro muasir əbzoron nıbin, xususi mıburəkə rəməzonə manqədə, Tolışonro, vaxt və zəmoni təiim kardey koədə, suk vey çokə vəsilə iyən əbjor be.

Əlbətə, bandə məntəğəonədə, pəson çərdovne sədo, ki de pəsəvonon hay-huy kardey adəti bə ico be, vağt və zəmoni oğoəti iyən tənzim kardeyədə 2 minnə çokə amil be.

Həmçınin rujə mo iyən çəsenə zəmonədə, 3 minnə amil ki bə Tolışə milləti oğo bey komək əkardi, dionədə ğədimi dindoron, piyə merdon və məlloon bin ki millətiku bənav oğo əbin və bəştə kə kum əşin iyən de barzə vanqi, dıvo və mınocoton handeydə bin ta ıştə hamsuyə və həmməhəlliyon bə səhər xoraki harde oğo bıkon.

Çəsenədə xorak harde zəmoni təyin kardeyro co qılə amil, “Talışə xıle” zıney bıdə be.  jəqo ki səhər zəmoni zıney bəpeşt, ailə yolə şəxs, kəybə oj iyən bə şərğ səmti diyə əkardi ta osmoni şərğədə bıə sıə ranqi muşahidə ko, peşo çəmaət bə çəsenə hardey məşğul əbin iyən tosə xorək hardey oxo, bə hırdənon kəybə oj kardey icozə dodə nıbin, boçiki əvon eteğadışon hest be ki əqə sıbi nur bə kə daxil bıbu, həni çəsenə hardey cuiz ni.

Çəsenə hardey bəpeşt, çı osmoni şərğ səmti sıə ranqi vindey cəhəto, i nəfər kəyku xarıc bıdə be. əqə osmoni şərğ səmtiku sıə ranq bə siyohə ranqi əvəz bey holədə bıbu, kə əholi səhər xorəki hardeyku pəpe dast bıkəşin.

İşorə kardey lozime ki həminə adəton əqəçı tikəy qim bıə, əmmo ijən hestin bəzi tolışon ki jığonə məxsusə mərosimon dəvoneydən. Xıdoku tələb kardəm ki Rəməzanə manqədə bə həmmə dindaron xususi bə Tolışon həm ın mənəvi surfəku rəhmət iyən bərəkəton peqətey tovfiği ruzi bıdə, Amin.