Azərboyconədə dindoron dastqirəti sındıne bedə ni

Dınyo həmmə şiyon məhərrəmə manqi dame və bo İmom Huseyni əzodara tədbiron bə jimon dəvononən, Azərboyconədə dindoron dastqirəti sındıne bedə ni.

İyuni 19-də dini fəol Samid Huseynovi qəte xəbə doə bedə.Bın barədə əçe jimoni həmro Arzu Huseynova məlumot pevolo kardəşe. Məlumotədə, Samid Huseynovi hojo həmonə ruji maştəvonə saatonəda Boku Zabrat ğəsəbədə polisxonə vanq karde bədiqi de əy əlağə oğəte nızne votə bedə.Arzu Huseynova bəyonış kardə ki, çəy şuə barədə məlumot bəvon iyuni 22-də doə bə. 15-minə polisxonədə Samid Huseynovi sıftə 2 ruj əyo oğəte, çəyo bəçəton bə Binəqədi mıvəğğəti oğətə təcridxonə bardə be və de əy telefon əlağə və vindemon karde mumkun nıbe votəşone. Polisxonəku Samid Huseynovi de “xuliqanəti” maddə qətə be bəyon kardəşone.Samid Huseynov 2023-minə sori de narkotik ittihomi dastqir kardə və 2 sor mıddət ozodətiku məhrum kardə bəbe. Bəvədə çəvon həmonə ittihomon ğəbul kardə nıbe, bəy şər ğandə be bəyonşon kardə be.