Mıborəkə Rəməzanə manqədə, Tolışon adət-ənənon(15)

Mıborəkə Rəməzanə manqədə, Tolışon adət-ənənon(15)

اَللَّهُمَّ وَ اجْعَلْنَا فِي سَائِرِ الشُّهُورِ وَ الْأَيَّامِ كَذَلِكَ مَا عَمَّرْتَنَاوَ اجْعَلْنَا مِنْ عِبَادِكَ الصَّالِحِينَ الَّذِينَ يَرِثُونَ الْفِرْدَوْسَ هُمْ فِيهَا خَالِدُونَ

Mehribonon səlom, rujə mo oxonə rujonədə şıməro xəy, səadət iyən Xıdo dərqohədə ibodəti tovfiği urzu kardəm və dıvom heste ki şımə nımoj-rujəon ğəbul bıbu.

Əzizon ım bərəkətinə manqədə, az səidi de məxsusə bərnomə şımə xıdmətədəm, ım bərnomədə həm bə Tolışə xalği kanə iyən torixiyə adət-ənənon tikəy işorə bəkamon.

Dəvət kardəm dəmə bə ico bımandən.

Mehribonon Rəməzan mıborəkə manq bəştə oxonə rujon nez bıdə, həminə bərnomə çərçivədə bə Tolışə xalği Fıtrə idi mərosimon iyən adət-ənənon işorə bəkamon.

Tolışi zıvonədə, bə Rəməzanə mıborəkə manqi idə şəv “rujə mo idə şəv” və bə çəy ruji ”idə ruj” ya “rujə mo idə ruj” votey bıdə.

Tolışi muxtəlifə məntəğonədə, Rəməzan idi şəvədə, adətonku qıləyni zəkate Fıtriyə doey heste. Tolışon bə Rəməzanə manqi fıtriyə, “Sərə Fıtrə” voteydən ki çəy doe jığoe ki: iftori iyən nımuj votey bəpeşt, ailə uzvon qurupi surəti cəm bəben iyən de yolon bə ico Xıdoku bə ın manqi mənəvi fırsət iyən tofiği xoto şık kardən. ım şəvədə, valedeyn bəştə hırdənon icozə nibədon ki xususi Fıtriyə co kardey bənav bə xışavəndon kə və ya co vırəon bışon. Tolışon bo Fıtriyə doeyro ıştə moliku qəndım, pəs iyən bırzi ixtisos dodən. peşo, qıləy yolə məcmədə, bo ailə uzvon miğdori, qəndım və ya bırzi co kardən, ijən ailə uzvon, inə, dədə, hırdənon, hətto rukə hırdənon, har nəfər 3 tosə 7 kərə bə bırz ya qandımi dast jedən iyən niyyət kardən ki tosə omə Fıtrə idi, Xıdovənde xalığ çəvonku mısibət iyən ğəmi diyəro ko. Və əqə Tolışə xalği fıtriyə pəs bıbu, ailə həmmə uzvon, bə pəsi sə, sina iyən peşti dast jedydən və peşo əy bə qıləy şəxs ki loyiğ iyən mıhtoce bədon. Co qılə adət həm ıme ki qıləy kisədə həmonə məcmə qandım iyən bırzi ekardən və kədə nodən, ta ım  ki Rəməzonə idə sıb ya Rujə mo idə sıbədə, ailəku i nəfər, əy bə qıləy fəğırə odəmi bıdə. de ım koy vositə fıtriyə doe mərosim bə oxo bərəse.

Əmmo, fıtrə idi rujədə, idə nımoji voteyro Tolışə milləti yol iyən hərorətinə iştirok vey vindey bıdə, Tolışon çı İlahi surfə ziyofəti de mehribonə Xıdo doə nemətonku ğədrdonəti kardey vositə bə oxo bərosnen. Həmçınin Fıtrə idi nımoji bərpo kardey bəpeşt, Tolışə mısılmonə millət, idə ruji bə yande təbrik voteyro, bə xışavəndon kə iyən bəştə şəhri ziyorətiyə vırəon ya mıtəbərrikə imomzodəon şedən.

Xosə əməson, de Xıdo koməki, vəoməy rujonədə ijən Rəməzanə manqədə bıə Tolışə milləti xususi adəton barədə bə şımə xıdmət məlumat bədamon.

Xıdoku şıməro məğfirət və baxşışi tələb kardəm, İlohi inoyət iyən lutfi sayədə bımandən.