Osmoniyə surəon-47

Osmoniyə surəon-47

Bə həzrəte Yusif(ə)-i çı naviku xəbə doey əsos,de bərəkəti pur bıə voşon bədiqə,haft sor Misri kaştemoni sahəon məhsulon rizoyətbaxş vəzyətədə be.Yusif(ə) ki,çı Misri xəzinədor be iyən ixtisodi koon çəy nəzə jiyədəbe,əmrış karde ki,xəzinə iyən anboon de xorəki məhsulon purkən.millətiku həm piyeşe ki,çəvon ehtiyoci mığdorədə çə azuğəonku oko bıdəyn iyən əmandəni bə hukuməti bəhəvaton.de ın tərtibi anbo iyən xəzinəon de azuğə xıç bə pur be.haft sor neməton ziyod bıey bəpeştə hışkə sor iyən ğəhəti ome rəse və məxloğ azuğə cəhəto məziğədəbin iyən qıləy behroniyə vəzyət bə əməl ome.Yusif(ə) bəştə mınəzzəmə bərnomə iyən proqrammə əsos,qandımi bə milləti  həvatedəbe iyən çəvon ehtiyocon adilonə surətədə təmin kardedəbe.həlbəttə,ğəhəti ətrof məntəğəonədə min cumlə Fələstın iyən Kənanədə bə əməl oməbe.əve Yəğub(ə)-i fərzəndon bo qandım hırye xoto bə Misri tərəf rəvonə bin. çun, Yusif(ə) şəxsən ıştən bə ərzoği baxş kardey prosesi nəzorət kardedəbe,ıştə boonış çı mıştəriyon miyono vindeşe.əmmo əvon ə həzrətışon nızıne.Yusif(ə) bəştə boon lutf kardedəbe iyən çəvon vəzyətiku dəparseydəbe.çəy boon voteşone:”əmə çı Yəğub(ə)-i daqlə fərzəndonimon ki,çəmə pı həm çı Xıdo pəyğombər İbreym(ə)-i nəvəy.əmmo əv ısət bə qıləy nığılə ğəmqinəti giriftor bıə.joqo ki,çəy qıləy zoəş hestebe və əvış vey piyedəbe.qıləy ruj əv deəmə bo şikor iyən nəvero bə səhro oməbe ki,bəçəmə ğəfləti xoto neyçi əvış poə-poə kardeşe”.

Yusif(ə) de har vositə dılış hestebe ki,ıştə qədə bo Benyamini ıştə palu bə Misr bıvardo.bəvonış vote:əgər şımə ijən çımı palu omeyon piye,ıştə ə bo biyənən.ehanə şımə əy nıvardiyone,həni az bəşmə qandım nibədom.de Yusif(ə)-i əmri xıdmətkoron məhrəmonə iyən məxfiyonə surətədə çəvon bo qandımi hıryero vardə pulonış çəvon şələon miyono noşone.Yəğub(ə)-i fərzəndon çandə ruj bədiqə bəştə şəhr rəsin.çı Misri Əzizi baxşeşəti qıləy bəhonə be ki,əvon ıştə pıku tələbkon ta əv Benyamini deəvon bə ico bə Misr bıvğando.əvon de Benyamini bə Misr çı Yusif(ə)-i tonoku omin.Yusif(ə) bəvon ehtıromış karde iyən əvonış çok-çoki ğəbul karde.peşo əvon nıfamə iyən nıdərəsə holədə bəştə bo Bemnyamini voteşe:mı ıştı bıvə həmonə Yusifim və ıştə boon kardə koonku hiç norohət məbi.