Mıborəkə Rəməzonə manqədə, Tolışon adət-ənənon(9)
Mıborəkə Rəməzonə manqədə, Tolışon adət-ənənon(9)
اَللَّهُمَّ صَلِّ عَلَى مُحَمَّدٍ وَ آلِهِ وَ إِذَا كَانَ لَكَ فِي كُلِّ لَيْلَةٍ مِنْ لَيَالِي شَهْرِنَا هَذَا رِقَابٌ يُعْتِقُهَا عَفْوُكَ أَوْ يَهَبُهَا صَفْحُكَفَاجْعَلْ رِقَابَنَا مِنْ تِلْكَ الرِّقَابِ وَ اجْعَلْنَا لِشَهْرِنَا مِنْ خَيْرِ أَهْلٍ وَ أَصْحَابٍ
Mehribonon səlom, rujə manqi mənəvi ləzəonədə şıməro xəy, səadət iyən Xıdo dərqohədə ibodəti tovfiği urzu kardəm və dıvo kardəm ki şımə nımoj-rujəon ğəbul bıbun.
Əzizon ım bərəkətinə manqədə, de məxsusə bərnomə şımə xıdmətədəmon, ımruj həm pidəmone bə rujə manqədə bıə Tolışə xalği bəzi adət-ənənon işorə kəmon, lutfən dəmə bə ico bımandən.
Xosə həmzıvonon, jəğo ki işorə kardımone, Tolışə xalği iftori surfəonədə muxtəlifə məhəlliyə xorəkon vindey bıdə. şıti məhsulon, məhəlli nun, ləzətinə xavlo iyən cur bə curə aşon ki de təbii məteriyalon hozzo bıdən.
Əmmo co qılə muhimmə məsələ ki ğədim tolışonro veyni bandiyə məntəğəonədə diğğəti mərkəzədə be, rujə mo mıddət, rujəon aşmardemon iyən manqi oxnə ruji təin karde be. ımi hisob kardeyro jığo adət be ki bəzi vırəonədə tolışon rujə manqiku har ruj dəvardey bəpeşt nəxə kisə, “duə kisə” ya pəsi pustiku dutə bıə kisədə qıləy qədə sıği ekardedə bin, əvon har haftə de sığəon aşmarde rujə mo rujon və çand qılə rujə qəteyku oğo bıdə bin. Sığon miğdori bə 30 qılə rəsey faxti, rujə mo oxo elan əbi iyən fıtrə idi faxte.
Həminə barədə co qılə adət-ənə ım be ki Tolışə banədiyə məntəğəonədə jimon kardə cəmaət, eteborinə mənbəonku rujə idi zəmoni aqah bey iyən çı mıborəkə Rəməzanə manqi rujon aşmardemonədə səhv nıkardeyro, bəştə məhəllə ya ailə uzvun qıləyni əvotin ki bə yolə məntəğonədə jimon kardə məlloon muraciət kon iyən Rəməzonə manqi oxonə ruj, ya bə rujə idi çand ruj mandey barədə çəvonku soval dəparson.
Kali şəxson həm de har ruj rujə qəte aşmardemoni bərobər, təsbih donəonku qıləyni co əkardin, donəon bə 30 qılə rəsey bəpeşt, Rəməzanə manqi oxonə ruj həm elan əbi. ın koy dəğiğ surəti əncom doeyro təsbih qıləy məxsus vırədə ğəror doe lazim be ta co kəs bəy dast məjəni.
Əzizon, rujə mo niməku dəvardə iyən ın manqi mənəvi fırsət de surə`ti dəvardeydə. mənəvi ləzəonədə İroni tolışonro həm dıvo kənən.
ijən vəoməy rujonədə, Tolışə xalği miyono bıə Rujə manqi məxsusə adəton barədə bə şımə məlumat bədamon, Xıdoku şıməro məğfirət iyən baxşışi tələb kardəmon, şımə ibodəton ğəbul bıbun.