Osmoniyə surəon-160
Osmoniyə surəon-160
Duxani mıborəkə surə 40-ə ayə bəpeştə,ğıyoməti ruji iyən yavə ko soybon bə cəhəndım eqıniye iyən çokə ko soybon vəhıştədə asudə jimon kardey sərquzəştonku bəhs kardedə və de ın cumlə bino bedə: ”beşəkk, (həxı çı botıliku) co bıə ruj çəvon həmmə və`də doə bıə ruje”.ın ayə bə ğıyoməti ruji işorə kardedə ki,bəvədə həx çı botıliku co kardey bəbe və yavə ko soybon iqlə səfədə iyən çokə ko coqlə cərqədə bəmandeyn.həmonə ruji bə mucrim iyən qınokoron və`də doə bıə ruje ki,həmonə ruji hiçkəs bə cokəsi fəryodi rəsey əzıni və bəvon hiç qıləy komək nibəbe.bə ruji duston iyən nezə odəmon iyande anqıli oj kardey nibəzıneyn və bə iyande hiç qıləy komək kardey əzınin.illa Xıdo əy bəştə rəhməti şomil kardə kəsi.
Duxani mıborəkə surə 43-ə ayəku jəqoşə,çandə qılə ayədə çı cəhəndımi əhli əzobonku ihissə munəkis bıə və bəy işorə bıə.bə ın ayəon əsos,Zəğğomi do çı mucrim iyən qınokoron xoərk bəbe ki,əv qıləy vey tel, bevəcə buş bıə iyən yavə təmış bıə doye.Zəğğomi do bənə xorəki bə qınokoron luz-ləvə daxil beyədə, əyo qıləy fovğəladə və vəsf nıbə holədə hərorət iyən qaməti icod bəkarde və həmçinin bənə ğəlyoni qılə ovi qıləy formadə bəbe. Həmonə xorək bə həmonə qınokori bədəmi zumandəti boyis bıey iyən bəy ğudrət baxş kardey əvəzi,bəçəy bədbəxtəti,dardi vey bıey iyən əzob-əziyyəti boyis bəbe.ayəon dəvomədə hamyedə:”bə cəhəndımi məmuron xitob bəbe ki,ın inodkor iyən sıtəmkorə fərdi bıqətənən və bəy cəhəndımi miyonə həvoləkən şodənən.” peşo bə cəhəndımi məmuron əmr kardey bəbe ki,çə həmonə qılə və bə cuş omə oviku çəvon səpe rukənən.de ın tərtibi əvon həm çı dıləku bəsuteyn və həmən çı biku çəvon qırd vucud otəş bəqəte…..
Casiyə mıborəkə surə Kərimə-Ğıroni çılo-pencminə surəy.ın surə Məkkədə enovniyə bıə və 37 qılə ayəku iborəte.bə çın surə 28-ə ayədə bıə mınosibəi xoto,bə ın surə Casiyə nom noey bıə.Casiyə yəni bə zonu nıştovnə və vardə bıə kəs.
Casiyə surə min cumlə çə suronkuye ki,de “Hamim” mığəttəə hərfon bino bedə.bın surədə bəhs bıə mevzuon ımonin:Kərimə-Ğıroni əzəmət iyən çəy hidoyətəkə rol,tohid iyən Xıdopərəstəti dəlilon,bə məddipərəst iyən materiyaliston doə bıə cəvob,bənə Bəni-İsrayli bıə kali navkonə ğovmon sərquzəşton işorə,bə ıştə roy qim kardə və bə zəlolət eqıniyə kəson çəşnavi və xəbədorəti,bə əfv iyən quzəşti səmt dəvət kardey və ğıyoməti ruj odəmi bədəmi lorzınə hodisəon iyən insoni əməlon nomə……
