Osmoniyə surəon-176

Osmoniyə surəon-176

Ğafi mıborəkə surə Kərimə-Ğıroni pencominə surəy.ın surə Məkkədə nozil bıə iyən 45 qılə ayəku iborəte. çun ın surə de Ğafi mığəttəə hərfon bino bedə,əve bın surə Ğafi nomışon noə.Ğafi mıborəkə surə bəhson əsliyə mehvər iyən məzmun,miadi məsələy və təğribən çəy qırd ayəon bın məzmunədə ğərolış qətə.

Çın surə kulliyə surətədə çımiku iborəte:bə Kərimə-Ğıroni əzəməti kırtə işorə,kofiron miadi inkor iyən təəccıb kardey,bə xılğəti nizomi dığğət kardə holədə bə miadi istidlol kardey,navkonə tuğyongərə ğovmon vəzyət iyən çəvon dardnokə tale, de bə iminə xılğəti dığğət kardə holədə,bə miadi istidlol vardey,bo hisobi rujiro insonon əməlon və sıxanon nıvıştey,bə maqi ayid bıə məsələon iyən bə coqlə qıləy dınyo ovaştey barədə bıə bəhson,ğıyoməti səhnəku i hissə və çı vəhışt iyən cəhəndımi əhli vəzyət, bə Xıdo dığğət kardey iyən bəy ibodət və sıtoyiş kardey və dınyo jimoni oxo və ğıyoməti bino bıey.

Ğaf,ğəssəm bıbu bə Məcidə-Ğıroni,çun,çəvon ıştən miyono qıləy tarsədə ome,təəccıbışon karde və kofiron voteşone:ım qıləy əcibə çiye!çoko ki,mardimon və tul bimon(ijən sənibəton bəyji bəbemon?)ım qıləy diyəroə oqardemone!(1-3).

 Bın ayəonədə bə kofir iyən mışrikon beəsosə irodon işorə kardedə.əvon təəccıb kardedəbin ki,çokonə qıləy tarsədə peyğombər(s) çəvon ıştən miyono omə və əv boçi çı bəşəri ıştən cinsikuye?həmçinin,əvon vey təəccıb kardedəbin ki,çoko insonon mardey iyən pıxey bəpeştə,ijən sənibəton bəyji bəbe?əvon ijən bə jimon oqardey,qıləy ğeyri-mumkin və çı ağliku bə diyəro qıləy çi zıneydəbin.

Kərimə-Ğıron bəçəvon inkor iyən təəccıbi işorə kardə holədə hamyedə:qıləy Xıdo ki,çəy elm qırd çiyon əhotə kardedə,zəmini çəmə bədəmiku bəkam kardey həm zıneydə və lozım bıə zəmonədə həmmə kəs və çiyon qırdə və cəm bəkarde.həmçinin insonon əməlon hisob,bo ğıyoməti ruji oqətey bedə.həmmə insonon əməlon lovhi-məhfuzədə səbt iyən ğeyd bedə,bın aləmədə hiç qıləy əməl qim bedəni və həmmə əməlon oqətey bedə.

Ğafi mıborəkə surə 5-ə ayədə  bə ın muhimmə nuktə dığğət kardedə ki,əvon çoko ki,həx bəçəvon soyəx omeydə,əy rəyrə təkzib kardedən.həyğətədə,ın ayə ımi rosneydə ki,əvon həxı zıne-zıne inkor kardedən. qıləy holədə ki,həx boəvon oşko bıəbe iyən bəvədə hiç qıləy şəkko-şubhə mandəni.ayədə oxoyədə hamyedə:çun əvon həxışon təkzib karde,əve hejo ıştə sə qin kardə və sərqərdonə holədən.......

Peşonə ayəonədə bə Xıdovəndi benəhoyətə ğudrəti işorə kardedə və hamyedə:”aya əvon bəştə səy sape bıə osmoni diyə kardedən ki,çokonə əmə əvımon bina kardəmone və(de astovəon) ziynət baxş kardəmone və bəvədə hiç qıləy tək ni?(6).

Bın ayədə bə osmoni nəzə kardey məğsəd,bın mənoədəy ki,bın nizomədə hiç qıləy noxsan və notorozəti mevcud ni.həmçinin,zəmini ətrofi əhotə kardə osmon iyən atmosferədə qıləy çək iyən təki nıbey mənoədəy.ımi həm zikr kardey lozıme ki,atmosfer bənə qıləy sipəri zəmini çı səmavi sığonku mıdofiyə kardedə. joqo ki,əvon bə zəmini nırəse əvoni sutuneydə və məhf kardedə.