Mıborəkə Rəməzanə manqədə, Tolışon adət-ənənon(14)

Mıborəkə Rəməzanə manqədə, Tolışon adət-ənənon(14)

اَللّهُمَّ رَبَّ شَهْرِ رَمَضانَ الَّذى اَنْزَلْتَ فیهِ الْقُرْآنَ وَافْتَرَضْتَ على عِبادِکَ فیهِ الصِّیامَ صَلِّ عَلى مُحَمَّدٍ وَ آلِ مُحَمَّدٍ وَ ارْزُقْنى حَجَّ بَیْتِکَ الْحَرامِ فى عامى هذا وَ فى کُلِّ عامٍ وَ اغْفِرْ لى تِلْکَ الذُّنُوبَ الْعِظامَ فَاِنَّهُ لا یَغْفِرُها غَیْرُکَ یا رَحْمنُ یا عَلاّمُ.

Mehribonon səlom, rujə manqi mənəvi ləzəonədə şıməro xəy, səadət iyən Xıdo dərqohədə ibodəti tovfiği urzu kardəm və dıvo kardəm ki şımə nımoj-rujəon ğəbul bıbun.

Əzizon ım bərəkətinə manqədə, de məxsusə bərnomə şımə xıdmətədəmon, ımruj həm pidəmone bə rujə manqədə bıə Tolışə xalği bəzi adət-ənənon işorə kəmon, lutfən dəmə bə ico bımandən.

Səmimi həmzıvonon jəqo ki işorə kardemone, ğədim əyyomədə tolışon de bə osmoni diyə kardey iyən suki vanqi rujəon iftor iyən çəsenə faxtiku xəbədo bıdə bin, jığo ğeyd bıə ki çı Qiloni bəzi yolə şəhronədə har ruj iftori zəmonədə, topi sədo məse bıdə be! ijən işorə kardemone ki de moasirə texnoloqiyaonku istifodə kardey vositə, Tolışon miyono ım adəton həm qədə-qədə qim be, məsələn de rədio bə meydon ome həmzəmon çəsenədə ailəon rədioşon çı kə salonədə pekardedə bin və de çəy sədo rost kardey vositə hətto hamsuyəon həm oğo əkardin.

Çı Tolışə xalği co qılə erjinə adət-ənə ki Rəməzan mıborəkə manqi əyyomədə vey əncom bıdə, məçitonədə cəmaət nımoji bərpo kardeye. Dion iyən bandiyə məntəğəonədə ki kəon çı məçitonku vey fasiləş heste, millət veyni məçitədə ıştə zuhr iyən əsrə nımoji votedən, əmmo şəhronədə jığo ni iyən Tolışə xalğ cəhd kardə ki məçitonədə, ıştə həmmə nımojon cəmaət surəti pərpo kon, ın hərorətinə iştirok vey ğəşənqə cilvə nışo doydə.

Əzizon, Qilonədə xususi Tolışə xalği miyono, Rəməzan mıburəkə manqi şəvonədə milləti səyohət co rujon muğaisədə vey muşahidə bıdə. Ğasbu İroni miyonədə Qilon ostan yeqanə məntəğə bıbu ki millət iftori bəpeşt bə xıyobonon iyən vujuron şeydən iyən bə muxtəlifə xorəkon hardey məşğulin. Həmçınin iftoriku 30 dəğiğə bəpeşt, yolə hırdənon, qıləy məcmədə, Rəməzanə manqi muxtəlifə şinion bənə zulbiya və bamiya iyən reşte xoşkari nodən və həvoteyro bə kuçə xıyobonon bardən. kali şəxson həm iftoriku bəpeşt bə məçiton şedən və bə cəmaət imomi sıxənon quş dodən.

Çı Tolışon co qılə adət-ənə ki vey diğğət kardənine, ıme ki diədə bıə inəon iyən jenon tərəfo, səhəri və iftori ehtiyocinə çiyon hozzo bıdən ki veyni məhəlliyə vujuronku hozzı bıdə, jəqo ki zıneydəmon Qilonədə har qılə şəhr ya məntəğədə, har haftə, qıləy ruj bənə məhəlliyə vujuri elan bıdə, məsələn seşənbədə fuməni vujur, dışənbədə şəfti vujur və ya şənbədə bıə Masali tolışə şəhri vujur. Im vujuronədə divujə cəhdəkə jenon ıştə istehsol bıə məhəlli iyən iminnə məteriyalon həvotero vardedən və colib ıme ki Rəməzonə manqi oxonə rujonədə, Fıtrə idi çion hıryero ım vujuronədə cəmiyət vey çəşəçi bəbe.

Əzizon, ijən vəoməy rujonədə, Tolışə xalği miyono bıə Rujə manqi məxsusə adəton barədə bə şımə məlumat bədamon, Xıdoku şıməro məğfirət iyən baxşışi tələb kardəmon, şımə ibodəton ğəbul bıbun.