Osmoniyə surəon-178

Osmoniyə surəon-178

Ğafi mıborəkə surə 19-ə ayədə bə maqi təzahuri işorə kardedə və hamyedə:”maqi səkərot həxədə bome bərəse (bəy bəvoteyn)ım həmonə çiye ki,çəyku fərol kardedəbiyon”.

Maqi səkərot qıləy holəte ki,bə məstəti iyən sərxoşəti mandedə ki,bə mardey mığəddimə və vəsə əsəron rəsey xoto,bə insoni və beşedə və əv qıləy şiddətinə iztirob iyən noroməti dılədə bedə.maq,həyğətədə qıləy muhimmə intiğali və ovaştey mərhələy ki,çı insoni de dınyo bıə qırd rabitəon bırniye bedə və əv bə qıləy aləmi ğədəm noydə ki,ın aləm boəy komilə surətədə noməlum və boəy tojəye.inson maqi ləzədə qıləy tojə vindemon pəydu kardedə,çın dınyo dayimi nıbey dərəseydə vıə maqi bəpeştə bıə hodisəon qədə-qədə mışohidə bedə.iyoe ki,çəy bədəmi qırd vıron dəhşət iyən vəhşət dəqətedə və bənə qıləy mastəti formə boəy bəvə omeydə,əmmo əv həyğətədə məst ni.

Maq iyən mardey bo qıləy muminə insoni çın dınyoku bə de ilahi neməton pur bıə qıləy co aləmi intiğal və ovaştey mənoədəy və ım intiğal bo hiç kəsi hoston ni.çıro ki,insoni ruh dırozə soronədə bəçəy bədəmi pemujiyə və deəy qıləy rabitəş bıə.

İmom Sadığ(ə)-iku dəparseyşone ki,çıro insoni ruf çəy bədəmiku xaric beyədə,əv norohəti hiss kardedə.həzrəti hamyeşe:bəçəy xotoye ki,əv deəy ruşdış kardə perəsə.dırıst və səhih bənə ıme ki,qıləy pıxə dandoni insoni qəviku kəşedən bekardedən.təbiiye ki,əv peşo oroməti hiss kardedə.əmmo,co bıey ləzə və an vey dardnok və dojış veye.

Ğafi mıborəkə surə 39 iyən 40 minə ayəonədə omə:”çəvon votə çiyon mığobilədə tov biyə və həşi pemey bənav iyən nav ğurubi(həşi nıştey) deştə pərvərdıqori sıtoyişi təsbih bıvot və şəvi i nimədə iyən səjdəon bəpeştə bəy təsbih bıvot”.

Fəğət de səbr iyən istiğaməti ğıvvə,bə muşkilaton və problemon ğalib omey bəbe və bəpe bə deşmınon norəvoə nisbəton tov biyə.çun səbr iyən istiğaməti bə qıləy himoyə ehtiyociş heste,əve peşonə ayəon dəvomədə bə nımoji dəvət kardedə. Zira,nımoj Xıdo zikre və insoni de həmməysə çokə himoyədori qıləy rabitə nışon doydə.Xıdovənde-Aləm bəştə pəyğombəri əmr kardedə ki,de eşğ iyən ixlosi çı həşi pemeku iyən ğurubi bənav deştə pərvərdıqori həmd iyən təsbihi ko məşğul bıbu və şəvi inimədə və səjdəon bəpeştə həm deçəy təsbihi ko məşğul bıbi.nımoji ğolibədə Xıdovəndi ın dayimi təsbih kardey, bənə jimon baxş kardə ovi ğətrə bə ionsoni con iyən dıli nışteydə və bə insoni qıləy şoyvonəti iyən həyot baxşeydə.....

In ayə bə maq iyən mardey həxəti təkid kardedə və hiçkəs ın həyğəti inkor kardey nibəzıne.oxoyədə qırd insonon çı maqi tami bəçaşteyn və maq həmmə insonon çı dınyoku bəberde.bə maqi həyğəti dığğət kardey,bə həmmə insonon qıləy çəşnavi iyən xəbədorətiye ki,əvon çok-çoki fik-famkon,dırıst iyən səhihə roy bıvıjnon və ıştəni bo qıləy əbədiyə jimoni hozzıkon.

Ğafi mıborəkə surə oxonə ayəon çı miadiku bəhs kardedə.joqo ki,hamyedə:

“Və quş bıdə qıləy ruj ki,munadi(nido jıəkəs) çı neziku vanq  jeydə,qıləy ruj ki,həmməkəs (ğıyoməti) ruji sədo həxədə bəməseyn.həmonə ruji(çı ğəbonku) xaric bıə ruje.həyğətən,əmə bəyji kardedəmon və kışteydəmon və oqardemon fəğət bəçəmə tərəfe”.

Qıləy munadi və nido jıə kəsi vanq jıey,həyğətədə İsrafili bə suri pu kardeye və dıminə seyhə və vanq həm yəni həmonə ğıyom iyən həşr bıeye.qıləy ruj ki,insonon çı ğəbonku xaric bəbeyn bebəşeyn.peşo bın dıjdə məhkəmədə hakim və ğazi ruşin iyən oşko kardero,əlovə kardedə:”əmə bəyji kardedəmon və kıştedəmon və qırd oqardemon bəçəmə səmte”.

Həmonə ruji zəmin poə bıəbe və insonon bəyji bəbe və çəyu de surəti bə bi bebəşeyn.ğıyoməti ruji insonon həşr iyən cəm kardey,bo Xıdovəndi vey hoston iyən rohəte.