Osmoniyə surəon-162

Osmoniyə surəon-162

Casiyə mıborəkə surə peşonə ayədə çın dastə ağıbəti həxədə jıqo hamyedə:”vay bıbu bə har qıləy duyəvıjə qınokori ki,ilahi ayəon bəy tilovət bedə,məsedə..əmmo,bəştə təkəbbır iyən yoləşəxəti xoto,jıqo bızın əvışon məsəni(bəştə kufr iyən mıxolifəti )isror kardedən.çən,bəy saxtə əzobi bəşorəti bıdə”.(7-8)

Kərimə-Ğıroni nəzəku ilahi ayəon mığobilədə deşmınə mevğıyyət qətey,çəkəson koye ki,çəvon qırd vucudi qıno dəqətəşe və bə du iyən kizbi dıço bıə.ə insonon ki,ilahi ayəon bəvon tilovət bedə və əvon əy məseydən.əmmo,əvon bəştə yoləşəxəti iyən mıxolifəti isrori xoto,quya əslən və umumən əvışon məsəni.liza,əvon de Xıdovəndi dardnokə əzobi  mıjdəvoni doey bıə.

Casiyə mıborəkə surə 12-13-ə ayəonədə ijən çı tohid və Xıdoşınosi həxədə bəhs kardedə və hamyedə: “Xıdovənd əkəse ki,dıyoş boşmə təsxir(ram) kardə ta kəştiyon deçəy əmri cari bedən və ta şımə çəy fəzl iyən ruziku bəhrə bobənən və ğasbu şımə şıkkon və osmonon iyən zəminədə bıə çiyon boşməş ram (təsxirış) karde(ki)həmmə çəykuye.həyğətən,bımədə(bın koyədə)bo fik-fam kardəkəson qıləy nışonəon heste”.

Casiyə mıborəkə surə 15-ə ayədə bə ın həyğəti işorə kardedə ki,çı insoni əməli mənfəət iyən ziyon bəçəy ıştəni obəqarde.liza,bəpe inson ıştə kardə koonku mığət bıbu.joqo ki,hamyedə:”hakəs ki,ləyoğtinə ko əncom bıdo,(ım)boçəy ıştəniye və hakəs ki,yavəko bıko,bəçəy ıştən ziyoniye.peşo bəştə pərvərdıqori oqordıney bəbiyon”.

Bənə ın təbiri kərimə-Ğıroni mıxtəlifə vıronədə həm omə və həyğətədə ım qıləy cəvobe bə kəson ki, votedən Xıdovəndi bəçəmə ibodəti çı ehtiyociş heste?bə ın ayə əsos,Xıdovəndi bəçəmə kardə xeyə koon hiç qıləyni ehtiyociş ni.bəlkəm,ın əməmom ki,çı salehə əməlon sayədə ozavziedəmon iyən təkamul pəydu kardedəmon və ya bəşt curm iyən qıno xoto,bə zəlolət iyən bədbəxtəti də suğut kardedəmon eqınedəmon və bəştə kardə əməlon nəticəon dıço bedəmon.

In ayə bə ın nuktə həm işorə kardedə ki,həmməkəs ilahi ğanunon mığobilədə yeksan və mısovin və ilahi cəzo iyən mıkofoti nizom və sistem,komilə formadə adilonə və bəçəmə insonon kardə çok iyən bədə koon funksiya əsose.

Casiyə mıborəkə surə 27-ə ayədə omə:”osmonon iyən zəmini hukumət bə Xıdo məxsuse və ğıyoməti ruj ki, bərpo bəbe,həmonə ruji botıli əhl ziyon bəvinde”.

Əv çı qırd hestemoni aləmi mailk iyən hakime və dınyo çı insoni mardey bəpeştə bo ğıyomətiro qıləy kaştemoni sahə iyən de mənfəəti pur bıə ticorətxonə ğərol doey bıə.əmmo,ğıyoməti ruji botıli əhl ziyon bəvindeyn.zira,əvon ıştə umri sərmoyəşon çı dasto doə və sıvoy həsrət iyən ğəmqinəti boəvon hiççiş vardəni.həyot,ağl iyən jimoni neməton qırd ımon çı insoni bın vıjorədə bıə sərmoyəy.əvon ki,həxışon ğəbul kardəni iyən botılə fik iyən əğedəon rəvoc doydən,ğıyoməti ruji ıştə ziyonkor bıey deştə çəşi mışohidə bəkardeyn.