Mıborəkə Rəməzonə manqədə, Tolışon adət-ənənon(10)

Mıborəkə Rəməzonə manqədə, Tolışon adət-ənənon(10)

Muminə tolışon səlom, şımə taat iyən ibodəton ğəbul bıbun, Rəməzanə manqədə məxsusə mətləbi bəşımə təğdim kardəm, çəyku bənav urzum heste ki ın manqi mənəvi fırsətonku çok istifodə kardey iyən xıdo mehmonəti manqədə İlohi məğfirət bə həmmə dindaron xususi bə dınyo tolışon ğısmət bıbu.

Bənə dəvardə bərnomə, ımruj həm bə rujə moədə bıə tolışə xalği adəton iyən məxsusə mərosimon i baxşi işorə kardedəmon.

Əzizə duston, Kərimə Ğıroni Duxani surədə Ğədrə şəv, de mıburəkə xusiyəti bəyon bıə, ijən Ğədr surədə ım şəv, 1000 manqon sə vey çokə şəv zıney bıdə. Im əzizə şəvədə, Ğıron nozil bıə, iyən bo 1 sori mıddət çı dınyo həmmə koon hisob-kitob de Xıdovənde xalıği Huccəti vositə imzo iyən təiin bəbə.

Əmmo həmonə Əhyo ya Ğədrə şəv, məlum ni kom şəve! jığo votey bıdə ki ım əzizə şəv bənə har sori şəvonku qıləyni Rujə mo oxonə 12 qılə şəvonədəy ki veyni çəy ehtimol ıme ki manqi 19, 21 ya 23 minnə şəvonədə bıbu.

Bəzi rəvoyətonədə Ğədrə şəv çı rujə mo 23 minnə şəv ğeyd bıə. Im əzizə şəvədə xususi dıvoon vey handey siforış bıə. Həmçınin ğədrə şəvədə hıte mızəmmət bıə iyən çəy əvəzi oğo mandey bənə vey mıstəhəb koy zıney bıdə.

Bə rəvoyəton əsos, Ğədrə ruj həm bənə çəy şəvi vey əziz iyən erjinə vırəş bəbe. Həmonə şəvədə Xıdo dərqohədə dıvo iyən baxşış tələb kardey vey siforış bıə, jəqo ki Xıdo Rəsul(s) həm ım şəvədə bə dıvo iyən mınocoti vey təkidış kardə iyən ıştən bəy məşğul bıdə be.

Əmmo Xosə Tolışon, jəqo ki dəvardə bərnoməonədə ərz kardımone, Tolışə millət bə Mıborəkə Rəməzanə manqi Ğədrə şəvon, əyo ya əhyoə şəv həm votedən.

Əhyoə şəvonədə xususi Həzrəte Əli(ə)-i şəhodətə şəv iyən Rujə mo 27 minnə şəvədə, Tolışə millət məçitonədə tosə sıb oğo mandən iyən bə dıvo-mınocoti məşğulin.

İroni bəzi tolışon miyono ım bovə iyən eteğod heste ki həminə Ğədrə şəvonədə Həzrəte Xezr(ə) dəvardedə və har kəs har niiyət iyən hacətış bıbu, əy bə vırə bərosne.

Şıməku tələb kardəm ki əhyoə şəvonədə Həzrəte İmom Zəm(əc)-i zuhuriro dıvo kardey çı yodo bıməkənən.

İjən vəoməy rujonədə, Tolışə xalği miyono bıə Rujə manqi məxsusə adəton barədə bə şımə məlumat bədamon. Sənibəton ım əziz və mıburəkə manqədə, Xıdoku şıməro məğfirət iyən baxşışi tələb kardəmon, umidım heste ki ım manqədə Xıdo rəhmət, inoyət və lutf bə şımə ğısmət bıbu.