Mıborəkə Rəməzonə manqədə, Tolışon adət-ənənon(11)

Mıborəkə Rəməzonə manqədə, Tolışon adət-ənənon(11)

اَللَّهُمَّ اشْحَنْهُ بِعِبَادَتِنَا إِيَّاكَ وَ زَيِّنْ أَوْقَاتَهُ بِطَاعَتِنَا لَكَ وَ أَعِنَّا فِي نَهَارِهِ عَلَى صِيَامِهِ وَ فِي لَيْلِهِ عَلَى الصَّلاَةِ وَ التَّضَرُّعِ إِلَيْكَ‏وَ الْخُشُوعِ لَكَ وَ الذِّلَّةِ بَيْنَ يَدَيْكَ حَتَّى لاَ يَشْهَدَ نَهَارُهُ عَلَيْنَا بِغَفْلَةٍ وَ لاَ لَيْلُهُ بِتَفْرِيطٍ

Mehribonon səlom, rujə moədə şıməro xəy, səadət iyən Xıdo dərqohədə ibodəti tovfiği urzu kardəm və dıvom heste ki şımə nımoj-rujəon ğəbul bıbu.

Əzizon ım bərəkətinə manqədə, az səidi de məxsusə bərnomə şımə xıdmətədəm, ım bərnomədə həm bə Tolışə xalği kanə iyən torixiyə adət-ənənon tikəy işorə bəkamon. Dəvət kardəm dəmə bə ico bımandən.

Xosə həmzıvonon, bənə dəvardə bərnomə ımruj həm bə Tolışə xalği miyono bıə Əhyoə şəvə mərosimi işorə bəkamon.

Ğədrə əyyom 6 ruj, yəni Rəməzanə manqi 19 minnə rujku tosə 24 dəvomış heste, ki həm şəv, və həm rujonku iborət bıdə.

Tolışon miyono Əhyoa şəvi mərosimon, xususi adət-ənənon iyən dıvoonış heste.

Tolışə millət bə həminə bərəkətin iyən mənəvi fırsətış bıə şəvon ehtirom noe xoto, har zəmoniku vey ıştəni oqəteydən. Xususi mıborəkə Rəməzonə manqi 21 minnə rujədə ki de Əmirəl-Mumenin, İmom Əli(ə)-i şəhodətə ruji sorəqardışi bərobəre.

Tolışə xalğ İmom Əli(ə)-i şəhodətə rujədə, əzodorəti mərosimi kənoədə bə məxsus mınocot iyən dıvoon zomzomə kardey mşğulin. Tolışon bə məçiton iyən məzhəbi vırəon şedən və ım muğəddəsə vırəonədə ıştə mənəvi koon əncom dodən.

Hətto kalion, de məhəllə seyedon iyən məlloon bəştə kə dəvət kardey vositə, Ğıroni təlovət kardən iyən dıvo və mınocot mərosim kədə dəvoneyən, əvon şəvədə oğo mandən iyən kollektiv surəti dıvo handey icloson dəvoneydən.

Məfotih dıvo kitobi məxsus mınocoton handey, ihsan doe, Ğıron bə sə noe iyən de bə İmom Əli(ə)-i təvəssuli Xıdo dərğohədə baxşış tələb karde əcumlə muhimmə koonin ki Tolışə xalğ həm Ğədrə şəvi mərosimon ğolibədə əvoni əncom dodən.

Ğədrə şəvon fırsətiku çok istifodə kardey bəşımə ğısmət bıbu iyən İnşaəllah ki ın barzə şəvonədə şımə zomzoməon bə vırə bırəsi.

De Xıdo koməki, vəoməy rujonədə ijən Rəməzanə manqədə bıə Tolışə milləti xususi adəton barədə bə şımə xıdmət məlumat bədamon.

Xıdoku şıməro məğfirət və baxşışi tələb kardəm, İlohi inoyət və lutfi sayədə bımandən.