Osmoniyə surəon-173

Osmoniyə surəon-173

Hucurati mıborəkə surə Kərimə-Ğıroni çılo-nəvminə surəy,Məkkədə nozil bıə  və həjdə qılə ayəku iborəte.bın surədə de peyğombər(s)-i və camiyə uzvon  de iyande rəftor kardey  şivə barədə kali əxloği muhimmə mevzuonku bəhs bıə və bəy çı əxloğ iyən ədəbi surə həm votey bəbe.çın surə mətləbon çımiku iborəte:

De peyğombər(s)-i ədəb iyən rəftori formə iyən çə həzrəti huzurədə bə ədəbi rioyət kardey,kali iştimayi əxloği usulon ki,əvoni oko doey bə camiyədə səfo iyən səmimiyyəti boyis bedə və əvoni nəzədə nıqətey, bə bədbinəti,nifoğ iyən volo-bolo bıey boyis bedə.koon isloh kardey və çı mısılmınon miyono vositəçi roli icro kardey,bə iyande təkrim iyən ehtırom noey və çı məsxərə,suyi-zənn,təcəssus(yəni cokəson jimoni barədə nəve) və ğeybətiku ictinob kardey,təğva,Xıdovəndi mığobilədə çı insoni erjinəti meyar bıey,de əməli bə ico bıə imoni təkid,bə islomi ğəbul kardey xoto,mınnət nınoey və bə hestemoni aləmi sırron iyən bə insonon əməlon Xıdovəndi elm iyən aqahəti və çəvonku xəbədo bıəy....

Ha imon vardə kəson ha! Xıdo iyən çəy rəsuliku (hiç qıləy koyədə)bənav dəməşənən və Xıdoku bıtarsənən ki,Xıdovənd əməs iyən əzıne(1).

Koonədə Xıdo iyən çəy rəsuliku bənav nıdəşe,ıme ki,qıləy mısılmon bəpe qırd koonədə Xıdo iyən çəy rəsuli bənav bıdo.ıştə rəhbəron məxsusən bənə peyğombəri bıə rəhbəron  tərəfdoron tabe bıey inzibat və ğanun,tələb kardedə ki,hiç qıləy ko iyən sıxan ya qıləy bərnomədəçəvonku bənav nıdəşo.həlbəttə,ım bın mənoədə ni ki,ehanə çəvon qıləy təklif iyən nəzəşon bıbu,ıştə ilahi rəhbəron ixtiyorədə ğərol nıdon. bəlkəm,mənzur iyən məğsəd ıme ki,əvon qıləy ko təyid iyən təsdığ nıkardey bənav,bə Xıdo iyən bəçəy rəsuli tabe bıə kəson ıştən sıftədə bənav nıdəşon və qıləy ko bə vırə nırosnon.

Peyğombər(s)-i jimoni torıxədə omə ki,çandə kərə çandə fərdon koonədə çə həzrətisə bənav dəşən yaanki,çə həzrətiku bə dumo mandən.min cumlə mıborəkə Rəməzonə manqədə çoko ki,peyğombər(s) bo Məkkə fəthiro hərkətış karde,de ə həzrəti bə ico ziyodə cəmyət qırdə bıəbe ki,çəvon bəzi qılon de asbi və kali qılon həm piyodə  bin.qıləy mənzılqo iyən vırədə peyğombər(s) ıştə rujəş oj karde və iftorış karde. de ə həzrəti bə ico bıə kəson həm jıləvoni kardeşone və ıştə rujıəşon darışte. əmmo,çəvonku çandə nəfər bə pəyğombəri tabe nıbin və ıştə rujədə mandin.peyğombər(s) həm bəvon qınokorə dastə nomış noe. peşonə ayə həm bə ın əmri işorə kardedə və hamyedə:”ha imon vardə kəson ha! ıştə sədo peyğombəri sədoku (vey) barz məkənən və çoko ki,şıməku qıləyni de coqləyni de barzəvo sıxan votedon,deəy həm (jəqo) de bılındə sədo sıxan məkənən.məbodə,şımə əməlon bə puç beşo iyən məhf bıbu,qıləy holədə ki, (şımə)zıneydəniyon”.

Bə ın ayə əsos,loyığ ni ki,ikəs ıştə sədo bəsə peyğombəri sədosə barzko və bəpe hiçkəs ıştə sədo bəsə peyğombər(s)-i sədosə bılınd nıko ki,ım ıştən inev bə həzrəti mıborəkə vucudi qıləy beədəbəti bə hisob omeydə.