Mıborəkə Rəməzonə manqədə, Tolışon adət-ənənon(6)

Mıborəkə Rəməzonə manqədə, Tolışon adət-ənənon(6)

وَ الْحَمْدُ لِلَّهِ الَّذِي جَعَلَ مِنْ تِلْكَ السُّبُلِ شَهْرَهُ شَهْرَ رَمَضَانَ شَهْرَ الصِّيَامِ وَ شَهْرَ الْإِسْلاَمِ‏

وَ شَهْرَ الطَّهُورِ وَ شَهْرَ التَّمْحِيصِ وَ شَهْرَ الْقِيَامِ الَّذِي أُنْزِلَ فِيهِ الْقُرْآنُ هُدًى لِلنَّاسِ وَ بَيِّنَاتٍ مِنَ الْهُدَى وَ الْفُرْقَانِ‏

Mehribonon səlom, rujə manqi mənəvi ləzəonədə şıməro xəy, səadət iyən Xıdo dərqohədə ibodət tovfiği urzu kardəm və dıvo kardəm ki şımə nımoj-rujəon ğəbul bıbun.

Əzizon ım bərəkətinə manqədə, de məxsusə bərnomə şımə xıdmətədəmon, ımruj həm pidəmone bə rujə manqədə bıə Qilon, xususi Tolışə xalği miyono bıə kanə və torixiyə adət-ənənon işorə və diyə kəmon, dəvət kardəm dəmə bə ico bımandən.

Xosə Tolışon jəqo ki dəvardə bərnoməonədə votımone, ğədim əyyomədə, Tolışə millət çəsenə zəmoniku xəbə do beyro, bə suki vanqi diğğət əkardin. əmmo de ımrujnə muasirə texnoloqiyaon vıcudi, vey kam peydo bıdən kəsoni ki de jığonə adəti jimonışon bıbu. əlbətə kali şəxson hestin ki bandə vırəonədə jimon kardedən iyən de bə ovşumi diyə kardey vositə, cəsenə vağtiku oğo bıdən, jəqo ki əqə ovşum osmoni məşriğədəy, çəy vaxt rəsə ki çəsenəro oğo bıbun.

Əmmo Rujə moədə bıə Tolışə xalği miyono co qılə çok və ğəşənqə adət ıme ki Tolışon çəsenə və səhər zəmonədə, ıştə hamsuyəon oğo əkardin. jığo ki, tolışə xalğ məhəlləonədə ıştə hamsuyəon kəybəon kuyeydə bin iyən vanq əkardin: səhəri faxte, çəsenə zəmone, oğo bıbən.

İjən işorə kəmon ki ım ğəşənqə adət həm bə ımrujnə rəğəminə muasirə əbzaron icod bey xoto, vey kam bıə, iyən ısət çəsenəro oğo bey de saət, telefon və mobili vositə, əncom bıdə.

Ğədim soronədə çəsenə oğoəti de hamsuyəon xususi səhərə xoraki patteyro oğo bıə jenon vositə həm əncom əbi, ın ko jıqo be ki çəsenə və səhəri hardey zəmonədə, diədə kəon çiroğ, qılə qılə yandey bəpeşt ruşin bıdə be.

Bəle əzizon, mıburkə Rəməzonə manq jəqo Tolışon miyonədə əziz iyən ehtıromin zıney bıdə ki əvon pidəşone ta hamsuyəon iyən xışavəndon həm ım bərəkətinə manqi fırsətonku istifodə kon.

Tolışə xalği miyonədə co qılə erjin iyən tarbiyəvi adət ım be ki çəsenə və səhəri hardey zəmonədə, ıştə ailə həmmə uzvon hətto hırdənon həm hıteyku oğo əkardin və bo səhəri hardeyro qıləy yolə surfə oğandey fikədə bin.

Çəsenə mənəvi ləzəonədə İroni tolışonro həm dıvo kənən, ijən vəoməy rujonədə, Tolışə xalği miyono bıə Rujə manqi məxsusə adəton barədə bə şımə məlumat bədamon, Xıdoku şıməro məğfirət və baxşışi tələb kardəmon, şımə ibodəton ğəbul bıbu.