Ərbəyini mısofiron(Nəcəfədə)-5

Ərbəyini mısofiron(Nəcəfədə)-5

Nəcəfi şəhr İraği cənubədə vağe bıə.Həzrəte Muhəmməd(s)-I amuyəzo iyən canişin həzrəte Əli(ə)-I mığəddəsə ziyorətqo bə ın şəhri qıləy məxsusə mığəddəsətiş baxş kardə.əv de elm,imon,şucoət  iyən

əxloği pur bıə qıləy dıyoe və ə həzrət bo islomi pevolo kardey iyən istiğrari xoto ziyodə mıcohidətış karde.Əli(ə)-I bə islomi dınyo penc sornə hukumət  sulh iyən humanistə ədoləti komilə məfhumış bə nımoyiş noe və veyə fərdon bəçəy insoni kəmoli səmt cəzb bin və bə həmonə dəlili xoto,həzrəte Əli(ə)-I pokə mərğəd hejo çı diyəro ya nezə noxtəonku bo ziyorətiro bə Nəcəf omə ziyodə mısılmınon ğəbul kardedə. Çımisə əlovə Nəcəf şəhri elmiyyə hovzə və mədrəsəon təğribən həzo sore ki,islomi elmon nəşr kardə muhimmə mərkəze və bə milləti təlim iyən aqahəti baxş kardey cəhərə fəaliyyət nışon doydə.

Bə Nəcəfi şəhri nez bim.çımı dılədə qıləy vəsf nıbə həyəcon bə ome.İmom Sadığ(ə)-iku omə rəsə qıləy hədis bəçımı yod dəşe ki,ə həzrət hamyedə:”Qıləy zayir bə Əmirəl-Muminin(ə)-I hərəmi təşərruf beyədə, çı osmoni bəon bəçəy dimi oj bəbe”.zayiron mislış nıbə holo-həvo.çəvon şe-omey,dıvo-sıtoyişon və bo Əmirəl-Muminin(ə)-I ziyorət kardero cəhdon vəsf kardey vey saxte.jıqo bızın dılon həmonə vırə ıştə lonə hisob kardedən və ıştəni bəy nez hiss kardedən.ın hisson iyən mahbubəti bəçəy xotoye ki,Əli(ə) de Xıdo qıləy nığılə rabitəş bıə.əv qıləy ilahi merd və Xıdopərəst be ki,çəy həmonə ım xıslət əvış torıxədə əbədiş kardə.İmom(ə) ıştən hamyəşe:”mol-devləti qırdə kardə kəson bəyji bıə holədə mardən və alimon (rəbbani alimon) çanədə ki,dınyo bərpoye əvon həm əbədi bəmandeyn.çəvon cismon qim bıən,əmmo çəvon bəsə dılon sape kəşə naxş və rəsmon mevcude”.

Əli(ə)-I şəxsiyyət və məğam vey ali dərəcədə be.liza I hissə insonon çə həzrəti barzə məğamiku aqah və xəbədon.ə həzrət ıştə həxədə hamyedə:”maski,çımı noməlumə xısusiyyəton boşmə oşko bəbe və çən, çımı coni təmom bıey və coqləyni çımı əvəzi omey bəpeştə,(bəvədə)mıni bəzıniyon”.

Bə Nəcəf şəhri rəsim.ım vırə həmonə şəhre ki,çandə ziyodə soron çımi bənav Xıdo merdonku ikəs bo Xıdo dini xoto iyən bo Xıdo xoto bın şəhrədə jiyə və əbədi bo ozodi iyən ədolət tələb kardə merdon qıləy iftixor və səbarzətiye.şəhrədə xeyli insonon mevcude.Nəcəfi kənoyədə jiyə badiyə nişinə ərəbon omeydən səlom doydən və şedən və həni mandedənin.təğribən I rujo dı şəv mandim Nəcəfədə.çoko ki, bə hərəm rəseydəbim,jıqo bızın ki,bə qıləy pənohqo dəviteydəbim.həni co sıxanım ni,ım pənohqo həzrəte Pəyğombər(s)-I sıfarış kardə məkon be.çıro ki,ə həzrəti hamyəşe:”mı çı elmi şəhrim və Əli çəy dərvozə və bə”..